|
Gəncənin inkişafında şəhərin təhsil işçilərinin payı
çoxdur
 Sentyabrın
10-da keçirilən Gəncə şəhər təhsil işçilərinin
konfransında son bir ildə qazanılan uğurlar, mövcud olan
problemlər geniş təhlil edilib.
Gəncə Şəhər Təhsil İdarəsinin müdiri Zakir Hüseynov
məruzəsində bildirib ki, bu gün müasir Azərbaycan
dövlətinin dünyanın ən inkişaf etmiş dövlətləri ilə bir
sırada adının çəkilməsi, artıq ənənə halını almış
beynəlxalq səviyyəli tədbirlərə ev sahibliyi etməsi,
iqtisadiyyatın dayanıqlı və dinamik inkişafı ulu öndər,
müstəqil Azərbaycanın memarı Heydər Əliyevin adı ilə
bağlıdır. Bu inkişaf və tərəqqinin sürətlə davam
etdirilməsi məhz Heydər Əliyev siyasi kursunun
qətiyyətli və layiqli davamçısı möhtərəm Prezidentimiz
cənab İlham Əliyevin uzaqgörən siyasətinin verdiyi
töhfədir. Möhtərəm Prezidentimiz İlham Əliyevin diqqət
və qayğısının nəticəsidir ki, şəhərimizdə aparılan
quruculuq və abadlıq işlərində təhsil müəssisələrinin
payı daha çoxdur.
Ötən il oktyabr ayının 18-də Azərbaycan Respublikasının
Prezidenti cənab İlham Əliyevin qədim Gəncəyə tarixi
səfərini, səfər çərçivəsində Mehdi Mehdizadə adına 4
nömrəli tam orta məktəbin yeni tədris binasının
açılışını etməsini xatırladan məruzəçi həmin görüşü
şəhərin çoxminli təhsil işçilərinin yaddaqalan gün kimi
xatırladığını söyləyib.
Bildirilib ki, ötən tədris ilində 4, 26 və 40 nömrəli
tam orta məktəblərin əsaslı təmirindən sonra açılışı
olub, sanatoriya tipli internat məktəbin, 14, 41 və 44
nömrəli tam orta məktəblərin əsaslı təmir işləri davam
etdirilir. 39 nömrəli tam orta məktəbdə 1200 şagird
yerlik yeni tədris binasının inşası tamamlanmaq üzrədir.
24 dekabr 2014-cü il tarixdə ən müasir standartlara
cavab verən Gəncə Şəhər Təhsil İdarəsinin yeni inzibati
binası istifadəyə verilib.
Məruzədə qeyd olunub ki, 2014-2015-ci dərs ilində Gəncə
Şəhər Təhsil İdarəsinin tabeliyində ümumi təhsil həyata
keçirən 46 tam orta, 2 ümumi orta və 1 xüsusi məktəb
fəaliyyət göstərib. Bu məktəblərdə 37714 nəfər şagird
təhsilə cəlb olunub, onların təlim-tərbiyəsi ilə 3989
nəfər müəllim məşğul olub.
Ötən dərs ilində məktəblərin XI siniflərini bitirən
2478 nəfər şagirdin hər biri tam orta təhsil haqqında
attestat, IX sinfi bitirən 2861 nəfər şagirdin hər biri
ümumi orta təhsil haqqında şəhadətnamə alıb.
Əvvəlki illərdən fərqli olaraq 2014-2015-ci tədris
ilində 2 nəfər məzun qızıl, 1 nəfər isə gümüş medala
layiq görülüb.
Tələbə Qəbulu üzrə Dövlət Komissiyasının statistik
məlumatına əsasən 2014-2015-ci tədris ilinin
məzunlarından 1850 nəfəri ali məktəblərə sənəd təqdim
edib. Onların 935 nəfəri, yəni 50,54 faizi
respublikamızın ali məktəblərinə qəbul olub. Bunlardan
başqa, 104 nəfər abituriyent 11 illik təhsil bazasından
orta ixtisas təhsili müəssisələrinə daxil olub. 39
nəfər xüsusi təyinatlı məktəblərə qəbul olub. Ali
məktəblərə qəbul olanların 220 nəfəri 500-dən yuxarı bal
toplayıb, bunlardan 6 nəfəri ötən ilin məzunlarıdır. 74
nəfəri 600-dən, 31 nəfər isə 650 baldan yuxarı nəticə
göstərib. 1 nömrəli tam orta məktəbin məzunu Elçin
Qasımov ən yüksək, yəni 700 bal toplayaraq Qafqaz
Universitetinə daxil olub.
Məruzəçi şəhərin təhsil ocaqlarında oxuyan şagirdlərin
idman uğurlarına da toxunub. Bildirib ki, ötən dərs ili
ərzində təhsil idarəsinin tabeliyində 8 məktəbdənkənar
müəssisə fəaliyyət göstərib. Gəncə şəhərinin yetirməsi
Toğrul Əsgərov "Bakı -2015" I Avropa Oyunlarında sərbəst
güləş üzrə birinci yerə çıxaraq qızıl medala layiq
görülüb.
Uşaq-Gənclər Şahmat Dama Məktəbinin yetirməsi, 29
nömrəli tam orta məktəbin I sinif şagirdi Leyla Budaqova
6-15 may 2015-ci il tarixində Tailandın Pattaya
şəhərində keçirilən şahmat üzrə məktəblilərin dünya
birinciliyində iki qızıl medal qazanıb. Beynəlxalq usta
Ayaz Məmmədov Türkiyədə keçirilən Troya Beynəlxalq
şahmat turnirinin gümüş mükafatçısı olub.
1 nömrəli Uşaq-Gənclər İdman Məktəbinin direktoru Ceyhun
Bayramov Bakıda keçirilən I Avropa Oyunlarında sambo
idman oyunlarına hakimlik edib. İdman məktəbinin
yetirmələri 8 qızıl, 4 gümüş və 1 bürünc medal əldə
ediblər.
Uşaq-Gənclər Fiziki Hazırlıq Klubunun direktoru Ramil
Qasımov ABŞ-ın Kolorado ştatının Sprinq şəhərində
keçirilən yarışda qızıl medal qazanıb.
Uşaq Yaradıcılıq Mərkəzi "Uşaqların və gənclərin ən
yaxşı yaradıcılıq işləri" Respublika müsabiqəsinə şəhər
mərhələsində I yerə layiq görülüb.
Z.Hüseynov deyib ki, Gəncə Şəhər Təhsil İdarəsində
fəaliyyət göstərən Təhsil Resurs Mərkəzi müəllimlərin,
psixoloqların və kitabxanaçıların ən çox müraciət
etdiyi bir məkana çevrilib. Son dövrlərdə burada
müxtəlif mövzularda seminarlar keçirilir, "açıq dərs"lər
təşkil olunur, dayaq məntəqələrinin işi canlandırılır,
müəllimlərin ixtisasartırmaları təşkil olunur.
Xüsusilə yeni fənn kurikulumlarının tətbiq olunduğu
siniflərdə işləyən müəllimlər Metodiki Mərkəzin
xidmətindən yararlana bilirlər. "Kurikulum islahatı üzrə
icra planı"nda nəzərdə tutulan tədbirlər ardıcıllıqla
həyata keçirilib. 2015/2016-cı tədris ilində şəhərimizin
I-VIII sinif müəllimlərindən 288 nəfəri "Mədəd
Azərbaycan" MMC, "Təlim-İnkişaf" Mərkəzi, "UNİVERSAL"
ƏlavəTəhsil Mərkəzi və "UNİKAL-1 MMC" təşkilatları
tərəfindən aparılan kurslardan keçib və sertifikat alıb.
Z.Hüseynov məruzəsinin sonunda yeni dərs ilində uğurları
daha da artıracaqlarına inamını ifadə edib.
Konfransda çıxış edən Təhsil Problemləri İnstitutunun
direktoru, hüquq üzrə fəlsəfə doktoru Qulu Novruzov
müasir dövrdə ölkə təhsilində aparılan islahatlardan,
təhsilin ayrı-ayrı istiqamətləri üzrə reallaşdırılan
layihələrdən, təhsilin inkişafı üzrə Dövlət
Strategiyasında qarşıya qoyulan vəzifələrdən, Azərbaycan
dövlətinin, ölkə Prezidenti İlham Əliyevin təhsilə
göstərdiyi diqqət və qayğıdan danışıb, Gəncənin təhsil
işçilərini yeni dərs ili münasibəti ilə təbrik edib.
Gəncə Şəhər İcra Hakimiyyətinin başçısı Elmar Vəliyev
konfransda çııxış edərək son illər təhsildə qazanılan
uğurları dövlət qayğısının nəticəsi kimi dəyərləndirib.
Şəhərdə təhsilin inkişafı, onun maddi-texniki bazasının
möhkəmləndirilməsi istiqamətində həyata keçirilən və
keçirilməsi nəzərdə tutulan işlərdən danışıb. Keçən
tədris ilində buraxılan nöqsanların aradan qaldırılması
üçün tapşırıq və tövsiyələrini verib. Qazanılan
uğurlara görə pedaqoji kollektivləri təbrik edərək
onlara yeni dərs ilində uğurlar arzulayıb.
Konfransın sonunda yüksək balla ali məktəblərə daxil
olan gənclər bir daha təbrik edilib. Onlara hədiyyələr
təqdim olunaraq təhsildə və gələcək fəaliyyətlərində
uğurlar arzu edilib.
133 məzun 600-dən çox bal toplayıb
 Sumqayıt
Şəhər Təhsil Şöbəsindən aldığımız məlumata görə, şəhər
təhsil işçilərinin sentyabr konfransında ŞTŞ
metodkabinetinin direktoru Sabir Məmmədov məruzə edib.
2014-2015-ci dərs ilinin yekunlarını təhlil edən
məruzəçi yeni dərs ilində qarşıda duran vəzifələrdən
danışıb. Bildirilib ki, ötən dərs ilində Sumqayıt
məktəblərində əsaslı təmir işləri aparılıb. 11 nömrəli
məktəbdə təmirin yekunlaşmaq üzrə olduğunu deyən
S.Məmmədov 7 nömrəli və orta ümumtəhsil internat
məktəblərində işlərin davam etdiyini bildirib. Bu işlər
başa çatdıqdan sonra şəhər üzrə əsaslı təmir edilmiş
məktəblərin sayı 16-ya çatacaq.
Vurğulanıb ki, şagirdlərin biliyinin yoxlanması və
qiymətləndirilməsi ilə bağlı təhsil müəssisələrində
ciddi iş aparılıb, bütün məktəblərdə monitorinqlər
təşkil edilib. Eyni zamanda, 2015-ci ildə məzunların ali
məktəblərə qəbul göstəriciləri geniş təhlil edilib,
bununla bağlı reytinq cədvəlləri hazırlanıb. Qeyd olunub
ki, builki qəbul imtahanlarında şəhər ümumtəhsil
məktəblərinin 133 nəfər məzunu 600-dən çox bal toplayıb.
Onlardan 38 nəfərinin göstəricisi 650 baldan yuxarıdır.
Ümumilikdə ali məktəblərə sənəd verən 2504 nəfər
abituriyentin 1447 nəfəri tələbə adını qazanıb.
Buraxılış imtahanlarının nəticələrinə əsasən 5 nəfər
məzun qızıl medalla təltif edilib.
Qeyd olunub ki, ötən dərs ilində şagirdlərin
hərbi-vətənpərvərlik tərbiyəsinə həsr edilmiş tədbirlər,
istedadlı şagirdlərin üzə çıxarılması ilə bağlı
müsabiqələr, müxtəlif idman yarışları keçirilib.
Məruzəçi onu da söyləyib ki, əldə edilən uğurlarla
yanaşı, bir sıra problemlər də mövcuddur. O,
çatışmazlıqların yeni tədris ilində aradan
qaldırılmasına ciddi səylər göstəriləcəyini bildirib.
Məruzə ətrafında çıxış edənlər ölkədə aparılan təhsil
islahatlarından, təhsilin keyfiyyətinin
yaxşılaşdırılması istiqamətində görüləcək işlərin
zəruriliyindən danışıblar.
Təhsil Nazirliyinin Məktəbəqədər və ümumi təhsil
şöbəsinin müdiri Aydın Əhmədov məlumat verib ki, yeni
tədris ilində 141 adda 4 milyon ədəd dərslik çap olunub.
Nazirlik rəsmisi təhsil sahəsində əldə edilən uğurlarla
yanaşı, çatışmazlıqların da olduğuna diqqət çəkib.
Bildirib ki, tədris planlarının hazırlanması, eləcə də
təhsillə bağlı olan normativ aktlar məktəb rəhbərləri
tərəfindən düzgün mənimsənilmir. Buna görə də məktəb
direktorları daha məsuliyyətli və diqqətli olmalıdırlar.
Sumqayıt Şəhər İcra Hakimiyyətinin başçısı Zakir Fərəcov
çıxış edərək pedaqoji kollektivi yeni tədris ilinin
başlanması münasibətilə təbrik edib, gələcək
fəaliyyətlərində uğurlar arzulayıb. Z.Fərəcov Sumqayıtın
təhsil sahəsində bir sıra uğurlara imza atdığını və bu
ənənələrin davam etdiriləcəyinə əminliyini vurğulayıb.
Daha sonra 600-dən çox bal toplayaraq ali məktəblərə
qəbul olan 39 tələbəyə qiymətli hədiyyələr, şəhərin 50
müəlliminə isə icra hakimiyyətinin fəxri fərmanları
verilib.
Siyəzəndə
bu tədris ilində 20 gənc müəllim işə başlayıb
Siyəzən şəhər Mədəniyyət Mərkəzində təhsil işçilərinin
ənənəvi sentyabr konfransı keçirilib. Konfransda rayon
təhsil şöbəsinin müdiri Rəfail Hacıyev "2014-2015-ci
dərs ilinin yekunları və yeni dərs ilində qarşıda duran
vəzifələr" mövzusunda geniş məruzə edib. Qeyd edilib ki,
əsası ulu öndər Heydər Əliyev tərəfindən qoyulmuş təhsil
islahatları möhtərəm Prezidentimiz cənab İlham Əliyev
tərəfindən uğurla davam etdirilir. Bu islahatlar bütün
respublikamızda olduğu kimi Siyəzən rayonunda da uğurla
həyata keçirilir.
Diqqətə çatdırılıb ki, 2014-2015-ci dərs ilində Siyəzən
rayonunun ümumtəhsil məktəblərində 5779 nəfər şagird
təhsil alıb, onların təlim-tərbiyəsi ilə 720 nəfər
müəllim məşğul olub. 2015-ci ildə 20 nəfər gənc müəllim
müvafiq müsabiqədən keçərək rayonun müxtəlif
məktəblərində öz ixtisasları üzrə işləmək hüququ
qazanıb. Siyəzən şəhər 6 nömrəli tam orta məktəbin
müəllimi Tatyana Səlimova ölkə Prezidentinin sərəncamı
ilə "Əməkdar müəllim" fəxri adına layiq görülüb. Siyəzən
şəhər 1 nömrəli tam orta məktəbi "Ən yaxşı ümumtəhsil
məktəbi" və Siyəzən şəhər 2 nömrəli tam orta məktəbin
riyaziyyat müəllimi Aynurə Dadaşova "Ən yaxşı müəllim"
müsabiqəsinin qalibi olub.
Konfransda buraxılış və qəbul imtahanlarının nəticələri
haqqında geniş məlumat verilib. Qeyd olunub ki, XI
sinfi bitirmiş 369 məzundan 250 nəfəri qəbul
imtahanlarında iştirak edib, onlardan 94 nəfəri ali
məktəblərə daxil olub. Bundan əlavə, 3 nəfər hərbi
yönümlü ali təhsil ocaqlarının, 6 nəfər isə xarici
ölkələrin ali məktəblərinin tələbəsi olub. Məzunlardan
11 nəfəri 500-dən, 6 nəfəri isə 600-dən yuxarı bal
toplayıb. Konfransda 600-dən çox bal toplamış həmin
məzunlara fəxrı fərman və pul mükafatları verilib. Rayon
məktəblərinin 8 müəllimi də Siyəzən Rayon Təhsil
Şöbəsinin fəxri fərmanları isə təltif olunub.
Konfransda Siyəzən şəhər 1 nömrəli tam orta məktəbin
direktoru Nəcməddin Mürvətov, gənc müəllim
Tamerlan Qurbanov, məzun Abdulla Abdullayev çıxış
edərək təhsilimizə göstərilən dövlət qayğısından,
əldə olunmuş nailiyyətlərdən danışıblar.
Konfransda iştirak edən Təhsil Nazirliyinin şöbə müdiri
Faiq Şahbazov hazırda respublikamızda təhsil sahəsində
aparılan genişmiqyaslı işlər, regionlarda müəllimlərin
sınaq qiymətləndirilməsinə hazırlıq işlərinin
aparılması, hesabatların yeni qəbulu sistemi, təhsilin
inkişafı üzrə Dövlət Strategiyasının həyata keçirilməsi
məsələləri, dərslik siyasəti və bir sıra digər
məsələlər haqqında geniş məlumat verib.
Siyəzən Rayon İcra Hakimiyyətinin başçısı Arif Qasımov
rayon müəllimlərini yeni dərs ili münasibəti ilə təbrik
edərək bildirib ki, müəllimlərə, xüsusilə gənc
müəllimlərə hər cür qayğı göstərmək hər bir aidiyyəti
şəxsin borcudur. O həm gənc müəllimlərə, həm də
ehtiyacı olan tələbə və şagirdlərə daim diqqət
göstəriləcəyini qeyd edib.
Bir qrup gəncə mükafatlar verilib
Sentyabrın 12-də Pirallahı Rayon İcra Hakimiyyətinin
təşkilatçılığı ilə 243 nömrəli tam orta məktəbdə təhsil
işçilərinin konfransı keçirilib.
Əvvəlcə 100 nəfərdən çox şagirdə məktəbli forması
paylanıb.
2014-2015-ci tədris ilinin yekunlarına və yeni tədris
ilinin başlanmasına həsr edilən tədbirdə təhsil işçiləri
ilə yanaşı, müvafiq qurumların nümayəndələri, həmçinin
bu il ali məktəblərə keçirilmiş qəbul imtahanlarında
yüksək bal toplamış gənclər də iştirak ediblər.
Pirallahı Rayon İcra Hakimiyyəti başçısının müavini
Vəzir Səfixanov çıxış edərək ümummilli lider Heydər
Əliyevin təhsilə daim böyük önəm verdiyini, ulu öndərin
siyasətinin Prezident İlham Əliyev tərəfindən uğurla
davam etdirildiyini bildirib.
Eyni zamanda, rayonun təhsil müəssisələrinin fəaliyyəti
barədə ətraflı məlumat verilib. Qeyd edilib ki, rayonda
fəaliyyət göstərən ümumtəhsil müəssisələrində 2 min
400-ə yaxın şagirdin təlim-tərbiyəsi ilə 247 müəllim
məşğul olur. Orta məktəblər müvafiq Dövlət Proqramına
uyğun olaraq əsaslı təmir edilib, həmçinin müasir
avadanlıqlarla təchiz olunub. 2014-cü ildə əsaslı təmir
olunmuş 168 nömrəli tam orta məktəb üçün bu il 300
şagird yerlik tədris korpusu tikilərək yeni dərs ilinə
istifadəyə verilib. 235 nömrəli tam orta məktəbin cari
təmiri, təhsil müəssisəsi üçün 6 əlavə sinif otağının,
yeməkxana, idman zalının və kitabxananın tikintisi
nəzərdə tutulub.
235 nömrəli tam orta məktəbin direktoru Tahir Süleymanov,
186 nömrəli tam orta məktəbin direktoru Arif Xankişiyev
və başqaları ümummilli lider Heydər Əliyevin təhsil
sahəsinə göstərdiyi xüsusi diqqət və qayğıdan bəhs edib,
dahi rəhbərin ideyalarının Prezident İlham Əliyev
tərəfindən əzmlə həyata keçirildiyini vurğulayıblar.
Sonra Pirallahı Rayon İcra Hakimiyyəti tərəfindən bu il
qəbul imtahanlarında yüksək bal toplayaraq tələbə adı
qazanmış gənclərə mükafatlar verilib.
Hazırladılar: Yusif ƏLİYEV,
Şakir CƏFƏROV,
"Azərbaycan müəllimi" |
