|
 İnşaat
sahəsində böyük beynəlxalq nüfuza malik "Engineering
News Record" jurnalı (ENR) dünya miqyasında ilin ən
yaxşı layihələrinin siyahısını açıqlayıb. Bu ilin
martında "Bakı-2015" ilk Avropa Oyunları ərəfəsində
istifadəyə verilmiş Bakı Olimpiya Stadionu idman
qurğuları kateqoriyasında ilin ən yaxşı layihəsi elan
olunub.
Azərbaycan Respublikası Dövlət Neft Şirkətinin (SOCAR)
mətbuat xidmətindən AZƏRTAC-a verilən məlumata görə,
layihə müsabiqəyə "Thornton Tomasetti" şirkəti
tərəfindən təqdim edilib.
ENR jurnalı dünyanın ən yaxşı inşaat və dizayn
layihələri müsabiqəsini artıq üçüncü dəfədir keçirir.
Dünya miqyasında tanınmış ekspertlərdən ibarət münsiflər
heyəti müsabiqəyə təqdim olunmuş layihələri
təhlükəsizlik, innovasiya, ictimai əhəmiyyət, dizayn və
inşaat üstünlükləri baxımından qiymətləndirir, eyni
zamanda layihəni həyata keçirən şirkətlərin də
çətinliklərin öhdəsindən necə gəldiyi nəzərə alınır.
Builki müsabiqədə hava limanları, körpü və tunellər,
inzibati binalar, mədəniyyət, təhsil və turizm
obyektləri, sənaye əhəmiyyətli tikililər də yer alıb.
Qalib gəlmiş layihələr və münsiflər haqqında geniş
məlumat "Engineering News Record" jurnalının sentyabrın
7-də buraxılacaq sayında dərc olunacaq. Sentyabrın 10-da
Nyu-Yorkun "Grand Hyatt" otelində keçiriləcək təntənəli
mərasimdə isə qalib layihələr arasından "ENR ilin ən
yaxşı ümumdünya layihəsi" seçiləcək. Bakı Olimpiya
Stadionu layihəsinin bu nüfuzlu mükafatı alma ehtimalı
böyükdür.
Xatırladaq ki, Bakı Olimpiya Stadionu SOCAR-ın baş
podratçılığı ilə inşa edilib. "Bakı-2015" ilk Avropa
Oyunlarının açılış və bağlanış mərasimləri, həmçinin
yüngül atletika yarışları bu stadionda keçirilib. |
