|
Sentyabrın 29-da Milan şəhərində keçirilən
Azərbaycan-İtaliya Universitetlərarası Forumu İtaliya
mətbuatında geniş şərh olunub. Yerli mətbuat forumun iki
ölkə arasında təhsil əlaqələrinin inkişafına yeni töhfə
verəcəyini qeyd edir. Ölkənin Geopolitica.info
saytı iki ölkənin təhsil qurumlarının, ali məktəb
rəhbərlərinin iştirakı ilə keçirilmiş forum çərçivəsində
aparılmış debatlar barədə geniş məlumat verib. Məqalədə
tədbirin əhəmiyyəti, Azərbaycan və İtaliya
universitetləri arasındakı əlaqələrin daha da
artırılması, tələbə mobilliyi, birgə layihə və
tədbirlərin həyata keçirilməsi, təhsil sahəsində
əməkdaşlığın genişləndirilməsi imkanları barədə məlumat
verilir. Forumun əhəmiyyətindən danışarkən məqalə
müəllifi Françesko Montanino haqlı olaraq qeyd edir ki,
təhsil və mədəniyyət artıq ölkələr arasında əlaqələrin
inkişafında iqtisadi və digər strateji alətlər kimi
güclü təsir vasitəsinə çevrilməkdədir. Məqalədə forumda
iki ölkənin akademik təhsil qurumlarının - Bakı, Roma,
Breşia, Venetsiya və Neapoldan olan universitetlərin
rəhbərlərinin ilk dəfə olaraq ən yüksək səviyyədə
təmsil olunduğu vurğulanır. Məqalədə təhsil naziri
Mikayıl Cabbarovun, İtaliyanın Təhsil, Universitetlər və
Tədqiqatlar Nazirliyinin ali təhsilin
beynəlmiləlləşdirilməsi departamentinin müdiri Federiko
Cinquepalminin, Roma La Sapienza Universitetinin rektoru
Antonello Biacininin, Roma Tre Universitetinin rektoru
Mario Panizzanın, Brescia Universitetinin prorektoru
Maurizio Memonun və digər iştirakçıların çıxışlarından
sitatlar gətirilir və tədbirin hər iki ölkənin təhsil
sistemi arasında təcrübə mübadiləsi aparmaq baxımından
önəmi vurğulanır.
Qeyd edək ki, İtaliyanın bir sıra digər xəbər
saytlarında da forumla bağlı məqalələr yayılıb.
“ANSA” agentliyinin saytında yerləşdirilmiş yazıda
ölkələrimiz arasında bütün istiqamətlərdə, o cümlədən
təhsil sahəsində yaxşı əlaqələrin olduğu diqqətə
çatdırılır. Vurğulanır ki, bu gün 300-dən çox
azərbaycanlı tələbə İtaliyanın aparıcı
universitetlərində təhsil alır. “Opinione pubblica”
xəbər saytının “Azərbaycan-İtaliya Universitetlərarası
Forumu: böyük mədəni uğur” sərlövhəli yazısında tədbirin
hər iki ölkənin akademik dairələrinin nüfuzlu
nümayəndələrini bir araya gətirdiyi vurğulanır. Diqqətə
çatdırılır ki, bütün sahələrdə yüksək səviyyədə olan
münasibətlərimiz ali təhsil sektorunda da
güclənməkdədir. İtaliyanın “Il Primato Nazionale”
xəbər saytı iki ölkə arasında təhsil sahəsində
əməkdaşlığın genişlənməsindən bəhs edir. Romada
keçirilmiş Azərbaycan-İtaliya Universitetlərarası Forumu
bunun bariz nümunəsidir. Məqalədə tədbirdə iştirak etmək
məqsədilə İtaliyada səfərdə olan Azərbaycanın təhsil
naziri Mikayıl Cabbarovun italiyalı həmkarı ilə görüşünə
də toxunulur.
Qeyd edək ki, təhsil naziri Mikayıl Cabbarovun
rəhbərliyi ilə Təhsil Nazirliyinin və ölkəmizin 11
dövlət ali təhsil müəssisəsinin məsul şəxslərindən
ibarət nümayəndə heyəti sentyabrın 29-da Milanda
Azərbaycan-İtaliya Universitetlərarası Forumunda iştirak
edib. Forumun məqsədi Azərbaycan və İtaliya ali təhsil
müəssisələri arasında mövcud əlaqələri genişləndirmək,
yeni əlaqələr qurmaq, aktual mövzuları müzakirə etmək,
təcrübə mübadiləsi və birgə proqramlar həyata keçirmək
imkanlarını dəyərləndirmək olub.
Oruc MUSTAFAYEV,
“Azərbaycan müəllimi” |
