|
 London
Universiteti/London İqtisadiyyat Məktəbinin (LSE)
bakalavr proqramının Azərbaycan Dövlət İqtisad
Universitetində (UNEC) dərsləri başlanıb.
Qeyd edək ki, London Universiteti / London İqtisadiyyat
Məktəbinin bakalavr proqramında birinci kursu bitirmiş,
ümumi orta müvəffəqiyyət göstəricisi 80 baldan çox olan
və ingilis dili tələblərinə cavab verən (IELTS - 6.0,
TOEFL - 87, PTE Academic - 57) 6 tələbə təhsil alır.
Tələbələrin bakalavr proqramına qəbulunu LSE həyata
keçirib.
UNEC-in rektoru, professor Ədalət Muradov gəncləri
dünyanın ən qabaqcıl iqtisadiyyat yönümlü ali məktəbinin
proqramı üzrə dərslərə başlamaları münasibəti ilə təbrik
edib. Bildirib ki, burada tələbələr London
Universitetinin tədris proqramı əsasında təhsil almaqla
yanaşı, bu nüfuzlu təhsil ocağının tədris resurslarından
da istifadə edə biləcək, London İqtisadiyyat Məktəbinin
Londonda yerləşən kampusunda fəaliyyət göstərən Yay
Məktəbinə qatılacaqlar. Rektor qeyd edib ki, tələbələrin
UNEC-lə bərabər LSE-nin bakalavr diplomunu da əldə
etmələri onları əmək bazarında rəqabətə davamlı kadra
çevirəcək.
İlk dərsi London Universiteti / London İqtisadiyyat
Məktəbinin (LSE) bakalavr proqramının UNEC-dəki tədris
işləri üzrə direktoru Tayson Lemons keçib. T.Lemons
tələbələrə LSE-də tədris prosesinin üstünlüklərindən söz
açıb. Bildirib ki, tədris proqramının tərtibi, təhsilin
keyfiyyət parametrlərinə nəzarət və tədris prosesinin
idarə olunmasını birbaşa London Universiteti həyata
keçirəcək. LSE-nin hazırkı kurikulumuna uyğun olaraq,
hər tədris ilində dörd fənn olmaqla, üç il ərzində 12
əsas fənn tədris ediləcək. Bu fənlər üzrə yekun
imtahanlar hər tədris ilinin sonunda (may -iyun
aylarında) keçiriləcək və nəticələr qiymətləndirilmək
üçün LSE-yə göndəriləcək. Proqramı müvəffəqiyyətlə
bitirən məzunlar London Universitetinin İqtisadiyyat
Məktəbinin bakalavr diplomunu əldə edəcəklər və
diplomlar Londonda keçirilən məzun günündə təqdim
olunacaq.
İctimaiyyətlə əlaqələr şöbəsi |
