|
 Respublikamızın
hər yerində olduğu kimi, Bakıdakı 108 nömrəli tam orta
məktəbdə də yeni dərs ilinin başlanması münasibətilə
tədbir keçirildi. Azərbaycanın Dövlət himninin
səsləndirilməsi ilə başlayan tədbiri açan məktəbin
direktoru Narınc Mehdiyeva pedaqoji kollektivi,
şagirdləri, onların valideynlərini 15 sentyabr - Bilik
günü münasibətilə təbrik etdi. Bildirdi ki, ötən tədris
ili məktəbimiz üçün uğurlu olmuşdur. Belə ki, məktəbin
ötənilki məzunlarının 73 faizi müxtəlif ali təhsil
ocağına qəbul olunub. Məhz bu amilə görə, hər il olduğu
kimi, bu il də birinci sinfi bizim məktəbdə oxumaq
istəyənlərin sayı artıb.
Məktəbin direktoru N.Mehdiyeva Azərbaycan Prezidenti
İlham Əliyevin rəhbərliyi ilə ölkəmizdə aparılan uğurlu
iqtisadi-siyasi islahatlardan, dövlətimizin digər
sahələrlə yanaşı təhsilə göstərdiyi qayğıdan ətraflı
bəhs etdi. Vurğulandı ki, ölkəmizin ən ucqar yerində
belə hazırda yeni məktəb binaları tikilir, köhnə
məktəblər təmir olunur, müasir sinif otaqları istifadəyə
verilir. Bütün bunlar, o cümlədən Təhsil Nazirliyinin
son illər apardığı məqsədyönlü islahatlar təhsilin
keyfiyyətinin yüksəldilməsinə xidmət edir.
Qeyd edildi ki, 108 nömrəli məktəb son illər qəsəbənin
nümunəvi məktəblərindən birinə çevrilmişdir. Hər il
məktəbdə bir sıra yeniliklər tətbiq edilir. Cari ildə
məktəb rəhbərliyinin təşəbbüsü ilə bütün müəllimlərin
vahid formada-uniformada dərs aparmaları kollektiv
tərəfindən müsbət qarşılanıb. Təhsil və tədrisin ən
müasir yeniliklərini tətbiq edən bu təhsil ocağının
Maştağa qəsəbəsində müəllimlərin vahid formaya keçən
ilk məktəb olduğu vurğulandı.
Maştağa bələdiyyəsinin sədri İlqar Qurbanov da çıxışında
yeni dərs ilinin başlaması münasibətilə bu il məktəbə
ilk addımlarını atan birinciləri, valideynləri, həmçinin
pedaqoji kollektivi təbrik etdi, onlara elmin sirlərinə
yiyələnmələrində var qüvvələri ilə çalışmağı arzuladı.
Sonda ilk zəng sədaları altında şagirdlər sinif
otaqlarına keçdilər. İnanırıq ki, bu gün məktəb
yollarında ilk kövrək addımlarını atan şagirdlərin
sırasından gələcəyin müəllimi, həkimi, mühəndisi və sair
ixtisas sahibləri yetişəcək. Yolunuz açıq olsun, əziz
məktəblilər!
Samirə DADAŞOVA,
Bakıdakı C.Nurməmmədov adına 108 nömrəli tam orta
məktəbin
Azərbaycan dili və ədəbiyyat müəllimi |
