|
 İyunun
29-da Bakı Dövlət Universitetində Azərbaycan milli
mətbuatının 140 illik yubileyinə həsr olunan "Azərbaycan
milli mətbuatı-140: "Əkinçi" ənənələri və müasir
jurnalistika" mövzusunda elmi-praktik konfrans keçirilib.
Tədbirdə Azərbaycan Respublikası Prezidentinin
ictimai-siyasi məsələlər üzrə köməkçisi Əli Həsənov,
Mətbuat Şurasının sədri Əflatun Amaşov, Azərbaycan
Respublikasının Prezidenti yanında Kütləvi İnformasiya
Vasitələrinin İnkişafına Dövlət Dəstəyi Fondunun sədri
Vüqar Səfərli, KİV rəhbərləri, Bakı Dövlət
Universitetinin professor-müəllim heyəti iştirak
ediblər.
Konfransın plenar iclasını giriş sözü ilə Bakı Dövlət
Universitetinin rektoru, Milli Məclisin deputatı,
akademik Abel Məhərrəmov açaraq ölkəmizdə milli
mətbuatın 140 illik yubileyinin geniş qeyd olunduğunu,
bununla əlaqədar paytaxtda, eləcə də bölgələrdə bir sıra
tədbirlərin keçirilməsinin nəzərdə tutulduğunu, bu
elmi-praktik konfransın da həmin silsilədən olduğunu
söyləyib.
KİV nümayəndələrinin əksəriyyətinin BDU-nun məzunları
olduğunu söyləyən rektor çıxışının sonunda mətbuat
işçilərini təbrik edərək onlara fəaliyyətlərində
nailiyyətlər arzulayıb.
Azərbaycan Respublikası Prezidentinin ictimai-siyasi
məsələlər üzrə köməkçisi Əli Həsənov konfransda çıxış
edərək Prezident İlham Əliyevin milli mətbuatımızın 140
illik yubileyi ilə bağlı imzaladığı sərəncamın
əhəmiyyətindən danışıb.
Prezident Administrasiyasının rəsmisi Azərbaycan
mediasının bugünkü inkişafı istiqamətində dövlətimizin
yürütdüyü siyasət, onun mahiyyəti, ölkəmizdə KİV-in
vəziyyəti və milli jurnalistikamızdan gözləntilər barədə
fikirlərini diqqətə çatdırıb. Müstəqil Azərbaycan
mediasının təməlini ümummilli lider Heydər Əliyevin
qoyduğunu söyləyən Əli Həsənov bu dahi şəxsiyyətin
1998-ci il 6 avqust tarixli fərmanı ilə Azərbaycanda
media ilə bağlı bütün tənzimləyici dövlət
mexanizmlərini, o cümlədən senzuranı ləğv etdiyini
bildirib.
Sonda professor Əli Həsənov Milli Mətbuat günü
münasibətilə media nümayəndələrini təbrik edib, onlara
daha böyük uğurlar arzulayıb.
Azərbaycan Mətbuat Şurasının sədri Əflatun Amaşov,
BDU-nun jurnalistika fakültəsinin dekanı, professor
Şamil Vəliyev, professor Cahangir Məmmədli, professor
Şirməmməd Hüseynov milli mətbuatımızın keçdiyi tarixi
yola nəzər salıb, "Əkinçi" qəzetinin yaranmasından,
Həsən bəy Zərdabinin əvəzsiz xidmətlərindən, müasir
mətbuat üçün yaradılan şəraitdən danışıblar.
Sonra mükafatlandırma mərasimi olub.
Azərbaycan Respublikası Prezidentinin ictimai-siyasi
məsələlər üzrə köməkçisi Əli Həsənov ölkəmizdə elmin və
təhsilin inkişafına verdiyi böyük dəstəyə, gənclərdə
sağlam düşüncənin formalaşmasındakı əvəzsiz roluna,
məzunu olduğu Bakı Dövlət Universitetinə göstərdiyi
yüksək qayğıya, dövlətçiliyimizin qorunmasındakı
müstəsna xidmətlərinə görə "Universitetin dostu"
mükafatına layiq görülüb.
Bir sıra mətbuat nümayəndəsinə, o cümlədən qəzetimizin
baş redaktoru Bayram Hüseynzadəyə Bakı Dövlət
Universiteti haqqında informasiyaların rəhbərlik etdiyi
qəzetdə obyektiv, dolğun və davamlı işıqlandırıldığına
görə və Azərbaycan Milli Mətbuatının 140 illik yubileyi
münasibətilə "BDU-ya informasiya dəstəyi" xatirə
mükafatları təqdim edilib.
Konfrans öz işini bölmə iclaslarında davam etdirib.
Samirə KƏRİMOVA,
"Azərbaycan müəllimi" |
