|
 Azərbaycan
cüdoçusu Hüseyn Rəhimli tələbələrin 28-ci Yay
Universiadasında bürünc medal qazanıb. Bu, Azərbaycan
idmançılarının Koreya Respublikasının Kvancu şəhərində
keçirilən universiadada qazandıqları ilk medaldır.
Hüseyn Rəhimli (73 kq) ilk görüşdə 1/16 final
mərhələsində yapon rəqibi Yuji Yamamotoya cərimə xalları
ilə məğlub olub. Rəqibinin yarımfinala çıxması
cüdoçumuza bürünc medal uğrunda mübarizəni davam
etdirmək imkanı yaradıb. Bu imkandan uğurla istifadə
edən Hüseyn Rəhimli təsəlliverici görüşlərdə Eduard
Nikolaeskuya (Rumıniya), Vaçlav Sedmidubskiyə (Çexiya
Respublikası), İqor Pereyraya (Braziliya) və Kamoliddin
Rasulova (Özbəkistan) qalib gələrək bürünc medal uğrunda
döyüşmək hüququ qazanıb. İdmançımız həmin görüşdə
rusiyalı Zelimxan Ozdoev ilə qarşılaşıb. Gərgin idman
mübarizəsində keçən görüşdə cüdoçumuz ipponla təmiz
qələbə qazanaraq universiadanın üçüncüsü olub. |
