|
Konyada 7-17 yaşlı məktəblilər arasında keçirilən şahmat
üzrə Avropa çempionatı başa çatıb. Azərbaycan Şahmat
Federasiyasından bildiriblər ki, gənc zəka ustalarımız
son turda da inamlı çıxış edərək 1 qızıl, 1 gümüş və 3
bürünc medal qazanıblar.
Çempionatda Azərbaycan ilə yanaşı, Rusiya, Türkiyə,
İngiltərə, Finlandiya, Bolqarıstan, Rumıniya və
Moldovadan ümumilikdə 670 şahmatçı mübarizə aparıb.
Ölkəmizi müxtəlif yaş qruplarında 35 şahmatçı təmsil
edib.
Qaliblərə Avropa Şahmat İttifaqının kubokları, medallar
və qiymətli hədiyyələr təqdim olunub. Çempionatda 9
yaşadək oğlanların yarışında Suleyman Suleymanlı 9
oyunda aktivinə 7,5 xal yazaraq qızıl medal qazanıb.
Yarışda 13 yaşadək oğlanların mübarizəsində Kənan
Qarayev 7 xalla gümüş medala sahib olub.
Həmçinin 11 yaşadək oğlanların yarışında Xəzər Babazadə
7 xalla üçüncü yeri tutub. Aytac Heydərova isə 6,5 xalla
13 yaşadək qızlar arasında bürünc medal qazanıb.
Ölkəmizə üçüncü bürünc medalı 15 yaşadək qızların
yarışında mübarizə aparan Nərmin Kərimzadə qazandırıb.
Komanda hesabında Azərbaycan idmançıları
Türkiyə və Rusiyadan sonra üçüncü yerdə qərarlaşıblar. |
