|
"Mənim universitetim" layihəsinin budəfəki hədəfi Bakı
Slavyan Universitetidir
Rüfanə GÜNƏŞ,
"Azərbaycan müəllimi"
r.qurbanova@muallim.edu.az
 1946-cı ildə SSRİ Xalq Komissarları
Sovetinin sərəncamı və Azərbaycan SSR Nazirlər Sovetinin
qərarı əsasında ikiillik M.F.Axundov adına Azərbaycan
Dövlət Müəllimlər İnstitutu yaradılıb. 1952-ci ildə
M.F.Axundov adına Müəllimlər İnstitutu rus dili
müəllimləri hazırlığı üzrə dördillik tədris müddətli
pedaqoji instituta çevrilib. 1956-1957-ci tədris ilində
institut beşillik təhsil sisteminə keçirilib. 1959-cu
ildə M.F.Axundov adına Azərbaycan Pedaqoji Rus Dili və
Ədəbiyyatı İnstitutu və Azərbaycan Pedaqoji Xarici
Dillər İnstitutu bazaları əsasında M.F.Axundov adına
Azərbaycan Pedaqoji Dillər İnstitutu yaradılıb. 1972-ci
ildə respublikanın rəhbəri Heydər Əliyevin təşəbbüsü ilə
M.F.Axundov adına Azərbaycan Pedaqoji Dillər
İnstitutunun bazasında eyniadlı Azərbaycan Pedaqoji Rus
Dili və Ədəbiyyatı İnstitutu bərpa edilib. Azərbaycan
Respublikasının Prezidenti Heydər Əliyevin 13 iyun
2000-ci il tarixli fərmanı ilə M.F.Axundov adına
Azərbaycan Pedaqoji Rus Dili və Ədəbiyyatı İnstitutunun
bazasında Bakı Slavyan Universiteti yaradılıb.
2000-2014-cü illərdə universitetə akademik Kamal
Abdullayev rəhbərlik edib. Hazırda universitetdə
bakalavriat pilləsi üzrə 33 ixtisasda 2911, magistratura
pilləsi üzrə 32 ixtisaslaşmada 179 tələbə təhsil alır.
Onlardan 199 nəfəri xarici tələbədir. Hazırda BSU-da
186 doktorant və dissertant təhsil alır. Fəlsəfə
doktoru proqramı üzrə 126, elmlər doktoru proqramı üzrə
təhsil alanlar 46, əcnəbi tələbələr isə 14 nəfərdir.
2014-cü ildə 863 nəfər tələbə məzun adını qazanıb.
2014-2015-ci tədris ilində BSU-ya 736 tələbə qəbul
olunub. Universitetin 1039 əməkdaşı var. 2014-cü ildə
universitetin 29 kafedrasında 520 nəfər
professor-müəllim heyəti fəaliyyət göstərib. Onlardan 1
nəfəri AMEA-nın həqiqi üzvü, 39 nəfəri elmlər doktoru,
professor, 5 nəfəri elmlər doktoru, dosent, 151 nəfəri
fəlsəfə doktoru, dosent, 53 nəfər fəlsəfə doktoru, 271
nəfər baş müəllim və müəllimdir. Ali təhsil ocağına
2014-cü ilin martından etibarən filologiya elmləri
doktoru, professor Asif Hacıyev rəhbərlik edir.
Fakültə və şöbələr
 Universitetdə
tədris prosesi 5 fakültədə (filologiya, pedaqoji,
tərcümə, beynəlxalq münasibətlər və regionşünaslıq,
jurnalistika və Azərbaycan dili və ədəbiyyatı), qiyabi,
magistratura, əlavə təhsil şöbələrində aparılır.
BSU-nun nəzdində Məktəb-Lisey Kompleksi, ictimai
əsaslarla fəaliyyət göstərən İctimai-Siyasi Elmlər
İnstitutu və Rus Dili İnstitutu mövcuddur.
Mövcud ixtisaslarla yanaşı, növbəti tədris ili üçün
"Təhsildə sosial-psixoloji xidmət" ixtisası üzrə tələbə
qəbulu elan edilib.
Maddi-texniki baza
Universitetin iki tədris korpusu, 4 yataqxanası var.
Kafedralarla yanaşı, 6 elmi-tədqiqat laboratoriyası, 7
tədris-mədəniyyət mərkəzi, idman və akt zalları, tədris
otaqları müasir kompüter, elektron lövhə, proyektor və
başqa lazımi avadanlıqlarla təchiz edilib.
 Elmi-tədqiqat laboratoriyaları
("Türk-slavyan əlaqələri", "Folklor araşdırmaları",
"Lüğət mərkəzi", "Ölkəşünaslıq", "Tərcümə problemləri"
və "Azərbaycanşünaslıq tədris-mədəniyyət mərkəzi") öz
fəaliyyətini universitetdə aparılan elmi-tədqiqat və
tədris-metodiki işlər istiqamətində qurur.
"Türk-slavyan əlaqələri" elmi-tədqiqat
laboratoriyası
(ETL) 2001-ci ildə yaradılıb. Laboratoriyanın işində
dil və ədəbiyyat məsələləri ilə yanaşı, avrasiyaçılıq
tədqiqatları da əsas yer tutur. Türk-slavyan əlaqələri
(dil, ədəbiyyat, tarix, mədəniyyət), Şərq-Qərb
ədəbi-mədəni dialoqu problemi laboratoriya
tədqiqatlarının prioritet istiqamətidir.
"Lüğət mərkəzi" ETL.
"Lüğət mərkəzi" elmi-tədqiqat laboratoriyası 1971-ci
ildən fəaliyyət göstərir. Fəaliyyəti dövründə bir sıra
mühüm layihələr həyata keçirilmişdir ki, bunlardan ilk
növbədə dördcildli "Azərbaycanca-rusca lüğət"in
tərtibini göstərmək olar. Ötən il Lüğət mərkəzi
respublika əhəmiyyətli layihə olan çoxcildli yeni
"Rusca-azərbaycanca lüğət" üzərində işini davam etdirib.
Laboratoriyada ayda bir dəfə leksikoqrafiyadan seminar
keçirilir ki, burada lüğətçiliyin nəzəri və praktik
məsələləri müzakirə edilir,
nəticələr "Rusca-azərbaycanca
lüğət"in tərtibi ilə əlaqələndirilir. Lüğət mərkəzi
elmi-tədqiqat laboratoriyasının hər ayın sonunda
keçirilən iclasında ay ərzində görülən işlərə yekun
vurulur, əldə edilən nəticələr qiymətləndirilir. Həftədə
bir dəfə keçirilən işçi müşavirələrdə isə həftəlik
tapşırığın yerinə yetirilməsi nəzərdən keçirilir.
 "Tərcümə problemləri" ETL.
2003-cü ildə yaradılıb. Laboratoriya fəaliyyətini
müxtəlif elmi istiqamətlər üzərində qurub.
Ötən il laboratoriyanın fəaliyyəti əsasən beş
istiqamətdə olub. "Filoloqun kitabxanası-100",
"Türkologiya", "Dünya nəsri" və "Azərbaycanşünaslıq"
seriyalarından əsərlərin seçilməsi, tərcümələrin təşkil
edilməsi, tərcümələrin yığılması, redaktə olunub çapa
verilməsi və Azərbaycan Tərcümə Ensiklopediyasının çapa
hazırlanması laboratoriya qarşısında duran əsas
məsələlərdir.
2014-cü ildə laboratoriya fəaliyyətini əsasən "Filoloqun
kitabxanası - 100" seriyasından olan əsərlərin tərcüməsi
üçün müqavilələr bağlanmış kitabların tərcümə və redaktə
işlərinin sürətləndirilməsi üzərində qurub. Adıçəkilən
seriyadan bir sıra kitabların: F.Nitşenin "Zərdüşt belə
söylədi", B.Tomaşevskinin "Ədəbiyyat nəzəriyyəsi",
A.Losevin "İntibah estetikası", "XIX əsrin ikinci yarısı
- XX əsrin əvvəllərində rus fəlsəfi fikri" toplusu
üzərində tərcümə və redaktə işi başa çatdırılıb.
"Ölkəşünaslıq" ETL
2003-cü ildə yaradılıb. Elmi-tədqiqat laboratoriyasının
məqsədi slavyan ölkələri, həmçinin Azərbaycan, Türkiyə,
Yunanıstan və s. ölkələrə dair sistemli şəkildə məlumat
və elmi materiallar toplamaq, onları təhlil etmək, əldə
edilmiş nəticəni "Regionşünaslıq" istiqaməti üzrə tədris
prosesinə tətbiq etmək, eyni zamanda göstərilən
ölkələrin tarixi, mədəniyyəti, beynəlxalq münasibətləri,
siyasi sistemi, ictimai-siyasi və fəlsəfi fikri üzrə
elmi-tədqiqat işləri aparmaqdır.
"Ölkəşünaslıq" elmi-tədqiqat laboratoriyası BSU-da
tədris edilən regionların və ayrı-ayrı ölkələrin
coğrafiyasını, iqtisadiyyatını, sosial-mədəni mühitini,
konfessional şəraitini, geopolitikasını, daxili və
xarici siyasətini, həmin ölkələrin qarşılıqlı
əlaqələrini və s. araşdıraraq onları kompleks şəkildə
öyrənir. BSU-da "Azərbaycanşünaslıq" ixtisası da tədris
edildiyi üçün laboratoriya öz elmi potensialından
istifadə edərək müxtəlif ölkələrin xarici siyasətində
Azərbaycanın yerini, ölkəmizin digər dövlətlər və
beynəlxalq strukturlarla qarşılıqlı münasibətlərini,
eyni zamanda Ermənistan - Azərbaycan, Dağlıq Qarabağ
münaqişəsi də daxil olmaqla Qafqazda baş verən
münaqişələri də araşdırır.
 Laboratoriya
əməkdaşlarının elmi fəaliyyəti müxtəlif region
ölkələrinin tarix, etnomədəni, dil, konfessiya,
iqtisadiyyat, xarici siyasət, siyasi sisteminin
araşdırılması və tədqiqi ilə bağlıdır. 2014-cü ildə
laboratoriya 4 elmi-nəzəri seminar keçirib.
"Azərbaycanşünaslıq" tədris-mədəniyyət
mərkəzi.
Çağdaş Azərbaycanın və azərbaycanşünaslığın öyrənilməsi,
təbliği və tədrisi problemləri mərkəzin fəaliyyətinin
əsas istiqamətini təşkil edir. Burada Azərbaycan dili,
ədəbiyyatı, mədəniyyəti və tarixi problemləri ilə məşğul
olan mütəxəssislər müasir azərbaycanşünaslığın elmi
prinsiplərini müəyyənləşdirir, tədrisdə tətbiqi yolları
üzərində çalışırlar.
"Azərbaycanşünaslıq" tədris-mədəniyyət mərkəzinin
əməkdaşları 2014-cü ildə tədris və elmi-tədqiqat
sahələrində müvafiq işlər həyata keçirib. 2014-cü ilin
fevralında Ural Federal Universitetində Azərbaycan dili
və mədəniyyəti mərkəzinin açılışı olub. Laboratoriyanın
bazasında ulu öndərin anadan olmasının ildönümünə həsr
olunmuş "Azərbaycanşünaslığın aktual problemləri" V
Beynəlxalq elmi konfransı keçirilib. Konfransda 20
ölkədən 70 nəfərə yaxın xarici iştirakçı təmsil olunub.
 "Azərbaycanşünaslıq"
tədris-mədəniyyət mərkəzi əməkdaşlarının hazırladıqları
"Azərbaycanşünaslığa giriş" tədris vəsaiti Təhsil
Nazirliyi tərəfindən təsdiq olunub və nəşr edilib.
Laboratoriya BSU-nun xaricdə fəaliyyət göstərən
Azərbaycan dili və mədəniyyəti mərkəzlərini lazımi elmi,
tədris-metodiki və sorğu ədəbiyyatları ilə təmin
olunmasına kömək edib.
Pedaqoji və istehsalat təcrübəsi
Pedaqoji təcrübə. Universitetin pedaqoji və
filologiya fakültələrinin II, III, IV kurs
tələbələrinin pedaqoji təcrübə keçmələri üçün Bakı
şəhərinin müxtəlif məktəbləri ilə ikitərəfli
müqavilələr bağlanmış və həmin məktəblərdə pedaqoji
təcrübə təşkil olunur.
Artıq uzun müddətdir ki, tələbələrin müəyyən hissəsinin
pedaqoji təcrübəsi qaçqın və məcburi köçkünlərin
müvəqqəti məskunlaşdıqları müxtəlif rayonlarda
fəaliyyət göstərən qaçqın orta məktəblərində
aparılır. BSU-da keçirilən və ulu öndərin xatirəsinə
həsr olunan ənənəvi şagird-tələbə elmi konfransına bu il
də qaçqın və köçkün məktəblərin istedadlı şagirdləri
dəvət olunub və onların elmi konfransa hazırlığında
universitetin professor-müəllim heyətinin iştirakı təmin
edilib. Pedaqoji təcrübə zamanı orta məktəblərin
şagirdlərindən ibarət qrupların Bakı Slavyan
Universitetinə ekskursiyaları təşkil olunur. Onlar
universitet həyatında baş verən yeniliklərlə tanış olur,
müxtəlif fənlər üzrə dərslərdə iştirak edir və
universitet haqqında geniş məlumat alır, "Heydər Əliyev
Məktəbi" Tələbə Teleradio Studiyasında çıxışlar edirlər.
 İstehsalat təcrübəsi. Universitetin
Tərcümə, beynəlxalq münasibətlər və regionşünaslıq,
jurnalistika fakültələrinin II və III kurs
tələbələrinin müxtəlif müəssisə və təşkilatlarda
istehsalat təcrübəsi təşkil olunur. Həmin müəssisə və
təşkilatlarla ikitərəfli müqavilə bağlanılır.
Folklor təcrübəsi. Universitetin Azərbaycan
və rus filologiyası üzrə təhsil alan II kurs
tələbələrinin folklor təcrübəsi Azərbaycanın müxtəlif
bölgələrində təşkil olunur. Toplanmış orijinal
materiallar universitetin "Folklor araşdırmaları"
laboratoriyasında mütəxəssislər tərəfindən
araşdırılır, yoxlanılır və rəy verilir. Filoloq
tələbələrin İsmayıllı rayonunun İvanovka kəndində
topladıqları folklor nümunələri kitab şəklində nəşrə
hazırlanmışdır. Bağlanılmış müqavilələrə uyğun olaraq
tələbələr Türkiyə, Rusiya, Ukrayna, Polşa, Çexiya,
Almaniya, Bolqarıstan və digər xarici ölkələrin nüfuzlu
universitetlərində də istehsalat təcrübəsi keçirlər.
"Heydər Əliyev Məktəbi" Tələbə
Teleradio Studiyası
2008-ci ildə yaradılıb. Studiyanın məqsədi jurnalistika
ixtisası üzrə təhsil alan tələbələrin istehsalat
təcrübəsinin səmərəli keçirilməsinə, onların əyani
vəsaitlərdən istifadə qaydalarına yiyələnmələrinə və
təhsilin keyfiyyətinin daha da yüksəldilməsinə yardım
etməkdir.
Radiostudiyanın həftəlik proqramında bir çox
verilişlərlə yanaşı universitet xəbərləri yer tutur,
klassik və xalq mahnıları, slavyan xalqlarının folklor
və estrada musiqisi səsləndirilir.
Radioverilişlərin hazırlanması və efirə verilməsində
yalnız jurnalist tələbələr deyil, həm də gələcəyin
müəllimləri, tərcüməçiləri, regionşünasları və
filoloqları da fəal iştirak edirlər.
Studiya eyni zamanda universitetdə keçirilən görüşlərin
və tədbirlərin videolentə alınması, BSU-nun
videosalnaməsinin yaradılması, tələbə həyatından bəhs
edən filmlərin çəkilişi, müxtəlif janrlı verilişlərin
hazırlanması və s. ilə məşğul olur.
Universitetdə keçirilən elmi konfransların, ustad
dərslərinin, rəsmi görüşlərin və digər tədbirlərin
iştirakçıları, xarici qonaqlar tələbə radiosuna müsahibə
verir və öz təəssüratlarını bölüşürlər.
Elmi-tədqiqat işləri
Bakı Slavyan Universitetinin elmi fəaliyyəti və
aparılan elmi-tədqiqat işləri bu ali məktəbin profilinə
uyğun bir sıra mühüm elmi problemlərin araşdırılması,
alınan nəticələrin tədrisə tətbiqi yollarının müəyyən
edilməsi istiqamətində qurulub.
Universitetdə elmi-tədqiqat və elmi-metodiki iş əsas
etibarı ilə kafedralarda cəmlənib. Bu işin əhəmiyyətli
bir hissəsi də burada fəaliyyət göstərən elmi-tədqiqat
laboratoriyaları tərəfindən yerinə yetirilir.
Elmi-tədqiqat fəaliyyəti perspektiv və cari planlar
əsasında aparılır. Həmin planlar kafedra və ya
laboratoriya iclaslarında, fakültə və universitet elmi
şuralarında təsdiq edilir. Kafedralarda və ETL-də
aparılan elmi-tədqiqat işlərinin koordinasiyası, onların
icrasının təmin edilməsi və görülən işlərin
ekspertizasının təşkili, alınan elmi nəticələrin
təbliği, universitetdə istehsal olunan elmi məhsulların
müasir standartlara uyğunluğunun təmin edilməsi məqsədi
ilə universitetdə Elm və elmi-tədqiqat laboratoriyaları
və Elmi nəşrlər şöbələrinin bazasında Elmi tədqiqatlar
və innovasiyalar şöbəsi yaradılıb. Doktorantura və
dissertantura şöbəsi isə fəlsəfə və elmlər doktoru
proqramları üzrə elmi-pedaqoji kadrların hazırlanması
işini əlaqələndirir, doktorant və dissertantların nail
olduqları elmi nəticələrin təşviqi sahəsində iş aparır.
Ötən il elmi-tədqiqat işləri 5 əsas istiqamət üzrə
aparılıb. Ümumilikdə 516 elmi-tədqiqat işi barədə
hesabat və ya nəticələr təqdim olunub. Nəşr olunmuş elmi
işlərin ümumi sayı 818 , məqalələrin ümumi sayı 350-dir.
Onlardan 260-ı respublikada, 90-ı (o cümlədən 2-si
impakt-faktoru olan jurnallarda - 2) xaricdə dərc
olunub.
BSU-nun professor-müəllim heyətinin 2014-cü ildə yerinə
yetirdiyi ETİ-nin nəticələri bilavasitə tədris
prosesində tətbiq olunub. Hazırlanmış dərslik, dərs
vəsaitləri, metodik işləmələr və tövsiyələr, müxtəlif
tipli lüğətlər universitetdə tədris olunan fənlərin
tələbələr tərəfindən daha dərindən və hərtərəfli
mənimsənilməsinə yönəlib. İl ərzində BSU-da 4 elmi
konfrans keçirilib. Ümummilli lider Heydər Əliyevin
xatirəsinə həsr olunan "Azərbaycanşünaslığın aktual
problemləri" V Beynəlxalq elmi konfransı universitetin
xarici əlaqələri, elmi tədqiqatları və tədris fəaliyyəti
üçün müstəsna əhəmiyyət kəsb edib.
Tələbələrin elmi-tədqiqat işinin
təşkili
Tələbə Elmi Cəmiyyəti (TEC) tələbələrin bilik və
bacarıqlarının, elmi-tədqiqat fəaliyyətinin inkişafına
təsir göstərən, müasir elmin müxtəlif sahələrini əhatə
edən tələbə elmi konfransları, elmi seminarlar keçirir.
Tələbə elmi tədqiqatlarının nəticələri tematik
məcmuələrdə və tezis toplularında dərc olunur.
2014-cü ildə tələbələrin həm Bakı Slavyan Universiteti,
həm də digər universitetlərdə təşkil olunmuş konfrans,
forum, müxtəlif seminar və "dəyirmi masa"larda iştirakı
təmin olunub.
2014-cü təqvim ilində universitetin magistratura
pilləsində təhsil alan tələbələr ixtisaslarına müvafiq
olaraq, magistr dissertasiyaları çərçivəsində
elmi-tədqiqat işini yerinə yetirməklə yanaşı,
universitetin elmi həyatında da fəal iştirak ediblər.
2015-ci il 15-16 may tarixlərində Sumqayıt Dövlət
Universitetində keçirilən Magistrantların XIV Respublika
elmi konfransına BSU magistrantlarının 134 tezisi
göndərilib və bölmə iclaslarında maraqlı məruzələri
dinlənilib.
Tələbə Elmi Cəmiyyətinin üzvləri universitetin təşkil
etdiyi beynəlxalq elmi konfransların təşkilati işlərinə
fəal şəkildə cəlb edilirlər.
Kitabxana
1946-cı ildən fəaliyyətə başlayıb. Əsas tədris korpusu
ilə yanaşı, II tədris korpusunda da qiraət zalı və
tədris ədəbiyyatı şöbəsi fəaliyyət göstərir.
Kitabxananın ümumi fondu - 411603 nüsxədir. 2014-cü ildə
buraya 3032 nüsxə kitab daxil olub. Bunlardan 554 nüsxə
elmi, 1423 nüsxə dərslik, 780 nüsxə bədii ədəbiyyat
olub. Kitabxana fondunun böyük hissəsi rus dilində olan
kitablardır. Burada həmçinin Azərbaycan, ingilis, yunan,
polyak, slovak, çex, türk, alman, fransız, Ukrayna və s.
dillərində olan ədəbiyyatlar var.
Cari tədris ilində yeni ixtisaslar üzrə elmi-metodiki
ədəbiyyatlar əldə olunub, tədris ehtiyacları üçün vacib
olan xarici mətbuat orqanlarının abunəsinə diqqət
yetirilib.
Ədəbiyyat kafedraları ilə birgə kitabxana 10 ildən artıq
bir müddətdə universitetdə reallaşmaqda olan və bütün
fakültələri əhatə edən "Bədii oxu" layihəsinə də dəstək
verir.
Elmi jurnalların nəşri
Elmi-tədqiqat işlərinin informasiya təminatı Bakı
Slavyan Universitetində dərc olunan elmi jurnalların və
keçirilən elmi konfransların köməyilə, eləcə də
əməkdaşların BSU-nun tərəfdaşlıq etdiyi ali məktəb və
elmi müəssisələrə elmi məzuniyyətləri, başqa
informasiya mübadiləsi imkanlarından istifadə yolu ilə
həyata keçirilir.
Bu sahədə əhəmiyyətli vasitələrdən biri də nəşriyyat
fəaliyyətidir. BSU-da başqa sadalanan və bundan sonra
adları çəkiləcək nəşrlərlə yanaşı, nəşri 2004-cü ildə
bərpa olunmuş "Bakı Slavyan Universitetinin Elmi
əsərləri" (bundan sonra "Elmi əsərlər") toplularıdır.
"Elmi əsərlər"in həm "Dil və ədəbiyyat" seriyasının,
həm də "İctimai və siyası elmlər" seriyasının ildə 2
nömrəsi işıq üzü görür. BSU alimlərinin işləri ilə
yanaşı, Azərbaycanın digər elm və tədris ocaqları
əməkdaşlarının, xarici ölkələrdən, o cümlədən, Rusiya,
Ukrayna, Finlandiya, Polşadan olan tanınmış
mütəxəssislərin məqalələri də çap üçün qəbul olunur.
"Elmi əsərlər"in hər iki seriyası Azərbaycan
Respublikası Prezidenti yanında Ali Attestasiya
Komissiyasının "Azərbaycan Respublikasında
dissertasiyaların əsas nəticələrinin dərc olunması üçün
tövsiyə edilən elmi nəşrlərin siyahısı"na daxildir.
BSU-nun "Elmi əsərlər"inin əsas istiqamətlərindən biri
müxtəlif elmi təşkilat və dünya universitetləri ilə
birgə layihələrin həyata keçirilməsidir. Bununla
əlaqədar universitet dünyanın digər ali məktəbləri ilə
birlikdə müştərək elmi jurnallar nəşr edir. Növbəti
illərdə bu təcrübə davam etdiriləcək.
Azərbaycan Respublikası Prezidenti yanında Ali
Attestasiya Komissiyasının tövsiyə etdiyi nəşrlər
arasında universitetin "Tağıyev oxuları" elmi
məcmuəsini, BSU-nun iştirakı ilə buraxılan "Humanitar
elmlərin aktual problemləri" ali məktəblərarası elmi
məqalələr toplusunu qeyd etmək olar.
BSU tərəfindən nəşri həyata keçirilən "Azərbaycanda rus
dili və ədəbiyyatı" elmi-metodiki və mədəni-ictimai
jurnalı xüsusi əhəmiyyət kəsb edir.
Beynəlxalq əlaqələr
Bakı Slavyan Universiteti 21 ölkənin 85 universiteti
ilə əməkdaşlıq edir. 2014-cü ildə xarici ölkələrin 7 ali
məktəbi ilə ikitərəfli müqavilələr imzalanıb. 2014-cü
ildə bir sıra xarici ölkə universitetlərindən tanınmış
alimlər, xarici ölkələrin dövlət və hökumət adamları,
səfirlər Bakı Slavyan Universitetinin qonağı olub,
doktorant və dissertantlar, magistrant və tələbələr üçün
mühazirələr oxuyub, elmi seminar və ustad dərsləri
keçiblər.
Xarici ali məktəblərlə birgə həyata keçirilən beynəlxalq
proqramların sayı 7-dir. Bunlar TEMPUS (QATMİ,
CURDEUS), Erasmus Mundus (IANUS I, IANUS II), Youth in
Action, Azərbaycanda jurnalistikanın tədrisinin
inkişafına dəstək, Dövlətlərarası Humanitar Əməkdaşlıq
Fondu, MDB-nin Şəbəkə Universiteti, "Mövlanə" mübadilə
proqramıdır. 2014-2015-ci tədris ilində IANUS I
layihəsi üzrə BSU-nun 5 nəfər tələbəsi, IANUS II
layihəsi üzrə isə 6 nəfər tələbəsi xaricdə təhsil alır.
2014-cü ildə tələbələrimiz Bolqarıstanın Müqəddəs
Kliment Sofiya Universitetində, Çexiyanın Olomouts
Universitetində və Çexoslavak Xarici Universitetində,
Yunanıstanın İoannina Universitetinin Yunan dili və
Mədəniyyəti Mərkəzində "Yay Seminar"larında iştirak
ediblər.
Tərəfdaş xarici universitetlərin tələbə və müəllimləri
(Rusiya, Ukrayna, Yunanıstan, Polşa və s. ölkələrdən)
BSU bazasında yay məktəblərinə, stajkeçməyə,
seminar-treninqlərə cəlb olunub.
Bakı Slavyan Universiteti əməkdaşları da universitet
bazasında və xaricdə bir sıra elmi-tədqiqat,
ixtisasartırma və stajkeçmə kurslarında,
seminar-treninqlərdə iştirak ediblər.
1. Slavyan dilləri, slavistika üzrə stajkeçmə,
ixtisasartırma kurslarında iştirak (Çexiya
Respublikası, Ostrava Universiteti, 2014; Çexiya, Karlov
Universiteti, 2014);
2. Rus dilinin tədrisi üzrə ixtisasartırma kurslarında
iştirak (Moskva, Puşkin adına Rus Dili İnstitutu, 2014;
Bakı Slavyan Universiteti bazasında Moskva hökumətinin
dəstəyi ilə elmi-praktik konfrans, 2014);
3. Xarici dillər üzrə (Böyük Britaniya, London, 2014;
Bakı Slavyan Universitetinin bazasında AZETTA-nın
təşkilatçılığı ilə, 2014, 2015; Rumıniya, Yassı
Universiteti, 2014);
4. Germanşünaslıq üzrə layihələrdə iştirakla bağlı
seminarlarda iştirak, ixtisasartırma kursları (Avstriya,
Vyana və Leybnits şəhərləri universitetləri, 2014 və
s.);
5. Tərcüməçilik üzrə (Moskva, Moskva Dövlət Linqvistik
Universiteti, 2014);
6. Beynəlxalq münasibətlər üzrə (Rusiya, Volqoqrad
Dövlət Universiteti, 2014);
7. Jurnalistika üzrə (Bakı, Bakı Slavyan Universiteti
bazasında aparıcı Rusiya jurnalistlərinin iştirakı ilə
ustad dərsləri və seminar-treninq, 2014).
Tədris-mədəniyyət
mərkəzləri
Rusiya Tədris-Mədəniyyət Mərkəzi
Rusiyanın Azərbaycandakı səfirliyinin köməyi ilə
2002-ci ildə yaradılıb. Mərkəz müasir texniki
avadanlıqla - kompüterlər, mini-kinoteatr, interaktiv
lövhə, həmçinin zəngin kitabxana fondu ilə təchiz
olunub. "Moskva auditoriyasında" tələbələrlə müntəzəm
olaraq rus dili, ədəbiyyatı və mədəniyyəti ilə bağlı
məşğələlər keçirilir.
Mərkəzin kitabxanasından həm müəllimlər, həm də
tələbələr istifadə edir. Mütəmadi olaraq kitabxana yeni
nəşrlərlə təzələnir. Mərkəz bu ölkənin dövlət
xadimləri, ictimai və mədəni həyatının nümayəndələri ilə
hər il keçirilən görüşlərin təşkilində vasitəçi olan
Rusiya Federasiyasının Azərbaycandakı səfirliyi və
Rusiya Mədəniyyət-İnformasiya Mərkəzi ilə daim sıx
əlaqədədir. Mərkəz səfirlik tərəfindən təşkil olunan
bütün tədbirlərdə fəal iştirak edir.
Ukrayna Tədris-Mədəniyyət Mərkəzi.
1998-ci ildən etibarən Bakı Slavyan Universitetində
Ukrayna dili tədris olunur. 2001-ci ildən isə mərkəz
fəaliyyət göstərir.
Mərkəzin bazasında regionşünas tələbələr Ukrayna dili və
ədəbiyyatını öyrənirlər. Mərkəzdə müxtəlif
mədəni-kütləvi tədbirlər keçirilir, Ukrayna tarixi və
mədəniyyəti ilə bağlı yubiley gecələri qeyd olunur.
Mərkəz Ukraynanın Azərbaycan Respublikasındakı
səfirliyi, ölkəmizdə T.Şevçenko adına Ukrayna icması,
Azərbaycanın Ukraynadakı səfirliyi ilə sıx əməkdaşlıq
edir.
Türkiyə Araşdırmaları Mərkəzi
Bakı Slavyan Universiteti ilə Türkiyə Cümhuriyyəti
Atatürk Kültür, Dil və Tarix Yüksək Qurumu, Atatürk
Kültür Mərkəzinin maddi və mənəvi dəstəyi və əməkdaşlığı
ilə 2004-cü ildə yaranıb. Mərkəzin açılmasında əsas
məqsəd Türkiyəni Azərbaycanda və universitetin
əməkdaşlıq etdiyi ölkələrdə ən doğru şəkildə təqdim
etmək, eyni zamanda Türkiyə və türk dünyası ilə
maraqlanan insanları, onların araşdırmalarını Türkiyə
elminə və ictimaiyyətinə yaxından tanıtmaqdır. Hazırda
burada elmi seminarlar, müxtəlif aktual mövzularda
"dəyirmi masa"lar təşkil olunur. Mərkəz 500-ə yaxın
kitabı olan kitabxana və müasir texniki avadanlıqlarla
təchiz olunub. Universitetin Türkiyə və Balkan ölkələri
üzrə təhsil alan tələbələri, Türkiyə, onun dünya
sistemindəki yeri, Türkiyə və Azərbaycanın tarixi və
inkişaf perspektivləri ilə maraqlananlar bu imkanlardan
istifadə edirlər.
Müasir Yunan Dili və Mədəniyyəti Mərkəzi
Yunanıstan hökuməti və Yunanıstanın Azərbaycandakı
səfirliyinin köməyi ilə yaradılıb. Mərkəz 2004-cü il
iyunun 22-də açılıb. Mərkəz özündə dörd tədris otağını
birləşdirir. Yunanıstanın tarixinə, mədəniyyətinə,
ədəbiyyatına, müasir dövrdə Yunanıstan-Azərbaycan
əlaqələrinə dair 1000-ə yaxın qəzet, jurnal, kitab,
dərslik, audio-video materiallar mərkəzin kitabxanasında
cəmlənir. Mərkəz mütəmadi olaraq Yunanıstanın
Azərbaycandakı fövqəladə və səlahiyyətli səfirliyi
vasitəsilə yeni kitablarla, jurnallarla, dərs vəsaitləri
ilə təchiz olunur. Tələbələrin mərkəzin kitabxanasından
istifadə qrafiki azaddır. Bundan başqa, mərkəzdən
ölkələri üzrə ixtisaslaşan tələbələr,
Azərbaycan-Yunanıstan əlaqələri ilə maraqlananlar
istifadə edirlər. Mərkəzdə mütəmadi olaraq
mədəni-kütləvi tədbirlər keçirilir.
Bolqar dili və Mədəniyyəti Mərkəzi
Bolqarıstanın Azərbaycandakı səfirliyinin dəstəyi ilə
2004-cü ildə açılıb.
Mərkəzin əsas vəzifəsi Azərbaycan və Bolqarıstan
arasında mədəni əlaqələri inkişaf etdirmək, gənclərin
hər iki ölkənin mədəniyyətinə, təhsilinə, maarifinə və
elminə marağını artırmaq və həmçinin universitetdə
bolqarşünaslıq istiqaməti üzrə tədris prosesinin
təkmilləşdirilməsinə kömək etməkdir. Mərkəz bolqar dili,
mədəniyyəti və tarixinin yayılmasına geniş imkanlar
yaradır. Mərkəz müasir texniki avadanlıqlarla təchiz
edilib. Bundan əlavə, mərkəzin nəzdində kitabxana
fəaliyyət göstərir. Hazırda kitabxana fondu 300-ə yaxın
kitabdan - bolqar dilində dərsliklər, vəsaitlər,
lüğətlər, bədii ədəbiyyat, Bolqarıstan tarixi, dini,
mədəniyyəti və iqtisadiyyatı haqqında və bolqar dili
üzrə materiallardan ibarətdir. Mərkəzdə oxucular bolqar
dilində jurnallar və qəzetlər, video və audio kasetlərlə
də təmin olunur. Burada tədris-metodiki,
elmi-tədqiqat və mədəni-kütləvi bölmələr fəaliyyət
göstərir. Mərkəzin nəzdində danışıq dilinin
mükəmməlləşdirilməsi məqsədilə bolqar dili dərnəyi
yaradılıb.
V.Humbolt adına Alman Tədris və Mədəniyyət Mərkəzi
2008-ci ildə fəaliyyətə başlayıb. Mərkəzin əsas məqsəd
və vəzifələri Azərbaycan və Almaniya arasında elm və
mədəni əlaqələrin inkişafı, tələbələrin alman dilinə
marağının artırılması, həmçinin almanların Azərbaycan
mədəniyyəti və təhsili ilə yaxından tanış olmasıdır.
Mərkəzdə həm alman dili, həm də alman filologiyası və
mədəniyyəti ilə bağlı dərslər keçirilir.
V.Hüqo adına Fransız Dili və Mədəniyyəti Mərkəzi də
2008-ci ildən fəaliyyət göstərir və əsasən tədris
ehtiyaclarına xidmət edir.
Azərbaycanşünaslıq
xarici universitetlərdə
Moskva Dövlət Linqvistik Universiteti nəzdində
Azərbaycan Dili və Mədəniyyəti Mərkəzi.
Bakı Slavyan Universitetinin təşəbbüsü və dəstəyi ilə
2007-ci ildən Moskva Dövlət Linqvistik Universitetində
Azərbaycan dili tədris olunur. Azərbaycanşünaslığın
öyrənilmə səviyyəsini yüksəltmək məqsədilə 2009-cu ilin
aprel ayında Moskva Dövlət Linqvistik Universitetində
Azərbaycan Dili və Mədəniyyəti Mərkəzi açılıb. Mərkəz
BSU-nun birbaşa yardımı ilə ən son texniki
avadanlıqlarla, o cümlədən kompüter dəsti, geniş ekranlı
mini-kinoteatr, sənədli və bədii filmlərdən ibarət
disklər, Azərbaycanın siyasi, fiziki və iqtisadi
xəritələri, yazıçı və şairlərimizin, mədəniyyət
xadimlərimizin portretləri, rusca-azərbaycanca lüğətlər,
milli geyim nümunələri, milli bayramlarımızı və tarixi
günlərimizi əks etdirən təqvim və s. ilə təchiz olunub.
Mərkəzin fəaliyyəti tədris və mədəniyyət istiqamətləri
üzrə aparılır. Tədris istiqaməti çərçivəsində mərkəzdə
Azərbaycan dili üzrə tədris-metodik vəsaitlər və
proqramlar hazırlanır. 2010-cu ildə Azərbaycan dili üzrə
praktik kurs, müntəxəbat və müəllimlər üçün kitab
olmaqla 3 hissədən ibarət dərs vəsaiti nəşr olunmuşdur.
Mərkəzdə təhsil alan tələbələr mütəmadi olaraq Bakı
Slavyan Universitetinin, eləcə də Moskva Dövlət
Linqvistik Universitetinin təşkil etdikləri beynəlxalq
elmi konfranslarda, müxtəlif yönümlü tədbirlərdə iştirak
edir, həmçinin universitetin "Azərbaycanşünaslıq"
tədris-mədəniyyət mərkəzində təcrübə keçmə imkanı əldə
edirlər.
Maksim Tank adına Belarus Dövlət Pedaqoji
Universitetinin nəzdində Azərbaycan Dili və Mədəniyyəti
Mərkəzi
2010-cu il dekabrın 9-da BSU-nun və BDPU-nun əməkdaşlıq
müqaviləsi əsasında rektorların iştirakı ilə açılıb.
Azərbaycan Dili və Mədəniyyəti Mərkəzinin əsas vəzifəsi
Azərbaycan və Belarus arasında mədəni əlaqələri inkişaf
etdirmək, tələbələrin hər iki ölkənin mədəniyyətinə,
təhsilinə, maarifinə və elminə marağını artırmaq və
həmçinin universitetdə azərbaycanşünaslıq istiqaməti
üzrə tədris prosesinin təkmilləşdirilməsinə kömək
etməkdir.
Müqəddəs Kliment Oxridski adına Sofiya Universiteti
nəzdində Azərbaycan Dili və Mədəniyyəti Mərkəzi.
Mərkəzin yaradılması haqqında razılaşma 24 may 2013-cü
ildə imzalanıb. 25 sentyabr 2013-cü ildə mərkəzin
açılışı olub.
Mərkəz Azərbaycan dili, mədəniyyəti və tarixinin
Bolqarıstanda yayılmasına geniş imkanlar yaradır. 31
oktyabr 2013-cü il tarixindən Sofiya Universitetinin
Klassik və yeni filologiya fakültəsində türkologiya
ixtisasının tələbələri üçün "Azərbaycan dili" seçmə
fənni üzrə dərslər keçirilir.
Mərkəzdə Azərbaycanın tarixi, mədəniyyəti və adətləri
ilə bağlı tədbirlər, foto və kitab sərgiləri, Azərbaycan
haqqında filmlərin nümayişi, bu ölkənin dövlət,
mədəniyyət və elm xadimləri ilə görüşlər təşkil edilir.
Mərkəz Azərbaycanın dövlət xadimləri, ictimai və mədəni
həyatının nümayəndələri ilə hər il keçirilən görüşlərin
təşkilində vasitəçi olan Azərbaycan Respublikasının
Bolqarıstandakı səfirliyi ilə daim sıx əlaqədədir.
Poltava İqtisadiyyat və Ticarət Universitetinin
Azərbaycan Mədəniyyət-Tədris Mərkəzi.
Mərkəzin açılması ilə əlaqədar müqavilə 2008-ci ildə
imzalanıb. Hazırda Mərkəz nəinki Poltava İqtisadiyyat
və Ticarət Universiteti, həmçinin Poltavanın digər ali
təhsil ocaqları tələbələrinin beynəlxalq görüşləri,
Poltava və Poltava vilayəti məktəblərinin buraxılış
sinif şagirdləri üçün peşəyönümü işinin və
ekskursiyaların təşkili yerinə çevrilib. Mərkəz ən yeni
avadanlıq, metodik və əyani vəsaitlərlə təchiz
edilmişdir. Mərkəzdə kitabxana fəaliyyət göstərir.
2014-cü ildən fəaliyyətə başlayan Ural Federal
Universiteti nəzdində Azərbaycan Dili və Mədəniyyəti
Mərkəzi təkcə bu ali təhsil ocağında deyil, bütün
regionda təhsil və mədəniyyət layihələri həyata
keçirir.
Tələbə
Həmkarlar İttifaqı Komitəsi
Hər bir universitetdə olduğu kimi, bu ali təhsil
ocağında da Tələbə Həmkarlar İttifaqı Komitəsi
tələbələrin sosial problemlərinin həllinə, tələbələr
arasında maarifləndirmə istiqamətində işin aparılmasına,
tələbələrin asudə vaxtının səmərəli təşkil edilməsinə,
tələbələrin hüquqlarının təmin edilməsinə kömək edir.
Respublikanın daxilində və xaricində keçirilən
müsabiqələrdə, olimpiadalarda, festivallarda istedadlı
və yaradıcı tələbələrin iştirakının təmin edilməsi,
tələbələr arasında narkomaniya, alkoqolizm,
cinayətkarlıq və digər neqativ meyillərə qarşı
profilaktik tədbirlərin həyata keçirilməsi, tələbələrin
iştirakı ilə müsabiqələrin, seminarların, festivalların,
forumların, toplantıların, sərgilərin, aksiyaların,
"dəyirmi masa"ların, elmi konfransların, təlim
kurslarının, kütləvi təbliğat kampaniyalarının,
diskussiya klublarının, müzakirələrin, simpoziumların,
görkəmli şəxslərlə görüşlərin təşkil edilməsi, ictimai
işlərə cəlb edərək bu istiqamətdə formalaşmasında,
yataqxana ilə təmin olunmalarında, ehtiyacı olanlara
maddi yardım göstərilməsində, universitetin
yeməkxanasında pulsuz yeməklə təmin edilməsində,
istedadlı tələbələrin üzə çıxarılmasında, ictimai
işlərdə və elmdə fərqlənən fəalların
mükafatlandırılmasında, asudə vaxtlarının, yay
istirahətlərinin təşkili istiqamətində fəaliyyət
göstərir.
Tələbə Həmkarlar İttifaqı Komitəsi milli və dini
bayramların, tarixi günlərin qeyd olunmasında fəal
iştirak edir, rayon, şəhər və respublika səviyyəsində
universitet tələbələrinin iştirakı ilə təşkil olunan
tədbirləri dəstəkləyir.
Bakı Slavyan Universitetinin könüllüləri hazırda
Azərbaycanda keçirilən birinci Avropa Oyunlarında
yaxından iştirak edirlər.
Tələbə Gənclər Təşkilatı
Bakı Slavyan Universitetinin Tələbə Gənclər Təşkilatı
(TGT) "Ali və orta ixtisas təhsil müəssisələrində
fəaliyyət göstərən Tələbə Gənclər Təşkilatının
əsasnaməsi"nə uyğun fəaliyyət göstərir. Əsas məqsədi
dövlət gənclər siyasətinin həyata keçirilməsi
istiqamətində tələbələrin və ayrı-ayrılıqda hər bir
tələbənin maraqlarını təmsil və müdafiə etmək,
respublikanın ictimai, mədəni, sosial, elmi həyatında
onların fəal iştirakını təmin etməkdir.
Tələbə Gənclər Təşkilatı "Heydər Əliyev dərsləri"ndə,
universitetdə keçirilən tədbirlərdə, elmi konfranslarda,
tələbələrin asudə vaxtının təşkilində, tələbə
özünüidarəetmə gününün keçirilməsində fəal iştirak edir,
universitetdə təhsil alan hər bir gəncin ölkənin layiqli
vətəndaşı kimi formalaşmasına təkan verir.
Tələbə Gənclər Təşkilatının tədris və elm şöbəsi öz
işini Tələbə Elmi Cəmiyyəti və Tələbə Gənclər Təşkilatı
ilə birgə planlaşdırır. Bu şöbənin əsas fəaliyyəti
universitetdə əla və yaxşı qiymətlərlə oxuyan tələbələri
elmi işlərə cəlb etməkdən ibarətdir. İl ərzində
universitetdə və başqa ali məktəblərdə keçirilən elmi
konfranslarda iştirak etmək və yaxşı nəticələrə nail
olmaq hər bir əlaçı tələbə üçün əsas meyardır. İdeoloji
şöbə öz işini universitetin tərbiyə işləri üzrə
prorektoru və dekanlarla planlaşdırır. Tədris ili
ərzində tələbələrin təlim-tərbiyəsi, dərsə davamiyyətinə
nəzarət edir, universitet daxilində və xaricində,
yataqxanalarda onların ictimai və siyasi fəallığını
artırmaqla məşğul olur.
Tələbə Gənclər Təşkilatı tələbələrin idmanla məşğulluğu,
onların universitet, şəhər, respublika və beynəlxalq
miqyaslı idman yarışlarında iştirakına dəstək verir. BSU
tələbələrinin idman yarışlarındakı fəallığı təsadüfi
deyil.
Tələbə Həmkarlar İttifaqı Komitəsi, Tələbə Gənclər
Təşkilatı və s. tələbə təşkilatları ilə yanaşı, 2014-cü
ildən fəaliyyətə başlamış Tələbə Müşavirlik Xidmətinin
də rolu xüsusilə qeyd olunmalıdır. Tələbə Müşavirlik
Xidməti sosial məsələlər, İKT, kütləvi tədbirlərin
təşkili istiqamətində ciddi işlər görür.
Özfəaliyyət
Tələbələrin asudə vaxtının səmərəli təşkili üçün
universitetdə dil kursları, kompüterlə təmin olunmuş oxu
zalları mövcuddur və onların tələbə həyatını daha da
maraqlı etmək üçün intellektual yarışlar, müxtəlif
müsabiqə, idman yarışları və viktorinalar təşkil olunur.
Tələbələr universitetin "Tələbə dünyası" qəzetinin
nəşrinə, "Heydər Əliyev Məktəbi" Tələbə Teleradio
Studiyasında proqramların hazırlanmasına cəlb olunurlar.
Tələbələr üçün rəqs və özfəaliyyət dərnəkləri fəaliyyət
göstərir, yaradıcı tələbələr yaradıcılıq fakültəsində
təhsil ala bilərlər. Universitet tələbələri Tələbə
Gənclər Təşkilatı, Tələbə Həmkarlar Təşkilatına, Tələbə
Elmi Cəmiyyətinə, Magistrantlar Şurasına üzv ola və öz
asudə vaxtlarını Kölgə Kabinetinin nəzdində fəaliyyət
göstərən,"İntellekt" Tələbə Klubunda, Tələbə Xeyriyyə
Fondunda, Tələbə Ekoloji Klubunda keçirə bilərlər.
Universitetdə "Sfera" Tələbə-Şagird Teatr Studiyası,
"Totem" Tələbə Teatr Dərnəyi, rəqs və toxuculuq
dərnəkləri, vokal və xor qrupları fəaliyyət göstərir.
Tələbələr Azərbaycan və dünya yazıçılarının əsərlərini
səhnələşdirir, rəsm sərgiləri keçirir, müxtəlif
tədbirlərdə konsert proqramları ilə çıxış edirlər.
"Sfera" Tələbə Teatrı universitet yarandığı gündən
fəaliyyət göstərir. Tələbələri teatr sənətinin
özəllikləri ilə tanış etməklə yanaşı, onların nitq
mədəniyyətinin inkişafı, istedadlı gənclərin üzə
çıxarılması, onlara gələcək peşə fəaliyyətlərində
gərəkli ola biləcək bədii zövqün aşılanması
istiqamətində xüsusi rol oynayır. Teatr kollektivinin
məşğələləri tələbələrin fəallığını artırır, onları
yaradıcı fəaliyyətə sövq edir.
Yaradıcılıq fakültəsi
Akademik təhsil aparılan fakültə olmayan Yaradıcılıq
fakültəsi unikallığı ilə seçilir. Açıq və sərbəst təhsil
formasıdır və burada tələbələr yalnız dinləyicidirlər.
Burada iki il boyunca təhsil alan şəxslərə "Ədəbi işçi"
sertifikatı verilir. 9 ildir fəaliyyət göstərən
fakültədə təkcə BSU-nun tələbələri yox, orta məktəbi
bitirənlər də təhsil ala bilər. Burada oxumaq istəyən
şəxslərin işlərinə xüsusi komissiya tərəfindən baxılır
və əgər işləri bəyənilibsə, onlara iki il boyunca xüsusi
proqram əsasında dərslər keçilir.
"Bir günlük Xəlifə"
Bakı Slavyan Universiteti tələbələrinin müstəqil
idarəçilik qabiliyyətinin inkişafına təkan vermək,
intellektual səviyyələrini, işgüzar bacarıq və
vərdişlərini yoxlamaq, onlar tərəfindən verilən uğurlu
təklifləri təhlil edib həyata keçirmək məqsədilə
gerçəkləşən layihə ilk dəfə 2002-ci il dekabrın 13-də
reallaşıb.
Tələbələr "xəlifəlik" etdikləri bir gün ərzində BSU-da
həmişəki iş rejimi gözlənilir. Rəhbər vəzifələri icra
edən 30 tələbə gün ərzində öz vəzifələrini məharətlə
yerinə yetirməyə çalışır. Onların qəbul etdikləri
qərarlar Elmi şurada müzakirə və təsdiqdən sonra rektor
tərəfindən əmrləşdirilir. |
