|
 Xəbər
verdiyimiz kimi, İsmayıllı və İto şəhərləri arasında
imzalanmış dostluq mübadiləsi haqqında saziş
çərçivəsində Azərbaycanın bu şəhərinin məktəblilərindən
ibarət qrup Yaponiyaya səfərə gəlib. Səfər çərçivəsində
İto şəhər meriyasında merin müavinləri Katsuya Sato və
Hara Takaşi qrupun üzvləri ilə görüşüblər. Görüşdə
Azərbaycanın Yaponiyadakı səfirliyinin üçüncü katibi
Fuad Bağırov və qrupun rəhbəri, İsmayıllı şəhər 1
nömrəli tam orta məktəbin ingilis dili müəllimi Aytəkin
Əhmədova da iştirak ediblər.
İto şəhər merinin müavinləri görüşdə çıxış edərək son
illər Yaponiya ilə Azərbaycan arasında münasibətlərin
sürətlə inkişaf etdiyini bildiriblər. İsmayıllı və İto
şəhər məktəblilərinin mübadilə proqramı çərçivəsində
həyata keçirilən səfərlərinin iki ölkənin digər
regionları üçün də örnək olduğunu və münasibətlərin
gələcək inkişafına töhfə verəcəyini vurğulayıblar.
Görüşün sonunda İto şəhər meriyasına ölkəmizlə bağlı
hədiyyələr təqdim edilib.
Həmin gün azərbaycanlı qonaqlar İto şəhər
Assambleyasının sədri xanım Yasuko Tori və İto Şəhər
Təhsil Şöbəsinin müdiri Fuci Kazunari ilə də görüşüblər.
Görüşdə şöbə müdiri K.Fuci İto Şəhər Beynəlxalq Əlaqələr
Assosiasiyasının üzvləri tərəfindən İsmayıllı şəhər
məktəblilərinə yapon dilinin distant tədrisi barədə
məlumatı maraqla qarşılayaraq bu layihəni dəstəklədiyini
bildirib. Şöbə müdiri İsmayıllıdan olan şagirdlərə yapon
dilini daha yaxşı mənimsəmələri məqsədilə yapon dilində
kitablar hədiyyə edib.
AZƏRTAC |
