|
 İqtisadiyyatın
bütün aparıcı sahələrində köklü dəyişiklikləri təmin
etmiş, böyük uğurlara nail olmuş Naxçıvan Muxtar
Respublikasında nəqliyyat infrastrukturunun
təkmilləşdirilməsi istiqamətində də davamlı və
məqsədyönlü işlər aparılır. Regionların sosial-iqtisadi
inkişafı Dövlət Proqramları mərhələ-mərhələ həyata
keçirildikcə Naxçıvan Muxtar Respublikasında da
iqtisadiyyat və sosial sahələr sürətlə inkişaf etmiş,
Naxçıvanın siması kökündən dəyişilmiş və o dünyanın ən
gözəl və ən təmiz regionlarından birinə çevrilmişdir.
Bütün sahələrdə olduğu kimi, təhsil sahəsində də
islahatyönümlü xeyli iş görülmüş muxtar respublikanın
ali və orta ixtisas təhsili müəssisələrində yeni
ixtisaslar açılmış və tədris korpusları yenidən
qurulmaqla genişləndirilmişdir.
Nəqliyyatın inkişaf səviyyəsi ölkə və regionun,
bütünlükdə cəmiyyət sivilizasiyasının inkişafı
səviyyəsini müəyyən edən ən mühüm amillərdən biri kimi
çıxış edir. Nəqliyyat əməliyyatları istənilən istehsal
proseslərinin zəruri şərtidir və elə bu baxımdan da onu
iqtisadiyyatın arteriyaları adlandırırlar. Nəqliyyat
növləri içərisində dəmiryolu öz üstünlükləri ilə
fərqlənir. Ölkənin sosial-iqtisadi həyatında mühüm
əhəmiyyətə malik olan dəmiryolu nəqliyyat sisteminin
daha da inkişaf etdirilməsini, əhalinin və
iqtisadiyyatın dəmiryolu nəqliyyatı xidmətlərinə olan
tələbatlarının ödənilməsini, daşımaların
təhlükəsizliyini, onun infrastrukturunun
yeniləşdirilməsini, dəmiryolu sahəsi üçün kadrların
hazırlanmasını təmin etmək məqsədilə hazırda "Naxçıvan
Muxtar Respublikasında dəmir yolu nəqliyyat sisteminin
2011-2015-ci illər üzrə inkişaf Proqramı"
reallaşdırılır. Məhz elə bu məqsədlə kollecimizdə
Nəqliyyatda daşımaların təşkili ixtisasına
2013-2014-cü tədris ilində ilk qəbul aparılmışdır.
Hazırda həmin ixtisasda təhsil alan III kurs
tələbələrinin sayı 23 nəfərdir. II kursda isə 19 nəfər
təhsil alır. 2015-2016-cı tədris ili üçün bu ixtisasa 23
nəfərin qəbul olunması nəzərdə tutulmuşdur. Naxçıvan
Dövlət Texniki Kollecinin Nəqliyyatda daşımaların
təşkili ixtisası üzrə ümumorta təhsil bazasından
qəbul aparılır və onların tədris müddətləri dörd
ildir. Təhsilin sonu məzunlara subbakalavr ixtisas
dərəcəsi verilir.
Kollecimizdə tələbələrin ixtisaslarına yiyələnmələri
üçün hər cür şərait yaradılmışdır. Dərslərin əyaniliyini
təmin etmək məqsədilə nəqliyyatda daşımaların təşkili
fənn kabineti yaradılmışdır. Kabineti zənginləşdirmək
uçun buraya ixtisasa uyğun stendlər, şəkillər, bir sıra
digər avadanlıqlar gətirilmişdir. Tədrisi müasir təlim
metodları ilə aparmaq üçün kollecə bu sahə üzrə
ixtisaslı mütəxəssislər cəlb edilmişdir. Naxçıvan Muxtar
Respublikasının Təhsil Nazirliyinin köməyi ilə
Azərbaycanda bu sahə üzrə kadr hazırlığı aparan Bakı
Dövlət Rabitə və Nəqliyyat Kolleci ilə əlaqələr
yaradılmış, buradan dərsliklər əldə edilmişdir.
Qeyd etmək yerinə düşər ki, Naxçıvan Dövlət
Universitetində dəmiryolu nəqliyyatı və təsərrüfatı
mühəndisliyi ixtisası üzrə kadr hazırlığına 2012-2013-cü
tədris ilindən başlanmışdır. Biz hazırlanan kadrların
bilik səviyyəsinin daha da yüksək olması üçün muxtar
respublikanın bu ali təhsil ocağı ilə mütəmadi əlaqələr
saxlamaqla, birgə "açıq dərs"lərin keçirilməsi təşkil
edilir. İstər sərnişindaşımalarında, istərsə də
yükdaşımalarında beynəlxalq standartların tələblərini
ödəyəcək kadr hazırlığı əsas məqsədlərimizdən biridir.
Tələbələrimiz dərsləri kollecin maddi-texniki bazası
əsasında öyrənməyə çalışırlar. Digər praktik
məşğələləri isə Naxçıvan dəmiryol stansiyasında və
Culfa dəmiryol qovşağındakı struktur sahələrdə
keçirlər. İxtisasın tədris planına uyğun olaraq sonuncu
kursun 8-ci semestrində tədris, texnoloji və
diplomqabağı təcrübələrin "Naxçıvan Dəmir Yolları"
MMC-də keçirilməsi nəzərdə tutulmuşdur. Son 3 ay
yarımlıq tədris yalnız alınan nəzəri biliklərin
təcrübədə əsaslandırılmasına hesablanmışdır.
Tələbələrimiz dəmiryol nəqliyyatında çalışan işçilərin
vahid geyim forması ilə təmin edilmişdir. Tələbələrin
geyim forması ilə təmin edilməsi onlarda ixtisasa
hörmət, davranışlarında məsuliyyət hissi yaradır.
Bizim proqramlarımıza görə 2017-ci il kollecimiz üçün
ən uğurlu il olacaqdır. Belə ki, hazırda III kursda
təhsil alan 23 nəfər tələbənin 2017-ci ildə buraxılışı
gözlənilir. Nəzərə alsaq ki, dəmiryol xətti muxtar
respublikamızın ərazisinin əsas hissəsini əhatə edir,
onda, 23 nəfərin və növbəti illərin məzunları burada
müvafiq işlə təmin olunacaqdır.
Asəf RUŞANOV,
Naxçıvan Dövlət Texniki Kollecinin direktor əvəzi,
kənd təsərrüfatı üzrə fəlsəfə doktoru |
