|
 Sumqayıt
Dövlət Universiteti Tələbə Elmi Cəmiyyəti elmi
axtarışlara həvəs göstərən 550-dən çox tələbəni
birləşdirir. Fakültələr üzrə tələbə elmi cəmiyyətlərinin
səmərəli işini təşkil etmək, kafedralarla, tələbə
elmi-tədqiqat işlərinin rəhbərləri ilə sıx əlaqələrin
həyata keçirilməsini təmin etmək məqsədilə TEC-ə elmi
rəhbərlər təyin olunmuşdur.
Tədris ili ərzində həyata keçirilən tələbə elmi-tədqiqat
işlərinin ümumi nəticəsi kimi SDU TEC üzvlərinin
universitetin müvafiq struktur bölmələrində təşkil
edilmiş Tələbə Elmi Seminarlarında dinlənilən məruzələri
əhatə edən, bir növ hesabat xarakteri daşıyan və ilk
təcrübə olan "Sumqayıt Dövlət Universiteti Tələbə Elmi
Cəmiyyətinin Seminar materialları toplusu" nəşr
olunmuşdur.
SDU-nun "Heydər Əliyev Mərkəzi"ndə toplunun təqdimatı
keçirildi. Universitetin rektoru, professor Elxan
Hüseynov çıxışında bildirdi ki, belə topluların nəşri
tələbələrin elmi potensialını, yaradıcılığını üzə
çıxarır, onlarda elmə həvəs və maraq oyadır. Son illər
universitetin təhsil-tədqiqat-innovasiya mərkəzinə
çevrilməsi tələbələrin elmi-tədqiqat fəaliyyətinə cəlb
edilməsinə müsbət təsir göstərmişdir. Ölkə başçısı cənab
İlham Əliyevin elmin, təhsilin inkişafı, mövcud
problemlərin həlli istiqamətində həyata keçirdiyi
məqsədyönlü tədbirlər SDU-nun da fəaliyyətinin müasir
səviyyədə qurulmasına və inkişafına təkan vermişdir.
Universitetin elm və innovasiyalar üzrə prorektoru,
professor Ramazan Məmmədov çıxış edərək bildirdi ki,
müvəffəqiyyətli inkişafın əsasını bilik təşkil edir,
onun yaradıcısı, daşıyıcısı və tətbiq edəni isə
insandır. Bu səbəbdən biliklərin əldə edilməsi və
fəaliyyətdə tətbiqi üçün ən vacib amil yalnız təhsildir.
Məhz təhsil intellektual potensialın
formalaşdırılmasında, maddi sərvətlərin insan kapitalına
çevrilməsində müstəsna əhəmiyyət daşıyır.
Seminarda çıxış edən TEC-in elmi rəhbəri, dosent İslam
Paşayev diqqətə çatdırdı ki, bu seminarları keçirməkdə
əsas məqsəd elmə, biliyə marağı olan tələbələri üzə
çıxarmaq, onlara elmi tədqiqat işlərinin aparılmasında
köməklik etmək və istiqamətləndirməkdir.
Tədbirdə tələbələrin sualları cavablandırıldı və fikir
mübadiləsi aparıldı. Tələbələr ilk seminar
məqalələrinin toplu şəklində çapdan çıxması münasibəti
ilə rektora təşəkkür etdilər.
Sonda Tələbə Elmi Cəmiyyətinin fəaliyyətinə həsr edilmiş
videoçarx nümayiş olundu.
SDU-nun Mətbuat xidməti |
