|
 Oktyabrın 15-də Azərbaycan boksçusu Elvin
Məmişzadə Qətərin paytaxtı Dohada keçirilən boks üzrə
dünya çempionatının qalibi adını qazanıb.
AZƏRTAC xəbər verir ki, millimizin üzvü, birinci
Avropa Oyunlarının çempionu Elvin Məmişzadə (52 kq)
həlledici qarşılaşmada kubalı boksçu Yosbani Veitia ilə
gərgin keçən döyüşdə böyük üstünlüklə qalib gəlib.
İdmançımızın şərəfinə Azərbaycanın Dövlət himni
səsləndirilib, bayrağımız ucaldılıb. Qeyd edək ki,
E.Məmişzadə oktyabrın 12-də finala yüksələrək “Rio-2016”
Yay Olimpiya Oyunlarına lisenziya qazanmışdı.
Olimpiya Oyunlarına lisenziya xarakteri daşıyan
çempionatda mübarizə aparan digər boksçumuz, dünya və
Avropa çempionu Albert Səlimov (60 kq) isə çempionatın
gümüş medalına sahib olub.
Birinci Avropa Oyunlarının qalibi Pərviz Bağırov
(69 kq) yarışları bürünc medalla başa vurub. P.Bağırov
yarımfinalda Qazaxıstan nümayəndəsi Daniyar Yeleusinova
uduzsa da, 69 kiloqram çəki dərəcəsində finala adlayan
Muhammed Rabii bu turnirdən əvvəl WSB liqası turnirində
Olimpiadaya lisenziya qazandığından həmyerlimiz
çempionatın üç vəsiqəsindən birinə yiyələnib. |
