|
Prezident təqaüdçüsü İsa Məmmədli ilə söhbət
Sifai SƏFƏROVA,
"Azərbaycan müəllimi"
s.seferova@muallim.edu.az
 Məmmədli
İsa Elşad oğlu 25 sentyabr 1998-ci ildə Bakı şəhərində
anadan olub. 2015-ci ildə Bakıdakı 163 nömrəli tam
orta məktəbi əla qiymətlərlə bitirib. Tədris illəri
dövründə müxtəlif tədbirlərdə, o cümlədən bilik
yarışmalarında iştirak edib, məktəbdaxili tədbirlərin
aparıcısı, iştirakçısı, təşkilatçısı olub. Məktəbdə
fəaliyyət göstərən "Kiçik Akademiya"nın keçirdiyi bilik
viktorinalarında daim fəallıq nümayiş etdirib və
kapitanı olduğu komanda qələbə qazanıb. Tədris ocağının
"Şən və hazırcavablar" klubunda ədəbi-bədii,
vətənpərvərlik proqramlarının təşkilatçısı və
iştirakçılarından biri olub. 2013-cü ilin noyabrında "Qürur"
gənclərin vətənpərvərlik düşərgəsinin fəal
iştirakçılarından olub və diplomla mükafatlandırılıb.
TQDK-nın 2015-2016-cı tədris ili üzrə keçirilən qəbul
imtahanında ən yüksək nəticə göstərərək 700 balla
Bakı Ali Neft Məktəbinin (BANM) "Neft-qaz mühəndisliyi"
ixtisasına qəbul olub.
- İsa, yükün ağırlığını onu daşıyan hiss edir. Hamı
bilir ki, 700 bal toplamaq asan iş deyil, Burada əsasən
bilik, bəlkə bir az cəsarət də tələb olunur. Sən necə
düşünürsən?
- Tamamilə doğrudur. 700 ballıq nəticəni əldə etmək
üçün öncə bilikli və hökmən iradəli olmaq lazımdır. Amma
qarşına qoyduğun məqsədə çatmaq üçün çox
çalışmalısan. Gecən-gündüzün olmamalıdır. Mən də belə
etdim. Əvvəla təhsilimi davam etdirmək üçün qəbul olmaq
istədiyim ali məktəbi seçdim. Bundan sonra mənim üzərimə
düşən iş çoxlu mütaliə etmək və hazırlaşmaq idi.
Gündəlik hazırlıqlarda iştirak edib vaxtlı-vaxtında
dərslərimi oxudum. Hər gün 6-7 saat dərslərimlə məşğul
olurdum. İlk sınaq imtahanında nəticəm yüksək olsa da,
məni tam qane etməmişdi. Bildim ki, kifayət qədər
zəhmət çəkməmişəm. Dərslərimə daha çox vaxt ayırmağa
çalışdım. Hətta istirahət vaxtlarımı da təxirə
saldım. Qəbul gününə kimi çox uzun və zəhmətli yol
keçdim. Və sonda gördüyünüz kimi ən yüksək nəticəni
əldə edib istədiyim ali təhsil müəssisəsinə qəbul oldum.
Əziyyət çəkməyin, səbrli, iradəli və yalnız məqsədə
doğru irəliləməyin vacib olduğunu öncədən bilirdim.
Müəllimlərimin iddialı olduğuma görə mənə daha da çox
diqqət yetirməsi dərslərə olan marağımı və
məsuliyyətimi birə-beş artırdı, amma doğrusu 700 bal
toplaya biləcəyimə əmin deyildim. Daha çox çalışdıqca,
hədəflərim böyüyürdü. Sonda maksimum balı toplayaraq
hədəfimə çatdım.
- Ümumiyyətlə, imtahan çox məsuliyyətli bir prosesdir.
Burada biliyini ortaya qoymalısan, azca həyəcanlanmaq
xoşagəlməz nəticələr verə bilər. Sən özünə
güvənirdinmi?
- Qəbul imtahanından öncə sınaq imtahanlarında iştirak
etmək insanın gözünü açır. Onda çox sərbəst olursan,
yavaş-yavaş imtahan xofu canını tərk edir. Mən sınaq
imtahanlarının çoxunda 680 bala qədər nəticə əldə
etmişəm. Qəbul imtahanı keçirilən günü çox da həyəcanlı
deyildim, çünki özümə tam güvənirdim. Bilik yarışması
da eynilə idman yarışması kimidir, özünə güvənməsən
qalib gələ bilməzsən. Mən öz gücümə güvəndim və çoxları
üçün əlçatmaz olan arzumu reallaşdırdım, ölkədə az
sayda 700 bal toplayan tələbələrdən biri oldum. Bu
hissləri sözlə ifadə etmək çox çətindir.
- İxtisas seçimində sərbəst idin, yoxsa
valideynlərinin, müəllimlərinin təsiri oldu? Axı, başqa
ixtisas da seçə bilərdin...
- Yüksək keyfiyyətli ingilisdilli təhsil, müasir
texnologiyaların tətbiqi ilə tədris, işlə təminat,
xarici universitet və şirkətlərlə əlaqələr, həmçinin
ölkəmizdə neft sənayesində peşəkar mühəndislərə olan
tələbat və maraq haqqında çoxlu məlumat almışdım. Ona
görə də seçimim Bakı Ali Neft Məktəbi oldu. Amma
etiraf etməliyəm ki, məhz bu ali məktəbi seçməkdə öz
istəyimlə yanaşı, ailə üzvlərimin və müəllimlərimin də
təsiri oldu və peşiman deyiləm. Düzdür, seçimi özüm
etdim, ancaq onlar məni çox dəstəklədilər,
yanılmadığımı təsdiqlədilər.
- Ən böyük arzun nədir? Gələcəkdə özünü necə mütəxəssis
kimi görürsən?
- BANM-ə qəbul olmaq ən böyük arzum idi. Artıq bu
arzum gerçəkləşib. BANM-in tələbəsi adını qazanmaq mənim
üçün çox qürurverici və həyatımın ən unudulmaz anına
çevrilib. Əminəm ki, burada alacağım təhsil məni daha
yüksək zirvələrə aparacaq və Azərbaycanın ən öndə gedən
mütəxəssislərindən biri olacağam. Bundan sonrakı
arzumsa Bakı Ali Neft Məktəbində mükəmməl təhsil alaraq
irəlidəki hədəflərimə nail olmaqdır. Yüksək ixtisaslı
kadr kimi yetişmək, işimin peşəkarı və hər zaman ehtiyac
duyulan sahələrin mütəxəssisi olmaq, oxuduğum təhsil
ocağının adını yüksəklərə qaldırmaq arzusundayam.
Çalışacağam ki, gələcəkdə neft-qaz mühəndisi dedikdə
öncə mənim adım çəkilsin, dünyada azərbaycanlı mühəndis
kimi tanınaraq, ölkəmi beynəlxalq səviyyədə təmsil edim,
vətənimə başucalığı gətirim, onun dəyərli oğlu, layiqli
vətəndaşı olum. Bunun üçünsə də gecəmi-gündüzümə qatıb
çalışmalıyam. Arzu o vaxt reallaşır ki, ona çatmaq üçün
əziyyət çəkəsən, özü də lap çox əziyyət. Mən bu
məsuliyyəti dərindən dərk edirəm.
- Artıq bir müddətdir ki, dərs ili başlayıb. Dünənki
şagird İsa bu gün tələbə İsadır. Tədris ocağı,
müəllimlər, tələbə yoldaşların, dərsliklər,
ümumiyyətlə, tamam başqa bir aləmdəsən. Yeni
kollektivə uyğunlaşa bilirsənmi? Yoxsa az da olsa
narahatlıq var?
- Zərrəcə narahatçılığım yoxdur. Qrup yoldaşlarımla elə
ilk gündən dostlaşdıq. Qəbul imtahanlarından yüksək bal
toplamağım burada da diqqətdən yayınmır. Rektorumuz
məni uğurlarıma görə çox dəyərləndirir. Müəllimlər dərs
zamanı ən çətin tapşırıqların həllini mənə yönəldir,
mən də təsadüf nəticəsində yüksək bal qazanmadığımı
sübut etməyə çalışıram. Bir sözlə, özümü burada çox
rahat hiss edirəm. Amma bir gün olsun belə təhsil
aldığım tam orta məktəbi, sevimli müəllimlərimi və
şagird yoldaşlarımı, dostlarımı unutmuram. Ali məktəb
başqa aləmdirsə, on bir il təhsil aldığın tam orta
məktəb həyatımın mayasıdır. Gələcəkdə qazandığım bütün
uğurlara görə o müqəddəs məbədgahıma borclu olacağam.
Onun divarları da mənim üçün doğmadır.
Bu sözləri deyərkən, İsa kövrəldi, ən əziz, ən doğma
bir məkandan əbədi ayrılıq onun saf, kövrək qəlbinin
zərif tellərini sızıldatdı. Bu an mən də kövrəldiyimi
gizlədə bilmədim, çoxdan ayrıldığım doğma ocağın
həsrətini yaşayıb tələbə İsaya uğurlar arzulayıb
xoş təəssüratla ayrıldım. |
