|
İnformasiya cəmiyyətinin müasir təhsilin qarşısında
qoyduğu məqsəd və vəzifələri getdikcə dəyişir, ənənəvi
metodlar innovasiyalarla əvəz olunur. Bu isə XXI əsr
şagirdlərinin intellektual səviyyəsinin inkişafını,
şagird fəaliyyətinin izlənməsini, ətraf mühitin
öyrənilməsi üçün tapşırıqların çoxalmasını nəzərdə tutur.
Layihə metodu prinsip etibarilə dünya pedaqogikasında
yenilik deyil. Bu, XX əsrin sonunda ABŞ-da meydana
gəlib (onu Problem metodu da adlandırırlar). Bu metod
amerikan filosofu və pedaqoqu C.Dyui və onun şagirdi
V.X.Kilpatrik tərəfindən irəli sürülmüş fəlsəfəyə və
təhsilin humanist ideyalarına əsaslanır. Layihə
metodunun əsas məqsədi- şagirdlərin idrak və yaradıcılıq
bacarıqlarının inkişafı, mənəvi dəyərləri dərk
etmələridir. Bu sonralar onlara müstəqil düşünsə, vacib
qərarlar qəbul etmək, ciddi problemləri tək və qrup
şəklində aradan qaldırmaq vərdişlərinin formalaşmasına
imkan yaradır. Tədris prosesində müəllimin rolu kifayət
qədər vacib və məsuliyyətlidir, lakin bununla yanaşı
ənənəvi metoddan fərqlidir. Bu metod şagirdlər arasında
daha çox sevilir. Xüsusilə ingilis dilinin tədrisində
bu metodun səmərəsi əvəzolunmazdır. Belə ki, dərs
dediyim şagirdlər Avropa ölkələrində yaşayan
həmyaşıdları ilə onlayn (online) görüşərək, birgə
işlədikləri layihələrin araşdırmalarını müqayisə edir,
həmkar yoldaşlarının fikirlərini dinləyir, eyni zamanda
dil vərdişlərini inkişaf etdirmiş olurlar.
Müəllim işlədiyim müddətdə şagirdlərimlə bir çox
layihələrdə iştirak etmişəm. Uğur qazanan layihələrimiz
sırasında "Castles and History" ("Qalalar və Tarix"), "Health
İssues among teenagers in European countries"("Avropa
ölkələrində yaşayan yeniyetmələrin sağlamlıq
problemləri"), "Let"s dress a European citizen"
("Gəlin, Avropa vətəndaşını geyindirək") şagirdlərin ən
çox əmək sərf etdiyi layihələrindəndir.
"Castles and History" layihəsinin əsas məqsədi həmkar
olan ölkələrin 3 qədim qalasının tarixini araşdırmaq,
tikilmə səbəblərini müəyyənləşdirmək, həmin qalalara
baş çəkmək, öyrəndiklərini qarşı tərəfin şagirdlərinə
təqdim etməkdən ibarət olmuşdur. Layihədə Polşa, Fransa,
İrlandiya və Yunanıstan şagirdləri əməkdaşlıq etmişlər.
Layihə bir il müddətində həyata keçirilmişdir. Dərs
dediyim VII sinif şagirdləri də avropalı
həmyaşıdlarına "Qız Qalası", "Gələrsən, görərsən"
qalaları və " Mərdəkan" qəsri haqqında tarixi
məlumatlar vermiş, eyni zamanda Fransanın "Castlenaud"
qəsri, İrlandiyanın "Blarney" qalası, Yunanıstanın "Monevmasia"
Qala şəhərciyinə virtual səfərlər etmişlər. Layihə
boyunca hazırlanan bütün təqdimatlar, şagirdlərin
hazırladıqları divar qəzetləri beş ölkənin ümumi görüş
yeri olan www.castlesandhistory.wweebly.com internet
səhifəsinə yerləşdirilmişdir. Ötən tədris ilində
şagirdlərimin "online" görüşləri olmuş, həmkar
məktəblilər öyrəndiklərini bir-biri ilə
paylaşmışlar. Bu da, öz növbəsində, dərs dediyim
şagirdlərin ingilis dilində sərbəst şəkildə öz
fikirlərini ifadə etməsinə, müstəqil düşüncə
bacarıqlarının inkişafına böyük təsir göstərmişdir.
Natəvan BƏDƏLOVA,
Bakıdakı Heydər Əliyev adına liseyin ingilis dili
müəllimi |
