|
 Mükafatlandırılanlar
arasında qəzetimizin
baş redaktoru Bayram Hüseynzadə də var
Ölkəmizdə Milli Mətbuat Gününün təntənə ilə qeyd
olunması artıq çoxdan xoş bir ənənəyə çevrilib. Ulu
öndər Heydər Əliyev tərəfindən əsası qoyulan həmin
ənənəyə uyğun olaraq jurnalistlərin peşə bayramı bu il
də yüksək səviyyədə keçirildi. Builki bayram həm də
milli mətbuatımızın 140 illiyinin qeyd edilməsi ilə
əlamətdar oldu. Ölkə həyatında, cəmiyyətin inkişafında,
demokratiyanın təşəkkülündə mətbuatın roluna böyük önəm
verən, KİV-lərə və media nümayəndələrinə xüsusi diqqət
və qayğı göstərən Azərbaycan Respublikasının Prezidenti
İlham Əliyevin "Azərbaycan milli mətbuatının 140 illik
yubileyinin keçirilməsi haqqında" 2 iyun 2015-ci il
tarixli sərəncamına əsasən yubiley ərəfəsində ölkəmizdə
çoxsaylı bayram tədbirləri keçirildi, jurnalistlərin
böyük bir dəstəsi Prezident tərəfindən müxtəlif orden və
medallarla, fəxri adlarla mükafatlandırıldı. Yubiley
təntənələrini xüsusilə əlamətdar edən hadisələr isə
Azərbaycan Prezidentinin Mətbuat Şurasının İdarə
Heyətinin üzvləri ilə görüşü, bu görüşdəki proqram
əhəmiyyətli nitqi, eləcə də əvvəlki yubileylərə nisbətən
daha çox sayda KİV nümayəndəsini mükafatlandırması oldu.
Belə ki, ölkə başçısının bu barədəki sərəncamlarına
əsasən kütləvi informasiya vasitələrinin inkişafındakı
xidmətlərinə görə 1 nəfər 2-ci dərəcəli "Vətənə xidmətə
görə", 4 nəfər 3-cü dərəcəli "Vətənə xidmətə görə"
ordenləri, 91 nəfər "Tərəqqi" medalı ilə təltif edildi,
2 nəfərə Azərbaycan Respublikası Prezidentinin fərdi
təqaüdü, 44 nəfərə "Əməkdar jurnalist", 17 nəfərə
"Əməkdar mədəniyyət işçisi" fəxri adları verildi, 21
nəfər "Azərbaycan Respublikası Prezidentinin fəxri
diplomu" ilə təltif olundu. "Əməkdar jurnalist" fəxri
adı alanlar arasında "Azərbaycan müəllimi" qəzetinin baş
redaktoru Bayram Hüseynzadə də var.
Ümumiyyətlə, bütün çoxsaylı KİV orqanları kimi,
"Azərbaycan müəllimi" qəzeti də dövlətimizin böyük
diqqət və qayğısını daim hiss edir. Belə ki, təkcə son
illər ərzində qəzetimizin 3 əməkdaşı "Əməkdar jurnalist"
fəxri adına, 3 əməkdaşı "Tərəqqi" medalına layiq
görülüb, 2 əməkdaşa isə mənzil verilib.
Milli mətbuatımızın 140 illik yubileyi münasibəti ilə
mükafat alanların hər birini təbrik edir, onlara daha
böyük yaradıcılıq uğurları arzulayırıq.
Yusif ƏLİYEV,
"Azərbaycan müəllimi" |
