|
 Tarixdə
indiyədək 14 min müharibə baş verib. Bu müharibələr
nəticəsində 3,5 milyard insan həlak olub. Təəssüflər
olsun ki, dünyanın bir sıra xalqları bu gün də
müharibələrdən əziyyət çəkir. Ermənistan-Azərbaycan,
Dağlıq Qarabağ münaqişəsi buna əyani sübutdur.
Azərbaycan 20 ildən artıqdır ki, bu ədalətsiz müharibəyə
cəlb edilib. Buna baxmayaraq ölkəmiz sülhməramlı siyasət
həyata keçirir. İstər 1994-cü ildə ümummilli liderimiz
Heydər Əliyevin atəşkəsin əldə olunması üçün ortaya
qoyduğu iradə, istərsə də Prezident İlham Əliyevin
torpaqlarımızın azad edilməsi üçün sülh yoluna sadiqliyi
bunun bariz nümunəsidir.
Gəncə Şəhər Təhsil İdarəsindən aldığımız məlumatda
bildirilir ki, bu fikirlər Azərbaycan Texnologiya
Universitetində Beynəlxalq Sülh Gününə həsr edilmiş
tədbirdə səslənib. Azərbaycanın müstəqilliyi və
torpaqlarımızın azadlığı uğrunda şəhid olmuş oğul və
qızlarımızın xatirəsi bir dəqiqəlik sükutla yad
edildikdən sonra universitetin rektoru, professor Akif
Süleymanov, eləcə də müəllim və tələbələr çıxış edərək
ikili standartlardan və dünyada baş verən müharibələrin
törətdiyi acı nəticələrdən danışıblar.
Sonda tədbir iştirakçıları universitetin həyətinə
gələrək havaya sülh rəmzi olan göyərçinlər buraxıblar. |
