|
 Fikrət
müəllim 75 illik ömür yolunun əlli ildən çoxunu şərəfli
peşəyə - müəllimliyə həsr edib. Bu sənətlə ucalıb və
yaşının kamillik çağına çatıb.
Fikrət Mövsüm oğlu Rəştiyev 1940-cı ildə Bakı şəhərində
anadan olub, 1958-ci ildə Yasamal rayonundakı 199
nömrəli orta məktəbi bitirmişdir. Elə həmin il APİ-nin
(indiki ADPU) fizika-riyaziyyat fakültəsinə daxil
olmuşdur. O, 1963-cü ildə ali məktəbi bitirdikdən sonra
Şabran rayonu Gilgiçay kənd orta məktəbində fizika
müəllimi kimi əmək fəaliyyətinə başlamışdır. 1965-ci
ilin sentyabr ayında təhsil aldığı ali məktəbin
"Fizikanın tədrisi metodikası" kafedrasında baş laborant
vəzifəsinə təyin edilmişdir. Müsabiqə yolu ilə 1967-ci
ildə müəllim, 1968-ci ildə isə baş müəllim vəzifəsinə
seçilmişdir. Pedaqoji fəaliyyətə başlarkən o, elmi
yaradıcılığa da böyük həvəs göstərmişdir. Fikrət müəllim
həmin dövrdə çox aktual olan televiziyadan tədris
prosesində istifadə edilməsinə çalışır, tədris
televiziyasının praktik problemləri üzərində işləyirdi.
Tədris televiziyasının imkanlarını və şagirdlərə təsir
xüsusiyyətlərini göstərmək üçün o, 1971-1976-cı illərdə
televiziya ilə orta məktəb şagirdləri üçün fizika
dərsləri aparırdı. O, öz tədqiqatlarının materiallarını
və nəticələrini orta məktəblərdə kütləvi şəkildə tətbiq
etmək, pedaqoji ictimaiyyəti maarifləndirmək məqsədilə
həmin dövrdə üç tədris vəsaiti nəşr etdirir. Bu uğurlu
fəaliyyətin məntiqi yekunu olaraq o, 1973-cü ildə "Televiziya
- orta məktəbdə fizikanın tədrisində təlim vasitəsi kimi"
mövzusunda namizədlik dissertasiyasını müvəffəqiyyətlə
müdafiə edərək pedaqoji elmlər namizədi alimlik dərəcəsi
almışdır. Fikrət müəllimə ötən əsrin 60-80-cı illərində
professor A.Abbaszadə, dosentlər B.Şəfizadə, B.Sultanov,
T.Xasməmmədov, Ə.Əhmədov, Ə.Axundov, Z.Osmanov və digər
görkəmli metodist- alimlərdən dərs almaq, onların bir
çoxu ilə çiyin - çiyinə işləmək xoşbəxtliyi nəsib
olmuşdur. Onların zəngin təcrübəsindən bəhrələndiyini
dəfələrlə qeyd edən Fikrət müəllim bu gün özü gənc
müəllimlərə örnək, təcrübə məktəbidir. Tükənməz enerjiyə
malik olan və pedaqoji fəallığı ilə seçilən gənc Fikrət
müəllimi institut rəhbərliyi 1972-ci ildə fizika
fakültəsinin dekan müavini vəzifəsinə irəli çəkmişdir.
O, 1975-ci ildə dosent vəzifəsinə seçilmiş, müəyyən
müddət FTM kafedrasının müdiri və dekan vəzifəsini icra
etmişdir.
Fikrət müəllim fizikanın tədrisi metodikası kafedrasının
"Fizikadan məktəb eksperimenti" laboratoriyasının
təkmilləşdirilməsində bu gün də öz yardımını əsirgəmir.
Bu məqsədlə son dövrdə Fikrət müəllimin laboratoriya
işlərinin aparılmasına dair yazdığı "Məktəb fizika
eksperimentinin texnologiyası" adlı metodik vəsaitini
misal göstərmək olar.
"Azərbaycanda fizikanın tədrisi metodikası elminin
inkişafı tarixi" mövzusunda ciddi və sistemli tədqiqat
aparan Fikrət müəllimin tapıntıları və
ümumiləşdirmələrinə aid respublika və beynəlxalq elmi
konfranslarda məruzələri, nəşr etdiyi məqalələri
pedaqoji ictimaiyyət maraqla qarşılamışdır. F.Rəştiyevin
fəaliyyətində gənclərlə işləmək, onlara qayğı göstərmək
xüsusi yer tutmuşdur. Hər il iki-üç tələbəsi TEC xətti
ilə səmərəli fəaliyyət göstərərək maraqlı məruzələr
hazırlayır və tələbə elmi konfranslarında
müvəffəqiyyətlə çıxış edirlər. O, bakalavr və
magistrlərin diplom və dissertasiya işlərinə bacarıqla
rəhbərlik edir. Müxtəlif proqlamların müəllifidir.
Fikrət müəllim 1989-1994-cü illərdə fizikanın tədrisi
metodikası ixtisası üzrə ixtisaslaşmış Müdafiə şurasının
üzvü olmuşdur. Şuranın üzvü kimi o, həmişə gənc
mütəxəssislərin elmi-metodik səviyyələrinin yüksəlməsinə
çalışmış və bir neçə namizədlik dissertasiyasının
müdafiəsində opponentlik etmişdir.
F.Rəştiyev Bakı şəhərinin bir sıra orta məktəblərinin
fizika müəllimləri ilə mütəmadi əlaqə saxlayır. Bu
görüşlər zamanı fizika fənninin tədrisi vəziyyətini,
məktəb fizika eksperimentinin təşkili, əyaniliyin
müxtəlif formalarından istifadə və s. məsələləri öyrənir
və onlara məsləhətlər verir. İlin demək olar ki, 4
ayını Bakının 13 nömrəli məktəbində gələcək
müəllimlərlə pedaqoji təcrübə aparır. Bu dövrdə hazırda
kurikulumla əlaqədar müəllimlərə müxtəlif tövsiyələr
verir. O, 10 il müddətində fakültə pedaqoji təcrübəsinin
rəhbəri olmuşdur.
Fikrət müəllim sovet dövründə "Bilik" cəmiyyəti xətti
ilə müxtəlif müəssisələrdə aktual mövzularda mühazirələr
oxumuş və həmin mühazirələr həmişə maraqla
dinlənilmişdir. Təsadüfi deyildir ki, o, respublika "Bilik"
cəmiyyətinin birinci dərəcəli fəxri fərmanı ilə təltif
olunmuşdur. Dəfələrlə səmərəli elmi-pedaqoji
fəaliyyətinə görə rektorluğun, həmçinin Təhsil
Nazirliyinin təşəkkür və fəxri fərmanlarına layiq
görülmüşdür.
Pedaqoji elmlər üzrə fəlsəfə doktoru, dosent F.Rəştiyev
gözəl ailə başçısıdır. İki övlad böyüdüb, tərbiyə
etmişdir, hər ikisi ali təhsillidir.
Yaradıcılığı ilə həyatı vəhdət təşkil edən Fikrət
Rəştiyev yüksək mənəvi keyfiyyətlərə malik bir
müəllimdir. O, tələbələrinə qarşı tələbkar, eyni zamanda
obyektiv olmaqla yanaşı, həm də səmimi və qayğıkeşdir.
Fizikanın tədrisi metodikası kafedrasında Fikrət
müəllimin özünəməxsus yeri vardır.
Ömrünün 76-cı ilinə qədəm qoyan Fikrət müəllim həyatı və
yaradıcılığının başqa bir mənalı dövrünü yaşayır. Ötən
75 ilin pilləsindən geriyə boylandıqda sevinməli, fəxr
etməli və düşünməli çox şey görünür. Bu ovqatla gözəl
insan, bacarıqlı alim Fikrət Rəştiyevi kollektivimiz
adından ürəkdən təbrik edir, ona cansağlığı, uzun ömür
və yeni yaradıcılıq uğurları arzulayırıq.
Mirzəli MURQUZOV,
fizika-riyaziyyat elmləri doktoru, professor, əməkdar
müəllim, "Şöhrət" ordenli,
Xəlil PADAROV,
pedaqogika üzrə fəlsəfə doktoru, dosent |
