|
İyulun 3-də "Şüa" idman-sağlamlıq kompleksində 2003-cü
il təvəllüdlü və daha aşağı yaşlı oğlanlar və qızlar
arasında stolüstü tennis üzrə respublika təsnifat
turniri başa çatıb.
Azərbaycan Stolüstü Tennis Federasiyasından bildiriblər
ki, yarışlarda Bakı, Sumqayıt, Şirvan, Şabran, Salyan və
Şəkidən 31 oğlan və 17 qız idmançı iştirak edib. Yarış
ölkəmizdə idmanın bu növünün inkişafına töhfə vermək,
güclü potensiala malik gənc tennisçiləri
müəyyənləşdirmək məqsədi daşıyıb. İkigünlük turnirdə
oğlanlar arasında Fəxri Abdullayev ("Lokomotiv" İSM)
birinci olub. İkinci və üçüncü yerləri müvafiq olaraq
Kənan Pənahov və Emin Məmmədov (hər ikisi 7 nömrəli Bakı
tennis məktəbi) tutublar.
Qızların yarışında isə ilk üç yerdə Zemfira Mikayılova
və Nigar Əhmədova (hər ikisi "Neftçi" idman klubu),
eləcə də Tərgül Qasımova (Şabran) qərarlaşıblar.
Qaliblərə və mükafatçılara Azərbaycan Stolüstü Tennis
Federasiyasının diplomları və qiymətli hədiyyələri
təqdim olunub. |
