|
 İyulun
27-də "Azərbaycan Xəzər Dəniz Gəmiçiliyi" Qapalı Səhmdar
Cəmiyyətinin (QSC) Azərbaycan Dövlət Dəniz
Akademiyasında (ADDA) təhsil naziri Mikayıl Cabbarovun
və QSC-nin sədri Rauf Vəliyevin iştirakı ilə görüş olub.
AZƏRTAC xəbər verir ki, tədbirdə çıxış edən təhsil
naziri Mikayıl Cabbarov Çingiz Əliyevi ADDA-ya rektor
təyin olunması münasibətilə təbrik edib, ona gələcək
fəaliyyətində uğurlar arzulayıb. Təhsil naziri bildirib
ki, Dövlət Dəniz Akademiyasının ölkəmizin ali təhsil
sistemində xüsusi yeri var: "Bu Akademiya ölkənin
iqtisadi inkişafında mühüm yeri olan "Xəzər Dəniz
Gəmiçiliyi"nin peşəkar kadrlarla təmin edilməsində vacib
rol oynayır. Tələbələrin kamil mütəxəssis kimi
yetişməsində təcrübənin rolu böyükdür. Buna görə də
tələbələrin gəmilərdə tədris, istehsalat və üzmə
təcrübələrinə xüsusi diqqət yetirilir. Dəniz
Akademiyasında tədrisin təkmilləşdirilməsinə, elm və
istehsalatla əlaqəyə də ciddi fikir verilir. Əminəm ki,
Prezident İlham Əliyevin 2015-ci il 24 iyul tarixli
sərəncamı ilə ADDA-ya rektor təyin olunan Çingiz Əliyev
qarşıya qoyulan vəzifələri layiqincə yerinə yetirəcək,
ona bəslənən ümidləri doğruldacaq".
"Azərbaycan Xəzər Dəniz Gəmiçiliyi" QSC-nin sədri Rauf
Vəliyev isə ölkəmizdə gəmiçiliyin möhkəm təməl üzərində
bərqərar olduğunu diqqətə çatdırıb. İqtisadiyyatda köklü
struktur islahatlarının davam etdirilməsi, dəniz
gəmiçiliyi sahəsində yerli və beynəlxalq daşımaların
artırılması, ölkənin rəqabət qabiliyyətinin və tranzit
potensialının gücləndirilməsi məqsədilə Prezident İlham
Əliyevin 2013-cü il 22 oktyabr tarixli sərəncamı ilə
respublikada mövcud olan iki böyük donanmanın əsasında
"Azərbaycan Xəzər Dəniz Gəmiçiliyi" QSC-nin
yaradıldığını vurğulayan R.Vəliyev səhmdar cəmiyyətin
peşəkar kadrlarla təmin edilməsində Akademiyanın üzərinə
düşən vəzifələrdən danışıb.
Qeyd olunub ki, 1881-ci ilin noyabrında Azərbaycanda
dənizçi kadrların hazırlanması ilə ölkədə dənizçilik
təhsilinin bünövrəsi qoyulub. Azərbaycan Dövlət Dəniz
Akademiyası
 isə
ulu öndər Heydər Əliyevin tapşırığına əsasən Azərbaycan
Respublikası Nazirlər Kabinetinin 1996-cı il 15 iyul
tarixli qərarı ilə Bakı Dəniz yolları məktəbinin
bazasında yaradılıb. Hazırda ADDA-da 3 fakültə, 12
kafedra fəaliyyət göstərir. ADDA Beynəlxalq Dəniz
Təşkilatı tərəfindən tanınıb, onun təşəbbüsü ilə dünya
ali dəniz təhsili sisteminə daxil edilib. Akademiya MDB
və xarici ölkələrin ali dənizçilik məktəbləri ilə
əməkdaşlıq edir və Sankt-Peterburqdakı admiral S.Makarov
adına Dəniz Akademiyası yanında elmi-metodik Şuranın
üzvüdür. ADDA-nın diplom və sertifikatları beynəlxalq
səviyyədə tanınır.
Bildirilib ki, Prezident İlham Əliyevin uzaqgörən
siyasəti nəticəsində neft kapitalının insan kapitalına
çevrilməsi istiqamətində uğurlu addımlar atılmaqdadır.
Bu siyasət peşəkar kadrların yetişdirilməsinə, təhsilin
müasirləşməsinə yönəlib. QSC sədri "Xəzər Dəniz
Gəmiçiliyi"nin yüksək ixtisaslı kadrlara ehtiyacının
olduğunu vurğulayaraq deyib: "Bu gün bizə peşəkar
kadrlar lazımdır. Odur ki, ixtisaslı dənizçilərin
hazırlanmasında keyfiyyətə üstünlük verilməlidir".
Sonra ADDA-nın rektoru Çingiz Əliyev ona göstərilən
etimada görə Prezident İlham Əliyevə minnətdarlığını
bildirib və üzərinə düşən vəzifəni yüksək səviyyədə
yerinə yetirmək üçün var gücü ilə çalışacağını söyləyib. |
