|
Yusif ƏLİYEV,
"Azərbaycan müəllimi"
y.aliyev@muallim.edu.az
 "Azərbaycan
Respublikasında təhsilin inkişafı üzrə Dövlət
Strategiyası"nın dördüncü strateji istiqaməti müasir
tələblərə uyğun və ömür boyu təhsili təmin edən təhsil
infrastrukturunun yaradılmasını nəzərdə tutur. Bu
istiqamət üzrə görüləcək əsas işlərdən biri təhsil
müəssisələrində informasiya - kommunikasiya
texnologiyaları əsaslı təlim metodologiyasına uyğun
infrastrukturun bərqərar edilməsidir. Məlum olduğu kimi,
son 10 ildən artıq bir müddət ərzində təhsil
müəssisələrinin İKT vasitələri ilə təmin olunması
istiqamətində çox böyük işlər görülmüş, iki dövlət
proqramı qəbul olunaraq həyata keçirilmişdir.
Nəticədə ölkə üzrə bütün pillələrdən olan tədris
müəssisələri müasir kompüterlərlə, digər İKT
avadanlıqları ilə əsasən təmin olunmuş, təkcə
ümumtəhsil sistemində şagird-kompüter nisbəti 20:1-ə
çatdırılmışdır. 2014-2015-ci tədris ilində də bu
istiqamətdə aparılan işlər davam və inkişaf etdirilmiş,
təhsil müəssisələrinin kompüter avadanlığı və digər
rəqəmsal avadanlıqlarla təmin edilməsi, mövcud şəbəkə
avadanlığının və proqram təminatının fasiləsiz işlək
vəziyyətdə saxlanması üçün texniki dəstək xidmətləri
göstərilməsi, təhsil işçilərinin bu vasitələrlə iş üzrə
bilik və bacarıqlarının artırılması diqqət mərkəzində
saxlanılmışdır.
Belə ki, Təhsil Nazirliyinin Təhsil Sisteminin
İnformasiyalaşdırılması İdarəsindən aldığımız məlumata
görə, ötən dərs ilində ümumilikdə təhsil müəssisələri
6000 ədəd Monoblok Lenovo stolüstü kompüter, 3000 ədəd
noutbuk, 700 ədəd proyektor və 1377 ədəd interaktiv
elektron lövhə ilə təmin olunmuşdur.
Bakı şəhəri, Abşeron rayonu və digər şəhər və rayonlarda
1846 təhsil müəssisəsinə, CİSCO SMART net Service
vasitəsilə təhsil müəssisələrində yerləşən şəbəkə
avadanlıqlarına, eyni zamanda, "Elekton məktəb" layihəsi
çərçivəsində 43 təhsil müəssisəsində quraşdırılmış
proqram təminatının fasiləsiz işlək vəziyyətdə qalması
üçün texniki dəstək xidmətləri göstərilmişdir.
Respublika üzrə 200 təhsil müəssisəsi Azərbaycan Təhsil
Şəbəkəsinə qoşulmuş, 1765 təhsil müəssisəsi Fiber-Optik,
ADSL və simsiz rabitə kanalları ilə təhsil sisteminin
korporativ İntranet və İnternet şəbəkələrinə çıxışla
təmin edilmişdir.
Müxtəlif fənlərə aid elektron tədris resursları,
multimedia məzmunlu video dərslər, təhsil üzrə
simulyasiyalar və elektron testlər hazırlanması və
www.e-resurs.edu.az portalında yerləşdirilməsi
istiqamətində də bir sıra addımlar atılmış, biologiya,
riyaziyyat, fizika və kimya fənləri üzrə 26 ədəd
elektron dərs, milli tədris fənləri üzrə 30 ədəd
elektron tədris resursu, 106 ədəd videodərs, 300 ədəd
təhsil üzrə simulyasiyalar, 28000-dək elektron test olan
baza hazırlanıb istifadəyə verilmişdir.
Məlumat və Resurs Mərkəzinin bütün serverləri
lisenziyalar, təhsil müəssisələrində olan kompüterlər
isə lisenziyalı "Bitdefender SRL" antivirus proqramları
ilə təmin olunmuşdur.
Təhsil sisteminin 900 nəfər inzibati idarəetmə heyəti
üçün İKT üzrə savadlılığın artırılmasına yönəldilmiş
treninqlər keçirilmişdir.
"I şagird: 1 kompüter" təhsil modelinin orta ümumtəhsil
məktəblərində reallaşdırılması üzrə 650 nəfər müəllim
treninqlərə cəlb olunmuşdur.
Təhsildə İKT, müasir təlim strategiyaları və layihə
metodikasının istifadəsi üzrə 700 nəfər müəllim üçün
treninqlər təşkil olunmuşdur.
Müəllim və inzibati idarəetmə heyətindən 450 nəfər
mentorluq üzrə, ibtidai siniflərdə dərs deyəcək 1200
nəfər, Milli Təhsil Məlumat Bazasının istifadəsi üzrə
375 nəfər müəllim üçün treninqlər keçirilmişdir. Eyni
zamanda distant təhsilə cəlb olunmuş şagird, valideyn və
müəllimlər üçün İKT avadanlıqlarından və texniki
vasitələrdən istifadəyə dair treninqlər təşkil olunmuş,
bu məqsədlə 50 müəllim, 160 şagird və 160 valideyn
heyəti treninqlərdən keçmişdir.
Ayrı-ayrı təhsil müəssisələrinin İKT avadanlığı ilə
təchiz olunması istiqamətində də iş aparılmış, 132-134
nömrəli təhsil kompleksində yaradılmış xüsusi sinif
otağı 35 planşet, 1 noutbuk, müvafiq proqram təminatlı
elektron interaktiv lövhə və printerlə, akademik Zərifə
Əliyeva adına liseyin bir sinif otağı 42 ədəd noutbuk,
1 ədəd böyük ölçülü monitor, 1 ədəd müəllim üçün
kompüter, 11 ədəd planşet, 1 dəst elektron interaktiv
lövhə, 1 ədəd lazer printeri, 2 ədəd rəqəmsal kamera, 4
ədəd monitor, 4 ədəd noutbuk saxlama dolabı, 1 ədəd
elektron kürsü, səs gücləndiriciləri, mikrofon,
lisenziyalaşdırılmış anti-virus və kontent idarəedici
alət, Bakı şəhər 23 nömrəli tam orta məktəb 30 ədəd (ASUS
T100) planşet, 1 ədəd (Erson EB585wi) proyektor, 1 ədəd
desktop server və 1 ədəd noutbukla, 220 nömrəli
məktəb-liseydə yaradılmış İKT əsaslı pilot sinif otağı
30 ədəd (hər şagird üçün) "Transformer Book" və 1 ədəd
(müəllim üçün) "Transfomer Book Trio" ilə təchiz
olunmuşdur.
Təhsil Sisteminin İnformasiyalaşdırılması İdarəsində və
"Elektron məktəb" layihəsində iştirak edən təhsil
müəssisələrində şəbəkə və İKT avadanlıqlarının
quraşdırılması istiqamətində işlərə başlanmışdır. Belə
ki, Təhsil Sisteminin İnformasiyalaşdırılması İdarəsinə
53, Bakı Şəhəri üzrə Təhsil İdarəsinə 115, Təhsil
Problemləri İnstitutuna 136, təhsil müəssisələrinə 960
şəbəkə avadanlığı və 6222 kompüter, Bakı Kompüter
Kollecinə 17 şəbəkə avadanlığı və 208 kompüter, Gəncə
Şəhər Təhsil İdarəsinə 9 şəbəkə avadanlığı və 23
kompüter, Sumqayıt Şəhər Təhsil Şöbəsinə 12 şəbəkə
avadanlığı və 84 kompüter, rayon təhsil şöbələrinə 26
şəbəkə avadanlığı və 40 kompüter verilmiş və onların
quraşdırılmasına başlanılmışdır.
Ali təhsil müəssisələrində ödənişli təhsil alan
tələbələr üzrə proqram təminatının hazırlanmasına da
start verilmişdir. |
