|
Müsabiqənin birincisi Firuzə Kərimli ilə söhbət
 Artıq
bir neçə ildir ki, Təhsil Nazirliyi tərəfindən
ümumtəhsil müəssisələrinə və peşə liseylərinə
müəllimlərin işə qəbulu üzrə müsabiqə keçirilir. Ötən
illərdə olduğu kimi bu il də müsabiqə yüksək səviyyədə
təşkil olunmuş, 21795 müəllim 3462 vakant yer uğrunda
mübarizə aparmışdır. Nəticədə müsabiqənin hər 3
mərhələsini uğurla başa vuran 2445 müəllim vakant yerdə
işləmək hüququ qazanmışdır. Müsabiqədə ən yüksək balı -
60 mümkün baldan 58.236-balı coğrafiya müəllimi Firuzə
Kərimli toplayıb. Onunla yeni təyinat aldığı Bakının
Xəzər rayonunun Buzovna qəsəbəsində yerləşən 125 nömrəli
tam orta məktəbdə görüşdük. Müsabiqə ilə bağlı
təəssüratlarını bizimlə bölüşən F.Kərimli digər
suallarımızı da cavablandırdı.
- Özünüz haqqında qısa məlumat verərdiniz.
- 1992-ci ildə Tərtər rayonunun Sarov kəndində anadan
olmuşam. Orta məktəbi həmin kənddə bitirdikdən sonra 490
bal toplayaraq Azərbaycan Dövlət Pedaqoji
Universitetinin tarix-coğrafiya fakültəsinə daxil oldum.
Hazırda həmin universitetdə ixtisasım üzrə magistr
təhsili alıram.
- Müsabiqə haqqında fikirləriniz?
- Müsabiqə yüksək səviyyədə təşkil olunmuşdu. Fikrimcə
ən böyük əhəmiyyəti şəffaf şəkildə keçirilməsidir. Son
illər respublikamızda aparılan təhsil islahatları və bu
islahatların tərkib hissəsi olan müəllimlərin vakant iş
yerlərinə qəbulu üçün keçirilən müsabiqəni yüksək
qiymətləndirirəm. Düşünürəm ki, bilik və bacarığına
güvənən hər bir müəllim heç bir maneə olmadan iş yerinə
sahib ola bilər. Bunun üçün ölkəmizdə şəffaf mexanizm
mövcuddur. Müsabiqənin qaydaları da çox sadələşdirilmiş
şəkildədir. 3 mərhələdən ibarət müsabiqənin 1-ci
mərhələsində ərizə qəbulu zamanı heç bir problemlə
üzləşmədim. Elektron qaydada sənədləri qəbul etdilər.
2-ci mərhələdə də imtahan obyektiv keçdi. Suallar bir o
qədər də çətin deyildi. 3-cü mərhələdə də heç bir
çətinlik olmadan seçdiyim məktəbə yerləşdirildim.
- Ölkəmizdə aparılan təhsil islahatlarını necə
qiymətləndirirsiniz?
- Son illər ölkəmizdə bütün sahələrdə olduğu kimi təhsil
sahəsi də özünün yüksək inkişaf mərhələsindədir.
Prezident İlham Əliyevin təhsilə göstərdiyi diqqət və
qayğını xüsusilə vurğulamaq istəyirəm. Düşünürəm ki,
təhsilimizin bütün sahələri dinamik şəkildə inkişaf edir.
Bir çox dövlət proqramları, islahatlar həyata keçirilir.
2013-cü ildə "Azərbaycan Respublikasında təhsilin
inkişafı üzrə Dövlət Strategiyası"nın təsdiq olunması
isə təhsilimizdə yeni bir səhifənin başlanğıcı, mən
deyərdim ki, bir inqilab oldu. Bütün bunları nəzərə
aldıqda təhsilimizin dünya təhsil sisteminə sürətlə
inteqrasiya etdiyini, aparılan islahatların çox səmərəli
və düzgün olduğunu düşünürəm.
- Müsabiqədə yüksək bal toplayacağınıza əmin idinizmi?
- Səmimi desək, qarşıma ən yüksək bal toplamaq kimi bir
məqsəd qoymamışdım. Çalışırdım ki, yüksək nəticə əldə
edim və nəzərdə tutduğum təhsil ocağına müəllim kimi
daxil olum. Şükürlər olsun ki, məqsədimə çatdım. Builki
müsabiqədə ən yüksək bal topladığımı eşidəndə isə təbii
ki, çox sevindim. Çünki 20 mindən artıq iştirakçı
arasında I yeri tutmağım çox qürurvericidir.
- Sizcə, yaxşı müəllim olmaq üçün nə etmək lazımdır?
- Əvvəla qeyd edim ki, hər bir peşə sahibi öz sənətinin
vurğunu olmalıdır. Çünki sənətini, peşəni sevməsən, o
sahədə uğur qazana bilməzsən. Bu baxımdan əsl müəllim
olmaq üçün ilk növbədə peşəyə vurğun olmalısan. Bundan
sonra yorulmadan çalışmalı və peşənin sirlərinə dərindən
yiyələnməlisən. Düşünürəm ki, yaxşı müəllim təkcə
savadlı olmaq demək deyil. Müəllim həm psixoloq, həm
lider, həm də təşkilatçılıq qabiliyyətlərini özündə
cəmləşdirməli, ünsiyyət qurmaq bacarığına malik
olmalıdır.
- Yeni təlim metodları haqqında düşüncələriniz?
- Universitetdə bakalavr pilləsi üzrə təhsil alarkən
yeni təlim metodları, innovasiyalar haqqında müəyyən
biliklərə yiyələnmişəm. Pedaqoji təcrübə keçdiyimiz
zaman kurikulum anlayışı haqqında müəllimlərimizdən
müəyyən biliklər əldə etmişəm. Müəllim olacağımı
düşünərək bu haqda nəzəri biliklərə yiyələnmişəm.
Zənnimcə, kurikulum günün tələbidir. Dünyanın inkişaf
etmiş ölkələrində olduğu kimi bizim ölkəmizdə də tətbiq
olunmasını təqdirəlayiq hal hesab edirəm.
- Niyə məhz coğrafiya fənni?
- Humanitar fənlərə məndə həvəs məktəb illərindən olub.
Özümü bu sahədə daha sərbəst və rahat hiss edirdim.
Tarix və coğrafiyanı seçməyimdə ən böyük faktor isə mənə
bu fənləri tədris edən müəllimim idi. Onun sayəsində bu
fənlərin həm dərinliklərinə yiyələndim, həm də fənnə
marağım ikiqat artdı. Fürsətdən istifadə edib bütün
müəllimlərimə öz dərin təşəkkürümü bildirirəm.
- Karyeranızın kulminasiya nöqtəsini harda görürsünüz?
- Pedaqoji fəaliyyətimlə yanaşı, elm sahəsində yüksək
nəticələr əldə etməyi qarşıma məqsəd qoymuşam. Düşünürəm
ki, təhsillə elm bir-birinə bağlıdır. Elm sahəsində
tədqiqatlar aparıb öz ixtisasım üzrə yüksək səviyyəli
elm adamı olmağı karyeramın kulminasiya nöqtəsi hesab
edirəm. Bunun üçün ölkəmizdə hər bir şərait var və mən
də bir gənc olaraq bu imkanlardan maksimum istifadə edib
məqsədimə doğru addımlamağı planlaşdırıram.
- Bu məktəbi seçməyinizdə məqsədiniz? Yüksək bal
topladığınız halda niyə məhz şəhər məktəbini deyil,
mərkəzdən uzaq ərazidə yerləşən məktəbi seçdiniz?
- Hazırda Xəzər rayonunun Binə qəsəbəsində yaşayıram.
Bizim yaşadığımız əraziyə vakant yer olan ən yaxın
məktəb Buzovna qəsəbəsində yerləşən 125 nömrəli tam orta
məktəb idi. Bundan başqa, məktəbin yüksək səviyyədə
maddi-texniki bazasının olması, müasir standartlara
cavab verməsi, nizam-intizamın mövcudluğu və digər bir
sıra amillər bu məktəbi seçməyimə səbəb oldu. Səmimi
olaraq demək istəyirəm ki, bu məktəbdə işləyəcəyim üçün
qürur hissi duyuram.
Biz də gənc mütəxəssis Firuzə Kərimliyə pedaqoji
fəaliyyətində uğurlar arzulayır, bu müqəddəs və şərəfli
peşədə iri addımlarla hədəfə doğru irəliləməsini
diləyirik.
Niyazi RƏHİMOV,
"Azərbaycan müəllimi" |
