|
 Azərbaycan
Texnologiya Universitetində yeni tədris ilinin
başlamasına həsr olunan "Bilik günü" tədbiri təşkil
olunub. Tədbir iştirakçıları əvvəlcə universitetin
həyətindəki Şəhidlər abidəsini ziyarət edib.
Tədbirdə ATU-nun rektoru, texnika elmləri doktoru,
professor Akif Süleymanov çıxış edərək professor-müəllim
heyəti və tələbələri yeni dərs ili münasibətilə təbrik
edib. Rektor deyib ki, ATU-nu seçən tələbələr zamanın
tələblərinə uyğun addım atıblar. Çünki Azərbaycanın
hazırkı iqtisadi inkişafı fonunda ölkədə sənaye
müəssisələrinin sayı durmadan artır. Bu isə mühəndis
texnoloqlara ehtiyacın günü-gündən artması deməkdir.
Professor Akif Süleymanov son zamanlarda ATU-da tədris
prosesi və kadr hazırlığının keyfiyyətinin artırılması
istiqamətində atılan addımlardan da danışıb. O qeyd edib
ki, tezliklə görülən işlər, həyata keçirilən layihələr
öz müsbət nəticəsini verəcək.
Tədbir iştirakçılarına məlumat verilib ki, bu tədris
ilində ATU-da 2422 tələbə təhsil alacaq. Bunlardan 527
nəfəri tələbə adını yeni qazananlardır. Eyni zamanda
magistratura pilləsində təhsil alan 55 nəfərdən 28-i
yeni qəbul olunanlardır. ATU-ya bu il qəbul olunan
tələbələr arasında ən yüksək nəticəni Turay Dəvrişov
göstərib. Rektor 501 bal toplayaraq standartlaşma və
texnoloji maşınlar fakültəsinin informasiya
texnologiyaları və mühəndisliyi ixtisasına qəbul olunan
Turay Dəvrişova universitet adından noutbuk hədiyyə edib.
Daha sonra tələbə adını yeni qazananlardan yüksək bal
toplamış 12 nəfərə tələbə biletləri və hədiyyələr təqdim
olunub.
Çıxış edən tələbələr ATU-ya qəbul olunduqlarına görə
sevinc hissi keçirdiklərini, gələcəyin peşəkar
texnoloqları olmaq üçün elmin sirlərinə həvəslə
yiyələnəcəklərini deyiblər. Birinci kursa qəbul olunan
tələbələrin valideynləri isə universitetdə keyfiyyətli
tədris üçün yaradılan şəraitə, həyata keçirilən
mütərəqqi layihələrə görə rəhbərliyə minnətdarlıq
ediblər. |
