|
ABŞ müəllim çatışmazlığı ilə üzləşib
 Yeni
tədris ili üçün 21,5 minə yaxın müəllim tələb olunur
Yeni tədris ilinin başlanmasına az qaldığı bir vaxtda
ABŞ-ın iri şəhərlərində bir çox məktəblərdə hələ də
müəllim çatışmazlığı var. Ölkədə müəllim çatışmazlığı
problemi son iqtisadi böhran zamanı (2008-2009-cu
illər) təhsil işçilərinin kütləvi surətdə ixtisarı və
sosial xərclərin azaldılmasından sonra başlayıb. Belə
ki, təkcə Kaliforniya ştatında 2008-2012-ci illərdə
fəaliyyət göstərən müəllimlərin sayı 82 min nəfər
azalıb. "New York Times" (NYT) qəzetinin yazdığına
görə, kəskin vəziyyət xüsusilə ABŞ-ın bir sıra ştat və
dairələrində, Kaliforniya, Oklahoma, Şarlotta, Neşvill,
Luisvill kimi şəhərlərində hiss olunur.
Kaliforniya Təhsil Nazirliyinin (California Department
of Education) məlumatına əsasən, 2015-2016-cı tədris
ili üçün 21,5 minə yaxın müəllim tələb olunur.
Kaliforniyada isə il ərzində yalnız 15 min nəfərə
tədris aparmağa icazə verilir. Ölkədə müəllim
çatışmazlığı həm də ona görə kəskinləşib ki, müəllimlik
peşəsi amerikalılar üçün getdikcə daha az cəlbedicidir.
2008-2012-ci illər ərzində təkcə Kaliforniyada müəllim
hazırlığı 55 faiz azalıb. Bütün ölkə üzrə götürdükdə
isə 2010-2014-cü illərdə müəllim olmaq istəyənlərin sayı
30 faiz aşağı düşüb.
Stenford Universiteti nobelçi alimlərin sayına görə
liderdir
 "Times
Higher Education" növbəti reytinqini açıqlayıb
"Times Higher Education" (THE) dərgisi alimləri daha
çox Nobel mükafatı almış ali məktəblərin reytinq
cədvəlini tərtib edib. Reytinqə əsasən, ABŞ-ın
Stenford Universiteti XXI əsrdə nobelçi alimlərinin
sayına görə liderdir. XXI əsrdə alimləri daha çox
ali elm mükafatı almış 10 dünya universitetindən 8-i
ABŞ-ın payına düşür. Birləşmiş Ştatlar həm də milli
əlamətə görə də liderdir - 2000-2014-cü illər ərzində ən
çox amerikalılar nüfuzlu mükafata sahib olublar.
Amerika üçün ən uğurlu il 2006-cı il sayılır - bütün
nominasiyalar üzrə mükafatlar məhz ABŞ
universitetlərini təmsil edən alimlərə verilib. İlk
10-luqda Kolumbiya, Berkli, Prinston, Çikaqo,
Santa-Barbaradakı Kaliforniya, Massaşusets Texnologiya
universitetləri, Hovarda Xyuz Tibb Universiteti,
İsrailin Texnion Texnologiya Universiteti, Almaniyanın
Maks Plank adına Elmi Tədqiqatlar Cəmiyyəti təmsil
olunurlar. XX əsrdə alimləri daha çox Nobel mükafatı
almış Harvard və Kembric universitetləri bu siyahıda
yer ala bilməyib. Reytinq ali təhsil müəssisələrində
çalışan Nobel mükafatı laureatlarının sayı nəzərə
alınmaqla tərtib olunub. Ədəbiyyat üzrə Nobel mükafatı
və sülh mükafatı reytinqdə nəzərə alınmayıb.
87 yaşlı təqaüdçü tələbə adını qazandı
Cin Korps Nebrask Universitetinin məzunu olub
Avqustun 14-də ABŞ-ın 87 yaşlı sakini Cin Korps Nebrask
Universitetinin məzunu olub. Təqaüdçü qadın 70 il
əvvəl ali məktəbə daxil olsa da ailə qurması və 5 uşağa
baxması ilə əlaqədar ali təhsil ala bilməyib. 2011-ci
ildə həyat yoldaşı vəfat edən qoca xeyli bədbinliyə
qapılıb. Qızlarının təkidindən sonra təhsilini davam
etdirməyə qərar verib. Nəticədə Cin Korps nəvələri
yaşda olan gənc oğlan və qızlarla bir auditoriyada
dərslərinə davam edib. Beləliklə də Cin Korps 2015-ci
ildə ölkənin ən qocaman məzunu hesab olunub. Amerika
alimi Kristofer Kelli əmindir ki, ahıl yaşlarda təhsil
almaq insanlarda beynin fəaliyyətini və yaddaşı
stimullaşdırır.
Böyük Britaniya universitetləri rekord sayda tələbə
qəbul edib
Tələbələr daha çox psixologiya, iqtisadiyyat elmləri və
hüququ seçiblər
Bu il Böyük Britaniya universitetləri rekord sayda -
426070 tələbə qəbul edib. Gənclər ölkənin müxtəlif
ali məktəblərinə müvəffəqiyyətlə verilmiş imtahanların
nəticələrinə əsasən qəbul ediliblər. Universitet və
kolleclərə qəbul komissiyasının məlumatına əsasən,
onlardan 6910 namizəd imtahan nəticələrini apelyasiya
qaydasında müdafiə edib. Tələbələrin seçilməsi
limitinin artırılması səbəbindən bir çox
universitetlərdə hələ də vakansiyalar qalmaqdadır, yəni
keçid balı toplaya bilməyənlərin tələbə sıralarına qəbul
olunmaq şansı var. Mütəxəssislərin dediyinə görə,
Böyük Britaniya universitetlərinə builki tələbə seçimi
abituriyentlər arasında deyil, ali məktəblər arasında
rəqabətin nəticəsidir. Ali məktəblərə daxil olanların,
eləcə də sosial dotasiya əsasında qəbul olunanların
ümumi sayı 4 faiz artıb. Tələbələr arasında daha çox
tələb olunan ixtisaslar isə psixologiya, iqtisadiyyat
elmləri və hüquqdur.
Avropanın ən ucuz ali məktəbləri
Britaniya ekspertləri araşdırma aparıb
Böyük Britaniyanın maliyyə-bank sahəsində
ixtisaslaşmış transmilli "HSBC" şirkəti Avropanın
ali məktəblərində illik təhsil haqlarına dair tədqiqat
aparıb. "The Guardian" qəzetinin məlumatına əsasən,
Avropada ən ucuz ali təhsil Polşanın Varşava
Universitetindədir. Bu ali məktəbdə illik təhsil
haqqı, eləcə də yaşayış minimumu, kirayə və vətənə
uçuşlar 5865 avro təşkil edir.
İkinci yerdə illik təhsil haqqı 8019 avro olan
Lissabon Universiteti yerləşib. İlk "5"-likdə daha
sonra İstanbul Bosfor, Berlin Açıq və İspaniyanın
Qranada universitetləri yer alıb. "HSBC"-nin
nümayəndəsi Oliver Kukun sözlərinə görə, tələbələr
xaricdə təhsil almaq variantları axtarmağa
başlayarkən bütün əlverişli qrantlar və mübadilə
proqramlarını, həmçinin valyuta kurslarını nəzərdən
keçirməlidirlər ki, xaricdə öz pulları ilə necə
rəftar etməli olduqlarını yaxşı anlasınlar. O əlavə edib
ki, indi Avropada tələbələr arasında hər hansı xarici
ölkədə təhsil almaq çox populyarlıq qazanıb.
Oruc MUSTAFAYEV,
"Azərbaycan müəllimi"
xarici mətbuat materialları əsasında |
