|
Professorlar üçün yeni qərar
Azərbaycan Dövlət İqtisad Universitetində (UNEC)
çalışan professorların təcrübəsindən tədris və təlim
prosesində istifadə etmək, tədris və elmi proseslərdə
varisliyi təmin etmək, elmi-pedaqoji kadr hazırlığını
daha da yaxşılaşdırmaq məqsədilə məsləhətçi-professor
vəzifəsi yaradılıb.
UNEC-də 15 ildən yuxarı professor ştatında qüsursuz
çalışan və universitetin elmi-pedaqoji həyatında mühüm
xidmətləri olan 70 yaşdan yuxarı əməkdaşlar öz razılığı
ilə məsləhətçi-professor vəzifəsini tuta bilərlər.
Məsləhətçi-professor akademik və inzibati vəzifələrdən
azad olunacaq.
Məsləhətçi-professorlar kafedrada aparılan elmi-tədqiqat
işlərinə məsləhət verə, doktorantlara və iddiaçılara
elmi rəhbərlik edə, elmlər doktoru olmaq istəyən
tədqiqatçıların məsləhətçisi ola bilər. O cümlədən,
dərslik, dərs vəsaiti, proqram və digər tədris-metodik
materialların hazırlanmasında yaxından iştirak edə, rəy
verə bilər.
Məsləhətçi-professorlarla əmək müqaviləsi 5 il müddətinə
bağlanılır və onun vəzifə maaşı, əlavə ödənişlər, digər
güzəşt və imtiyazlar saxlanılmaqla professor-müəllim
heyətinin əməkhaqqı fondunun hesabına ödənilir.
Gənc müəllimlər işə başladı
Azərbaycan Dövlət İqtisad Universitetində (UNEC) "Gənc
müəllimlər" layihəsi çərçivəsində 10 gənc müəllim işə
başlayıb. "Gənc müəllimlər" layihəsinin məqsədi özünə
inanan, tələbələrlə işləməyə həvəs göstərən və
gələcəyini pedaqoji fəaliyyətdə görən ünsiyyətcil
gəncləri UNEC-ə cəlb etməkdir.
Yaşı 30-a qədər olan magistr təhsilli gənclər arasında
elan edilən müsabiqəyə 411 nəfər müraciət edib. Birinci
mərhələdə 117 nəfər seçilərək, növbəti - müsahibə
mərhələsinə dəvət olunub. Onların arasından seçilən 10
nəfər müəllim adını qazanıb.
Seçim zamanı xarici dil bilikləri olan, xaricdə təhsil
almış və çalışmış gənclərə üstünlük verilib. UNEC-də
gənc müəllimlərin seçimi davam edir.
"İqtisadçı Gənclər Akademiyası"
Azərbaycan Dövlət İqtisad Universitetində (UNEC)
"İqtisadçı Gənclər Akademiyası" yaradılıb. Akademiyanın
əsas məqsədi gənclərin iqtisadiyyatın müxtəlif
sahələrində elmi tədqiqat bacarıqlarının artırılması və
ictimaiyyət arasında təbliğidir.
Burada tələbələr iqtisadiyyatın müxtəlif sahələri üzrə
araşdırmalar aparacaq, yerli və xarici şirkətlərin
təcrübə proqramlarından yararlanacaqlar. Akademiyada
həmçinin gənclərin iqtisadi biliklərinin artırılması
məqsədi ilə elmi konfransların, "dəyirmi masa"ların,
seminarların keçirilməsi nəzərdə tutulur.
Akademiyanın sədri UNEC-in iqtisadiyyat və sənaye
fakültəsinin 3-cü kurs tələbəsi Hidayət Kərimovdur.
Marketinq və kommunikasıya departamenti |
