|
Moskva Dövlət Universitetinin Bakı filialının rektoru,
AMEA-nın müxbir üzvü, professor Nərgiz Paşayeva
oktyabrın 9-da Avrasiya Universitetləri Şurasının (EURAS
) rəhbəri, professor Mustafa Aydınla görüşüb. Professor
Nərgiz Paşayeva qonağa rəhbərlik etdiyi filialın
tədris fəaliyyəti barədə məlumat verib. Qeyd edib ki,
Bakı filialı dünyanın aparıcı ali məktəbləri ilə sıx
əməkdaşlıq edir. Onların arasında Böyük Britaniyanın
nüfuzlu Oksford Universiteti ilə beynəlxalq əməkdaşlığı
göstərmək olar.
Öz növbəsində, professor Mustafa Aydın Avrasiya
Universitetləri Şurasının fəaliyyəti barədə məlumat
verib. Onun sözlərinə görə, EURAS Avropa, Asiya və
Yaxın Şərqin 60 universitetindən ibarətdir. Qonaq qeyd
edib ki, Şuraya daxil olan təhsil müəssisələri öz
aralarında tələbə və müəllim mübadiləsi, konfranslar,
seminarlar, tədris proqramlarının işlənməsi üzrə
müxtəlif layihələr həyata keçirirlər.
Görüşdə həmçinin EURAS və MDU-nun Bakı filialı
arasında ikitərəfli əməkdaşlıq məsələlərinə toxunulub.
Sonda EURAS-ın rəhbəri Mustafa Aydın professor Nərgiz
Paşayevanı ali məktəb rektorları şurasının İstanbulda
keçiriləcək 4-ci forumuna dəvət edib. Forumda iştirak
edən universitet rəhbərləri ali məktəblər arasında
əməkdaşlığın inkişaf etdirilməsi məsələsini əsas məqsəd
kimi müzakirə edirlər.
Oruc MUSTAFAYEV,
“Azərbaycan müəllimi” |
