|
 Naxçıvan
Dövlət Universitetində “Davamlı turizmin idarə olunması
sahəsində beynəlxalq bakalavr və magistr proqramları
üçün yeni modulların hazırlanması” adlı Avropa
İttifaqının TEMPUS proqramı çərçivəsində üçgünlük
təlim keçirilib. 2012-ci ildən icrasına başlanılan və 30
universitetin təmsil olunduğu layihənin əsas məqsədi
davamlı turizmin idarə olunması üzrə kurikulumların
müasirləşdirilməsi və davamlılıq prinsipləri haqqında
birgə anlayışı inkişaf etdirməkdir.
Təlim başlamazdan əvvəl universitetin rektoru, AMEA-nın
müxbir üzvü Saleh Məhərrəmov sözügedən layihənin
rəhbərləri ilə görüşüb, təlimin işinə uğurlar arzulayıb.
Rektor universitetin keçdiyi inkişaf yolu, həmçinin
beynəlxalq əlaqələri haqqında qonaqlara ətraflı məlumat
verib. Avropa təhsil prosesini özündə əks etdirən TEMPUS
proqramının mühüm əhəmiyyət daşıdığını diqqətə çatdırıb.
Rektor bildirib ki, rəhbərlik etdiyi ali təhsil ocağının
TEMPUS proqramı ilə qarşılıqlı əməkdaşlıq şəraitində 7
layihənin iştirakçısı olması, Türkiyə universitetləri
ilə qarşılıqlı müəllim və tələbə mübadiləsini nəzərdə
tutan “Mövlana” Mübadilə Proqramı çərçivəsində həyata
keçirilən tədbirlər, ERASMUS MUNDUS, ERASMUS-HUMERİA
proqramları təhsilin və tədrisin müasir tələblər
səviyyəsində qurulmasına xidmət edir.
“Bu cür təlimlər əməkdaş universitetlərin bakalavr və
magistr tələbələri üçün olduqca faydalıdır və gələcəkdə
belə layihələrin davamı olacaqdır”. Bu fikirləri
layihənin Naxçıvan Dövlət Universiteti üzrə yerli
koordinatoru, tarix üzrə fəlsəfə doktoru, dosent Şamxal
Məmmədov çıxışında səsləndirib.
Layihənin meneceri, Almaniyanın Yade Tətbiqi Elmlər
Universitetinin beynəlxalq əlaqələr şöbəsinin müdir
müavini Gila Altmann və layihənin rəhbər komitəsinin
üzvü, birinci işçi qrupun rəhbəri, Almaniyanın Vorms
Tətbiqi Elmlər Universitetinin vitse-prezidenti,
professor, doktor Knut Scherbag çıxışlarında layihənin
müddətinin daha bir il uzadıldığı, sözügedən layihə
bitdikdən sonra da universitetlərarası əməkdaşlığın
davam etdirilməsi ilə bağlı məsələlərə toxunub, layihə
çərçivəsində görülən işlər və qarşıda duran vəzifələr
haqqında məlumat veriblər.
Görüşdən sonra təlim öz işinə başlayıb. Təlimin
keçirilməsində əsas məqsəd turizm üzrə müasir Avropa
təhsil təcrübəsini iştirakçılara çatdırmaqdır. Təlimdə
layihənin Azərbaycan üzrə tərəfdaş təşkilatları
sırasında olan - Azərbaycan Turizm və Menecment
Universiteti, Azərbaycan Dövlət Aqrar Universiteti və
Naxçıvan Dövlət Universitetinin nümayəndələri-müəllim və
magistrlər iştirak edirlər.
Qeyd edək ki, üç gün davam edən təlimdə “destinasiya
menecmenti”, “davamlı turizm”, “ekoturizm” və s.
modullar üzrə seminar məşğələləri keçirilib, müzakirələr
aparılıb.
Mina QASIMOVA |
