|
İMİŞLİ. Sentyabrın 2-də İmişli şəhərindəki Heydər Əliyev
Mərkəzində rayon təhsil işçilərinin konfransı
keçirilmişdir. Konfransda İmişli Rayon İcra
Hakimiyyətinin başçısı Vilyam Hacıyev, Təhsil
Nazirliyinin nümayəndəsi Rəfiq Qəndilov, rayonun idarə
və müəssisə rəhbərləri, bələdiyyə sədrləri iştirak
etmişlər. Konfransda "2014-2015-cü dərs ilinin yekunları
və qarşıda duran vəzifələr" mövzusunda İmişli RTŞ-ın
müdiri Ramiz Əmirovun məruzəsi dinlənilmişdir. Məruzədə
qeyd olunmuşdur ki, rayonda 62 ümumtəhsil məktəbi
fəaliyyət göstərir. Həmin məktəblərdə 15 minə qədər
şagirdin təlim-tərbiyəsi ilə 1690 pedaqoji işçi məşğul
olur.
2014-2015-ci dərs ili üçün 105 vakant müəllim yerinə
sifariş verilmiş, Təhsil Nazirliyi tərəfindən keçirilən
imtahanın nəticəsinə görə 59 nəfər rayonda müəllim
işləmək hüququ qazanmışdır. Lakin onlardan 9-u təyinat
yerinə gəlməmişdir. Beləliklə, rayonda fənlər üzrə 55
ixtisaslı müəllimə ehtiyac təmin olunmamışdır.
Son 10 ildə rayonun ümumtəhsil məktəblərinin
maddi-texniki bazası yaxşılaşmış, 39 məktəbin binası
yenidən inşa edilmiş, yaxud əsaslı təmir olunmuşdur.
Həmin məktəblərdə 9969 nəfər şagird təhsil alır ki, bu
da rayon üzrə şagirdlərin 65,4 faizini təşkil edir.
Eyni zamanda rayon təhsil işçilərinin əməyi dövlət
tərəfindən yüksək qiymətləndirilmiş, son illər 8 nəfər
"Əməkdar müəllim" fəxri adına, 6 nəfər "Tərəqqi"
medalına, 15 nəfər "Qabaqcıl təhsil işçisi" döş nişanına
layiq görülmüşdür.
2014-2015-ci dərs ili ərzində rayonun ümumtəhsil
məktəblərinin şagirdləri müxtəlif səviyyəli bilik və
idman yarışlarında müəyyən nailiyyətlər əldə etmişlər.
İki şagird fənn olimpiadalarının respublika
mərhələsinin qalibləri sırasında yer tutmuşdur.
Son zamanlar gənc müəllimlərin uğurlarının onları
sevindirdiyini deyən məruzəçi bu uğurları diqqətə
çatdırmışdır. Bildirmişdir ki, cari dərs ilində 5-ci "Elektron
təhsil" müsabiqəsinin yekun mərhələsində respublika üzrə
21 nəfər qalib olmuşdur ki, onlardan da 3-ü rayonun gənc
müəllimləridir.
Məruzədə qeyd edilmişdir ki, rayon üzrə kurikulum
təlimindən keçməyən, yeni yanaşmalarla tədrisə
başlayacaq 110 nəfər müxtəlif fənn müəllimi iyul-avqust
aylarında öyrədici təlim kurslarına cəlb olunaraq
müvafiq sertifikatlar almışdır.
R.Əmirov məruzəsində buraxılış və ali məktəblərə qəbul
imtahanlarının yekunlarından danışaraq diqqətə
çatdırmışdır ki, ötən dərs ilinin sonunda şagirdlərin
illik qiymətlərinin nəticələrinə görə rayon üzrə
müəllimlərin reytinq cədvəli hazırlanmışdır.
2014-2015-ci dərs ilinin yekunlarına görə, bütün
fənlərdən "4" və "5" qiymət alan şagirdlərin keyfiyyət
göstəriciləri ibtidai təhsil səviyyəsi üzrə 65%, ümumi
orta təhsil səviyyəsi üzrə 59,8%, tam orta təhsil
səviyyəsi üzrə 22,3% olmuşdur. Yekun nəticələrin onları
qane etmədiyini bildirən təhsil şöbəsinin müdiri bu
nəticələri, habelə buraxılış və ali məktəblərə qəbul
imtahanlarının nəticələrini müqayisəli şəkildə cari dərs
ilinin əvvəlində kollektivlərlə birgə, geniş şəkildə
müzakirə etməyi nəzərdə tutduqlarını diqqətə
çatdırmışdır.
Qeyd olunmuşdur ki, 2015-ci ildə rayon üzrə
respublikaının dövlət və özəl ali təhsil müəssisələrinə
301 nəfər qəbul olmuşdur ki, onların da 257 nəfəri
2014-2015-ci dərs ilinin məzunlarıdır.
Son illərdə rayon üzrə ali təhsil müəssisələrinə qəbul
olunanların sayı hər il əvvəlki illə müqayisədə daha da
artır. Belə ki, rayon üzrə 2008-ci ildə 58 nəfər ali
məktəblərə qəbul olunmuşdursa, bu il onların sayı 257
nəfər olmuş, yəni 5 dəfəyə qədər artmışdır. Bu il ali
məktəblərə qəbul olanlardan 22 nəfəri 500-dən, 12 nəfəri
isə 600-dən yuxarı (2014-cü ildə 7 nəfər idi) bal
toplamışdır.
Konfransda 600-dən çox bal toplayan məzunlar qiymətli
hədiyyələrlə mükafatlandırılmışlar.
Təhsil Nazirliyinin nümayəndəsi Rəfiq Qəndilov, İmişli
Rayon İcra Hakimiyyətinin başçısı Vilyam Hacıyev
konfransda çıxış edərək qarşıda duran vəzifələrdən
danışmışlar.
Yusif ƏLİYEV,
Şakir CƏFƏROV,
"Azərbaycan müəllimi" |
