|
 Sentyabrın
23-də Azərbaycan Texniki Universitetində (AzTU) Avropa
Komissiyasının TEMPUS layihəsinin yekunlarına həsr
olunmuş konfrans keçirilib.
Universitetin mətbuat xidmətindən AZƏRTAC-a bildiriblər
ki, tədbirdə AzTU-nun rektoru, professor Havar Məmmədov
"Azərbaycan üçün mühəndis təhsilində tədrisin Bolonya
prosesinə uyğunlaşdırılması" mövzusunda Avropa
Komissiyasının TEMPUS layihəsinin yekunlarından danışıb.
Rektor bildirib ki, bu əhəmiyyətli layihənin
müvəffəqiyyətlə başa çatması universitetdə
yüksəkixtisaslı mühəndis kadrların hazırlanması
prosesini təkmilləşdirməyə xidmət edir.
Rektor vurğulayıb ki, Avropa İttifaqının Təhsil və
Mədəniyyət üzrə Komissiyasının ilk layihələrindən biri
2001-2003-cü illərdə AzTU-da yerinə yetirilib. Bu layihə
Almaniyanın Köln və Hollandiyanın Heerlen Tətbiqi Elmlər
Universiteti ilə birgə həyata keçirilib. Həmin layihə
Azərbaycan Texniki Universitetində "Elektrotexnika
fakültəsində tədrisin müasirləşdirilməsi" mövzusunda
reallaşdırılıb. Layihə çərçivəsində Avropa
standartlarına uyğun bakalavr və magistr təhsil
səviyyəsində elektroenergetika, avtomatika və
informasiya texnikası və avtomobillərin elektrik və
elektron avadanlıqları ixtisasları üzrə kadr hazırlığı
həyata keçirilib. Universitetdə TEMPUS Mərkəzi
yaradılıb, müəllimlər seçilib və alman dili intensiv
kursları təşkil edilib. Müəllimlər Almaniyanın Köln və
Hollandiyanın Heerlen Tətbiqi Elmlər Universitetinə ezam
olunublar. Bu universitetlərin təcrübəli əməkdaşları
layihəyə cəlb olunub və AzTU-nun müəllimləri ilə birgə
iş aparıblar. Nəticədə Avropa standartlarına uyğun
elektroenergetika, avtomatika və informasiya texnikası
və avtomobillərin elektrik və elektron avadanlıqları
bakalavr ixtisaslarının tədris planları hazırlanıb. Hər
üç ixtisas üzrə tərəfdaş universitetlərin iştirakı ilə
müasir tədris laboratoriyaları yaradılıb.
Avropa Komissiyasının monitorinq qrupu bu layihə üzrə
görülmüş işləri müsbət dəyərləndirib və əldə edilən
nəticələrin Azərbaycanın digər ali məktəblərində tətbiq
olunmasını tövsiyə edib.
Hazırda Azərbaycan Texniki Universitetində yerinə
yetirilən TEMPUS layihəsi üzrə bakalavr təhsil
səviyyəsində iki ixtisasda 60 bakalavr və dörd
magistrant təhsil alır.
Konfransda təhsil nazirinin müavini Ceyhun Bayramov
çıxış edərək deyib ki, Prezident İlham Əliyevin müvafiq
Sərəncamı ilə təsdiqlənmiş "Azərbaycan 2020: gələcəyə
baxış" İnkişaf Konsepsiyası və "Azərbaycan
Respublikasında təhsilin inkişafı üzrə Dövlət
Strategiyası" kimi mühüm dövlət sənədlərində Azərbaycan
təhsilinin dünya və Avropa təhsil məkanına
inteqrasiyasının gücləndirilməsi, təhsil standartlarının
unifikasiyası və Bolonya prosesinin dərinləşdirilməsi
ilə yanaşı, Azərbaycan təhsil ocaqlarının, xüsusilə də
ali təhsil müəssisələrinin beynəlxalq əlaqələrinin
genişləndirilməsi, onların təhsil sahəsində həyata
keçirilən beynəlxalq proqramlara cəlb olunması
əhəmiyyətli yer tutur.
Avropa İttifaqı nümayəndə heyətinin rəhbəri xanım Malena
Mard, Almaniya Federativ Respublikasının Azərbaycandakı
səfirinin müavini Schoenfeld, layihənin
əlaqələndiricisi, Köln Texniki Universitetinin
professoru Reza Talebi-Dəryani, Azərbaycanda
Erasmus+proqramlar ofisinin rəhbəri Pərviz Bağırov
konfransda çıxış edərək Azərbaycan Respublikası ali
məktəblərində Avropa Komissiyasının TEMPUS layihəsi ilə
bağlı görülmüş işlərin əhəmiyyətindən danışıblar.
Köln Texniki Universitetinin (KTU) sabiq prezidenti,
professor İoaxim Maysner AzTU-nun rektoru, professor
Havar Məmmədova Avropa Komissiyasının TEMPUS layihəsinin
həyata keçirilməsi istiqamətində göstərdiyi xidmətlərə
görə KTU-nun senatı tərəfindən təsis olunmuş qızıl
xatirə medalını təqdim edib.
TEMPUS layihəsində qarşıya qoyulan məqsədlərin uğurla
yerinə yetirilməsinə görə Avropa İttifaqının
Akkreditasiya Agentliyi tərəfindən Azərbaycan Texniki
Universitetinə, Azərbaycan Dövlət Neft və Sənaye
Universitetinə və Sumqayıt Dövlət Universitetinə iki
bakalavr və üç magistr ixtisası üzrə akkreditasiya
sertifikatları təqdim olunub. |
