|
 Vətənin hər zərrəsi, dağı, dərəsi, çayı, gölü,
meşəsi, aranı, yaylağı bizim üçün əzizdir, müqəddəsdir!
Aldığımız təlim-tərbiyə, böyüklərimizdən,
valideynlərimizdən və müəllimlərimizdən öyrəndiklərimiz,
eləcə də öz düşüncələrimiz bu aydın həqiqəti bizim üçün
daha cəlbedici edir.
Bu baxımdan, ötən bazar günü sinif rəhbərimiz
Könül Şahbazovanın təşəbbüsü ilə Qobustan Dövlət
Tarixi-Bədii Qoruğuna ekskursiyamız zamanı çox
yaddaqalan və unudulmaz hisslər yaşadıq. Qobustan
qayalarının on min illərdən süzülüb gələn cazibəsi bizi
öz sehrinə salmışdı. Kitablardan oxuduğumuz
qədimdən-qədim tariximizlə belə yaxın təmasda olmaq çox
qürurverici idi... Açığını deyim ki, Bakıdan cəmi 56
kilometr aralıda yerləşən bu müqəddəs məkanda indiyə
qədər olmadığıma görə dərin təəssüf hissi keçirdim.
Öncə qoruğun ərazisindəki muzeylə, daha sonra
tarixin dərinliklərindən soraq verən qayalıqlarla tanış
olduq. Bildirildi ki, Qobustan abidələri üst paleolit
dövrünün sonundan başlayaraq eramızadək olan təxminən 20
min illik dövrü əks etdirir. Qobustanda qayaüstü
təsvirlər ilk dəfə 1939-cu ildə aşkar edilib. 1966-cı
ildən qoruq statusu alan Qobustan kolleksiyalarında 6
mindən artıq qayaüstü rəsm və 100 min ədəddən artıq
arxeoloji material mövcuddur. Sevindirici haldır ki,
Qobustan abidələrini YUNESKO Dünya İrsi Siyahısına daxil
edib.
“Uzaq keçmişdə Qobustanın iqlimi daha çox
rütubətli olub. Bu ərazidə qalın ot örtüyü və zəngin yem
ehtiyatları olduğuna görə Qobustanda otyeyən heyvanların
çoxsaylı sürüləri vardı. Qədim insanlar vəhşi heyvan
sürülərini dar cığırlarda səs-küylə, məşəllərlə
qorxudaraq yarğanlara tərəf qovaraq uçuruma atılmağa
məcbur edirdilər. Nəticədə isə qida əldə olunurdu” -
qoruq əməkdaşının qədim qayaüstü təsvirləri və əzəmətli
qayaları göstərərək dediyi bu sözlər bizi sehrli bir
aləmə aparmışdı.
Qobustan qayalıqlarına səfərimiz həm də onunla
əlamətdar oldu ki, sinif yoldaşlarımızla daha fərqli
mühitdə ünsiyyətdə olduq, dostluğumuz daha da
möhkəmləndi. Bir yerdə gəzdik, əyləndik və yeni
məlumatlar əldə etdik. Hələ bir duz-çörək də kəsdik,
birlikdə. Bütün bunlara görə istirahət gününü bizimlə
birlikdə olmağa həsr edən Könül müəllimə və valideynlərə
xüsusi təşəkkürümüzü bildiririk.
Səfərimiz haqqında təəssüratlar o qədər çoxdur ki,
yazmaqla bitməz. İnanıram ki, Azərbaycan tarixini daha
yaxşı öyrənməyimiz, Vətənimizin tarixi zənginliklərini
duymağımız üçün Qobustan Dövlət Tarixi-Bədii Qoruğundakı
abidələr əsl əyani vasitə oldu bizimçün...
Cabir MƏMMƏDLİ,
BDU-nun “Gənc istedadlar” liseyinin VI b sinif şagirdi |
