|
 Çinarə Əzimova xüsusi istedad
sahibidir. Beynəlxalq müsabiqə və festivallarda uğur
qazanan bu qız Bakıdakı Bülbül adına Orta İxtisas Musiqi
Məktəbinin şagirdidir.
Çinarə Əzimova 2002-ci ildə Bakıda musiqiçi ailəsində
anadan olub. Uşaqlıqdan skripka ilə məşğul olan Çinarə
2011-ci ildə Bülbül adına Orta İxtisas Musiqi Məktəbinin
IV sinfinə daxil olub. Vokal ixtisası üzrə dosent İradə
Xəlilovanın sinfində təhsil alır. 2009-cu ildə "Gənc
ifaçıların Bakı müsabiqəsi"nin laureatı adını qazanan
Çinarə 2013-cü ildə Estoniyanın Koxtla-Yarve şəhərində
keçirilən gənc vokalçıların VIII Beynəlxalq
müsabiqəsində Qran-pri mükafatına layiq görülüb.
Həmin ildə o, ümummilli lider Heydər Əliyevin anadan
olmasının 90 illiyinə həsr olunmuş gənc ifaçıların II
Respublika müsabiqəsinin vokal ixtisası üzrə laureatı
adını qazanıb. 2014-cü ildə Latviya "Riqa-Simfony"
müsabiqəsində də istedad və və bacarıq nümayiş
etdirərək Qran-pri mükafatına sahib olub. 2014-cü
ildə Uşaqların Beynəlxalq Müdafiəsi Günü münasibətilə
Moskvanın Böyük Kreml Sarayında keçirilmiş "Melodika
pokoleniy" adlı II Beynəlxalq Uşaq Musiqi Festivalına
qatılıb. Paytaxt məktəblisi dəfələrlə dövlət
tədbirlərində öz istedadını nümayiş etdirib. 25-30
avqust 2014-cü il tarixlərində Sankt-Peterburqda
görkəmli opera müğənnisi Yelena Obraztsova adına gənc
vokalçıların V Beynəlxalq müsabiqəsinə və ispan vokal
ustadı Konçita Badianın xatirəsinə həsr olunmuş Kamera
Musiqisi Beynəlxalq Müsabiqəsi keçirilib. Dünyanın 11
ölkəsindən 147 gənc vokalçının qatıldığı müsabiqədə
Çinarə Əzimova da ölkəmizi təmsil edib və II yerə
layiq görülüb. Sentyabrın 1-də D.Şostakoviç adına
Sankt-Peterburq Akademik Filarmoniyasının Böyük zalında
keçirilən qaliblərin təltifolunma mərasimində və yekun
konsertində Çinarə Əzimovanın çıxışı böyük maraqla
qarşılanıb.
Bir çox beynəlxalq müsabiqə və festivallarda
nailiyyətlər qazanan Çinarə Əzimovanın adı 2015-ci ilin
iyulunda Azərbaycan Respublikası Prezidentinin müvafiq
sərəncamı ilə Azərbaycanın gənc istedadlarının "Qızıl
kitabı"na yazılıb və o, xüsusi aylıq təqaüdə layiq
görülüb.
Çinarə ona verilən mükafatı yüksək dəyərləndirir və
deyir ki, öz üzərində səylə çalışacaq, ona verilən
etimadı doğruldacaq, aldığı təqaüdü isə musiqi ilə
bağlı layihələrə xərcləyəcək. |
