ARXİV

15 Avqust 2015 - №30

Xarici mətbuatdan

Türkiyənin 84 yaşlı tələbəsi 

Türkiyə vətəndaşı,  84 yaşlı Fatma Mehriban Aktar  61 illik akademik məzuniyyətdən sonra, nəhayət, İstanbul  Memar Sinan Gözəl Sənətlər Universitetini  (Mimar Sinan Güzel Sanatlar Üniversitesi) bitirib.  Orta məktəbi bitirdikdən sonra Fatma Aktar universitetin rəssamlıq fakültəsinə daxil olmaq istəyib, lakin sənədlərini fransız dili  fakültəsinə verib.  Universitetdə  I  kursda oxuyarkən atası rəhmətə gedib.  17 yaşlı gənc təhsilini yarımçıq qoyaraq  müəllimlik etməyə qərar verib.  Ölkənin şimal-qərbindəki Ərzincan vilayətində  bir il orta məktəbdə müəllim işləyən Fatma İstanbula gələrək  bir vaxtlar mərhum atasının çalışdığı şirkətin nəşriyyat ofisində işə düzəlib. 1951-ci ildə  Memar Sinan Gözəl Sənətlər Universitetinə sənəd verib  və ali məktəbə daxil olub.  Təhsilini  davam etdirməklə yanaşı, Fatma həm də  işləməli olub.  Lakin üzləşdiyi maliyyə sıxıntıları və ağır  iş şəraitinə görə Fatma təhsilini yenə də yarımçıq qoyub.   O,  bir daha müəllimlik fəaliyyətinə qayıdıb. Tezliklə ailə quran Fatma Eskişəhər Universitetinin pedaqoji fakültəsini bitirərək 1988-ci ildə təqaüdə çıxıb.  2011-ci ildə Fatma tələbələrə müxtəlif səbəblərdən  başa çatdıra bilmədikləri təhsillərini  davam etdirməyə icazə verən akademik amnistiya barədə hökumət qərarı ilə tanış olub.  Universitetin arxivindən öz ərizəsini axtarıb  tapan  Fatma  61 ildən sonra   bir vaxtlar yarımçıq qoyduğu Memar Sinan Gözəl Sənətlər Universitetində  təhsilini  davam etdirməyə başlayıb.  "İlk vaxtlar mənim üçün ağır idi, hər şeyi atmağa hazır idim. Lakin  həyat yoldaşım  məni bir qədər də dözməyə inandırdı", - deyə birinci kursda üzləşdiyi çətinliklərdən danışan Fatma Aktar  sonrakı 4 ilin  onun üçün sanki bir gün kimi keçdiyini deyib.

İsveçdə müəllimlər çatışmır 

İsveçdə müəllim və həkim çatışmazlığı kəskin həddə çatıb.  "Uçitelskaya qazeta"nın məlumatına əsasən,  bu barədə  ölkənin  Dövlət Əmək Agentliyinin hesabatında qeyd olunur.  Bildirilir ki,  ölkədə müəllim və həkim çatışmazlığı iki səbəblə izah olunur.   Bu, ilk növbədə,  gənclərin pedaqoji  təhsilə  az maraq göstərməsi və ölkənin  ali tibb təhsili müəssisələrində  yer azlığı ilə bağlıdır.  Agentliyin hesabatında gələcəyin 200 peşəsi barədə məlumat verilir.  Onların arasında müəllimlərin və həkimlərin işlə təmin olunma şansları daha yüksəkdir.  İnşaatçılar, mühəndislər, İKT mütəxəssisləri də əmək bazarında ciddi tələbat duyulan peşələrdir.  Mədəniyyət və media sahəsində işləmək arzusunda olanların işlə təmin olunma imkanları isə  çox aşağı qiymətləndirilir.

Finlandiyada yeni təhsil sistemi 

Finlandiya  Avropa  Birliynə daxil olmayan ölkələrdən olan əcnəbi tələbələr uçün pullu təhsil sisteminin  tətbiqinə hazırlaşır.  Hazırda    Avropa Birliyinə daxil olmayan  ölkələrdən 20000 tələbə  Finlandiya ali məktəblərində pulsuz təhsil alır.

Əcnəbi tələbələr uçün pullu təhsil sisteminin  tətbiqinə dair  layihə hazırda hökumətin müzakirəsinə təqdim olunub.  Əcnəbilər üçün pullu təhsil sisteminin  tətbiqinə 2016-cı ildən başlanması nəzərdə tutulub.  Ötən ilin dekabrında layihənin  qəbuluna razılıq verilməyib.

Ölkənin iki tələbə  təşkilatı təklifi qətiyyətlə pisləyərək onun "böyük səhv"  olduğunu bəyan edib.  Qeyd olunub ki, əcnəbi tələbələr ölkə iqtisadiyyatına  gəlir gətirirlər.   Finlandiya İqtisadi Tədqiqatlar İnstitutunun araşdırmalarına görə, bakalavr və ya magistr səviyyələri üzrə   bir tələbənin  təhsili  dövlətə  2300-2800 avroya  başa gəlir. 

91 yaşlı italiyalı məzun 

İtaliyanın Kyeti şəhərinin sakini Nikola Torello, nəhayət,  91 yaşında orta məktəbi bitirib.  "Uçitelskaya qazeta"nın  məlumatına əsasən,  "The Local" nəşrinə müsahibə verən qoca bu işin öhdəsindən əvvəllər də gələ biləcəyini, lakin çox işlədiyini,  dörd uşaq və altı nəvə saxladığını deyib. Onun sözlərinə görə,  bu səbəbdən də orta məktəbi vaxtında bitirə bilməyib.  N.Torellonun buraxılış imtahanında onun qohumları da iştirak ediblər.  Təqaüdçü italyan yazıçısı  və şairi Alessandro Mandzoni haqqında inşa yazıb, riyaziyyatdan tapşırıq yerinə yetirib və ingilis dilindən şifahi imtahan verib. "Mən ötən il rəhmətə getmiş sevimli arvadım barədə danışmaq istədim, lakin mənə imkan vermədilər", - deyə qoca imtahanın gedişini şərh edib.  Ölkənin ən yaşlı məzunu bildirib ki, yaxın vaxtlarda ali  təhsilini davam etdirəcək və kompüterdən, internetdən  istifadəni öyrənmək niyyətindədir.  Qoca bu yaşa çatmaqda və yaxşı vəziyyətdə qalmaqda ona üzgüçülüyün  kömək etdiyini  deyib.  O,  həftədə 2 dəfə yerli hovuzların birində üzgüçülüklə məşğul olur.

 Qeyd edək ki, bu ilin aprel ayında  Amerikanın Viskonsin ştatından olan 103 yaşlı  təqaüdçü Mari Hant orta məktəbi bitirərək attestat alıb.  Vaxtilə o, səkkiz azyaşlı bacı-qardaşını saxlamaq üçün məktəbi buraxmalı olub.