| |
|
 Abdulqədir ABDULLAYEV
1988-ci ildə anadan olub. Azərbaycan Dövlət
Bədən Tərbiyəsi və İdman Akademiyasını bitirib.
Boks idman növü ilə məşğul olur. "Baku Fires"
klubunda məşq edir. Məşqçisi Maqomed
Aripqadjievdir. 2004-cü ildən yarışlara qatılıb.
Dünya üzrə silsilə boks yarışlarının
iştirakçısıdır. I Avropa Oyunlarının boks
yarışları çərçivəsində 91 kq çəki dərəcəsində
döyüşən idmançı səkkizdəbir finalda macarıstanlı
Adam Hamoriyə qalib gəlib. Növbəti dörddəbir
finalda fransalı Paul Omba Biopqolayı
mübarizədən kənarlaşdırıb. Yarımfinalda rusiyalı
Sadam Maqomedovla qarşılaşan Abdulqədir onu da
3:0 hesabı ilə məğlub edib. Finalda isə onun
rəqibi Ukraynanı təmsil edən erməni boksçusu
Gevorq Manukyan olub. Rəqibi zədələnməsinə görə
oyundan imtina etdiyindən qələbə Abdulqədirə
verilib və o I Avropa Oyunlarının qızıl
medalına sahiblənib. |
|
|
 Pərviz BAĞIROV
1994-cü ildə anadan olub. Boksda yarımorta çəki
dərəcəsində (69 kq) döyüşür. "Neftçi" idman
klubunun üzvüdür. Burada məşqçi Vüqar
Ələkbərovun rəhbərliyi altında məşq edir.
Yarışlarda iştirakı 2007-ci ildən başlayıb.
İndiyədək bir sıra yüksək səviyyəli yarışlarda
iştirak edib. Ən yaddaqalan çıxışı 2011-ci ildə
olub. Həmin il İrlandiyanın paytaxtı Dublin
şəhərində keçirilən gənclər arasında Avropa
çempionatında 1-ci yeri tutub.
Pərviz I Avropa Oyunlarında da yarımorta çəki
(69 kq) dərəcəsində mübarizə aparıb. Rinqə ilk
olaraq səkkizdəbir finalda çıxıb. Bu mərhələdəki
döyüşündə moldovalı Vasili Belousu məğlub edən
idmançımız növbəti - dörddəbir finalda
almaniyalı Abass Baraunu mübarizədən
kənarlaşdırıb. Yarımfinalda böyük britaniyalı
Coş Kellini məğlub edən Pərviz finalda Rusiya
idmançısı Aleksandr Besputinlə qarşılaşıb. Öz
döyüş taktikası ilə rəqibini tamamilə çıxılmaz
vəziyyətə salan idmançımız yekunda qələbə
qazanıb və dövlətimizin himnini səsləndirib. |
|
|
 Albert SƏLİMOV
1986-cı ildə anadan olub. Azərbaycan Dövlət
Bədən Tərbiyəsi və İdman Akademiyasını bitirib.
İdmanın boks növü ilə məşğul olur. 1999-cu ildən
yarışlarda iştirak edir. "Baku Fires" klubunun
təmsilçisidir. Məşqçisi Nuri paşa Talıbovdur.
Mütaliə etməyi sevir. Ölkə və beynəlxalq
səviyyəli silsilə boks yarışlarının
iştirakçısıdır. Adətən 60 kq çəki dərəcəsində
rinqə çıxan Albert Səlimov I Avropa Oyunlarında
da boks yarışlarına bu çəki dərəcəsində qatılıb.
Mübarizəyə səkkizdəbir final mərhələsindən
başlayan Albert bu mərhələdə Gürcüstanı təmsil
edən Otar Eranosyanı məğlub edib. Dörddəbir
finalda Bolqarıstan idmançısı Elian Dimitrovu
3:0 hesabı ilə üstələyən idmançımız yarımfinalda
irlandiyalı boksçu Sin Makkombu mübarizədən
kənarlaşdırıb. Finalda rəqibi, fransalı idmançı
Sofian Qumulinə nisbətən olduqca cəld və
taktikalı döyüş nümayiş etdirən Albert Səlimov
çoxsaylı zərbələri ilə hər üç raundu üstün başa
vurub və çempion olub. İlk Avropa Oyunlarının
qalibləri sırasına düşən idmançımızın şərəfinə
Azərbaycanın Dövlət himni ifa olunub.
|
|
|
 İlham ZƏKİYEV
1980-ci ildə Sumqayıtda anadan olub. Sumqayıt
şəhər 5 nömrəli tam orta məktəbin məzunudur. 15
yaşından idmanın cüdo növü ilə məşğuldur.
1998-ci ildən bir sıra yarışlarda iştirak edib.
Gənclər arasında keçirilən Avropa
birinciliyinin qaliblərindən, sambo üzrə
yeniyetmələr arasında respublika çempionu olub.
1999-cu ildə hərbi xidmətdə olarkən yaralanan
İ.Zəkiyev ordudan tərxis olunduqdan sonra
paralimpiyaçıların sırasında cüdo yarışlarında
iştirak edir. 2004 və 2008-ci illər Afina və
Pekin Olimpiya oyunlarında 100 kq-dan yuxarı
çəki dərəcəsində çempion olub və qızıl medal
qazanıb. 2012-ci il London Paralimpiya
Oyunlarında bürünc medal alıb.
2003-cü ildə Kvebekdə (Kanada), 2006-cı ildə
Brommatda keçirilən dünya çempionatında bürünc,
2007 və 2010-cu illərdə San Paulada və Antalyada
təşkil olunmuş dünya çempionatlarında gümüş
medallar qazanıb. 2005-ci ildən bəri 5 dəfə
Avropa çempionu (2005, 2007, 2009, 2011, 2013)
olub. Əməkdar idman ustasıdır. "Şöhrət" ordeni
və "Tərəqqi" medalı ilə təltif olunub. Heydər
Əliyev Fondunun təsis etdiyi "Qızıl çinar"
mükafatının laureatıdır.
İlham Zəkiyev I Avropa Oyunlarında da
paracüdoçular sırasında 90 kq-dan yuxarı çəki
dərəcəsində mübarizə aparıb. Yarışa yarımfinal
mərhələsindən qoşulan Paralimpiya çempionu
finala gedən yolda Yunanistan idmançısı Klimis
Papaçistosla üz-üzə gəlib və ona 27 saniyə
ərzində ipponla qalib gəlib. Həlledici mərhələdə
rəqibi ukraynalı Aleksandr Pominov olub. İlham
bu döyüşü də inamla udaraq çempion olub.
|
|
|
Elvin MƏMİŞZADƏ 
1991-ci ildə anadan olub. Azərbaycan Dövlət
Bədən Tərbiyəsi və İdman Akademiyasını bitirib.
İdmanın boks növü ilə məşğul olur. Yarışlara
1999-cu ildən başlayıb. "Gilan" klubunda məşqçi
Elbrus Rzayevin rəhbərliyi altında məşq edir.
Sanballı idman uğurları var. Belə ki, 2007-ci
ildə yeniyetmələr arasında Avropa çempionatında
I yeri tutub. 2009-cu il Avropa çempionatında da
(gənclər) I olub. 2010-cu il Avropa
çempionatında və Avropa Kubokunda 2-ci yeri
tutub. 2013-cü il Avropa çempionatının bürünc
medalçısı, "Böyük İpək Yolu" turnirinin (Bakı)
qalibidir.
Elvin I Avropa Oyunlarında da ənənəvi olaraq
çıxış etdiyi yüngülvari çəki (52 kq) dərəcəsində
mübarizə aparıb. Əvvəlki döyüşlərdə olduğu kimi
I Avropa Oyunlarının çempionu adı uğrunda
döyüşlərdə də yüksək mübarizə əzmi göstərib.
Səkkizdəbir final mərhələsində irlandiyalı Mayls
Kaseyi, dörddəbir final mərhələsində
bolqarıstanlı Daniel Asenovu, yarımfinalda isə
almaniyalı Həmzə Tubanı mübarizədən
kənarlaşdırıb. Azərbaycan Respublikasının
Prezidenti İlham Əliyev, xanımı Mehriban Əliyeva
və ailə üzvlərinin izlədikləri final görüşündə
Elvin İtaliya təmsilçisi Vinçenzo Pikardi ilə
qarşılaşıb. Hər üç raundu üstün başa vuraraq 3:0
hesabı ilə qələbə qazanan idmançımız çempion
olub. |
|
|
 Lorenzo
SOTOMAYOR
1985-ci ildə anadan olub. Kubalıdır. 2013-cü
ildən Azərbaycan milli komandasının tərkibində
yarışlarda iştirak edir. Azərbaycan boksçusu
kimi debütü 2013-cü il dekabrın 19-da Rusiyanın
Xantı-Mansiysk şəhərində Sibirdə ilk dəfə nefti
kəşf edən həmyerlimiz Fərman Salmanovun
xatirəsinə həsr olunmuş boks üzrə Neft
Ölkələrinin Dünya Kuboku turnirində olub.
Sotomayor "Qəbələ" idman klubunda çalışan kubalı
məşqçi Lazaro Jimenez Martinezin yetirməsidir.
Birinci yarımorta (64 kq) çəki dərəcəsində
mübarizə aparan Lorenzo Sotomayor bir sıra
beynəlxalq səviyyəli boks yarışlarında uğurla
iştirak edib.
I Avropa Oyunlarına da yarışlardan biri öncəsi
dediyi kimi "Qızıldan başqa medal məni
maraqlandırmır" qətiyyəti ilə qatılan Sotomayor
bu oyunlarda yüksək ustalıq və əzmkarlıq nümayiş
etdirib. Yarışlara onaltıdabir finaldan başlayan
idmançımız bu mərhələdə sloveniyalı Edin
Sejdinoviçi məğlub edib. Səkkizdəbir finalda
moldovalı Dmitri Qalaqotu da mübarizədən
kənarlaşdıran Sotomayor dörddəbir finalda
rumıniyalı Daniel Nikulesku ilə qarşılaşıb və
qələbə qazanıb.
Yarımfinalda Ukrayna boksçusu Viktor Petrovu da
udan milli yığmamızın kubaəsilli üzvünün finalda
rəqibi daha güclü olub. Buna baxmayaraq o,
London Olimpiya Oyunlarının bürünc mükafatçısı
olan italiyalı Vinçenzo Mangiakapzeyə heç bir
şans verməyib və beş ardıcıl qələbə nəticəsində
ilk Avropa Oyunlarının qalibi olub. |
|
|
 Teymur
MƏMMƏDOV
1993-cü ildə Bakıda anadan olub. Azərbaycan
Dövlət Bədən Tərbiyəsi və İdman Akademiyasının
məzunudur. "Rabitə" idman klubunda məşqçi İlham
Əlimzanovun rəhbərliyi altında məşq edir.
2003-cü ildən beynəlxalq yarışlarda iştirak edir.
2011-ci ildə Bakıda keçirilən dünya
çempionatında II, Ankarada keçirilən Avropa
çempionatında I yerləri tutub. 2012-ci il London
Olimpiya Oyunlarının bürünc mükafatçısıdır.
2013-cü ildə Almatı şəhərində keçirilən dünya
çempionatında 3-cü yerə, Avropa çempionatında
isə II yerə çıxıb. I Avropa Oyunlarında boks
yarışlarında 81 kq çəki dərəcəsində iştirak edən
Teymur Məmmədov 1/16 final mərhələsində böyük
britaniyalı Coşuna Buatsini, 1/8 final
mərhələsində polşalı Jordan Kalınskini,
dörddəbir final mərhələsində danimarkalı Peter
Müllekberqi, yarımfinalda isə rusiyalı Pavel
Silyaqini mübarizədən kənarlaşdırıb. Finalda da
italiyalı Valentino Manfredoniaya qarşı inamla
və əzmlə döyüşərək ona 3:0 hesabı ilə qalib
gəlib və I Avropa Oyunlarının çempionu olub.
Beləliklə o, Azərbaycana 15-ci qızıl medalı
qazandırıb. T.Məmmədova və digər mükafatçılara
medalları Prezident İlham Əliyev təqdim edib.
|
