|
Hökümə XƏLƏFLİ,
Bakı şəhər Heydər Əliyev adına liseyin ibtidai sinif
müəllimi,əməkdar müəllim,
"Ən yaxşı müəllim" müsabiqəsinin (2009) qalibi
II SİNİF
RİYAZİYYAT FƏNNİ
Mövzu:
Kəsrlər və hissələr
Standartlar:
1.1.1.7 2.1.1.9
Təlim məqsədləri:
1.Ədədin hissəsini tapır.
2.Ədədin hissəsini sadə kəsrlər vasitəsilə yazır.
3.Ədədin hissəsini sxemlər vasitəsilə izah edir,
göstərir.
Qiymətləndirmə standartları:
1. 1.1.7 2. 1.1.9
1. Hissələri tanıyır.
2. Hissələri sadə kəsrlər vasitəsilə ifadə edir.
3. Sxemlər əsasında hissələri müəyyənləşdirir.
4. Hissələrə görə sxemlər tərtib edir.
Resurs.
Dərslik, slaydlar, şəkillər, iş vərəqləri və s.
Dərsin gedişi:
Salamlaşma. Ev tapşırığının yoxlanması.
Motivasiya:
Motivasiya üçün ekranda aşağıdakı şəkil nümayiş olunur
və sinfə belə bir sualla müraciət edilir: Sizcə,
düzbucaqlının altında nə var?
Şəklə baxan şagirdlər öz fərziyyələrini irəli sürürlər.
Həmin fərziyyələrdən hansının düzgün olduğunu və şəklin
altında nə olmasını müəyyənləşdirə bilmələri üçün
müəllim şagirdlərə istiqamət verir:
Müəllim:
taxtanın üzərindəki əşyanı görmək üçün düzbucaqlını
şəffaflaşdırın.
Şagirdlərdən biri şəffaflaşdırma alətindən istifadə
edərək şəkli açır, ətirli pendirin şəkli ekrana gəlir.
Müəllim sinfə növbəti sualla müraciət edir:
- Pendiri hansı heyvan daha çox sevir?
Yenə də fərziyyələr irəli sürülür.
Müəllim:
Pendirə elektron qələmlə toxunun, heyvan şəkli ekrana
gəlsin.
Ekran aydınlaşanda şagirdlər bu heyvanın siçan olduğunu
görürlər.
Növbəti slayd nümayiş olunur. Burada siçanın pendiri
yarıya bölməsi təsvir olunur.
Müəllim:
Siçan pendiri tən yarıya böldü (sual-cavab aparılır):
- Pendir necə idi? (bütöv)
- Nə alındı? (iki bərabər hissəyə bölündü)
- Bütöv pendir neçə deməkdir? (bir)
- Bölünmüş hər bir hissə neçə deməkdir? (ikidə bir)
Şagirdlər sehirli qələmin (lupanın) köməyi ilə bütöv
pendirin və bölünmüş hissələrin içindəki yazılışları
görürlər və bir şagird elektron lövhədə, digər şagirdlər
isə dəftərlərində 1/2 kəsrini yazmağı öyrənirlər.
Müəllim:
Nağılın ardına qulaq asaq. Siçanın yanına dostu gəldi və
onlar tən yarıya bölünmüş dilimlərin hər birini yenə də
tən yarıya böldülər.
Şagirdlər sehirli qələmin vasitəsilə hər hissənin içini
şəffaflaşdırırlar və bu dəfə 1/4 kəsrinin yazılışını
görərək izah edirlər, kəsri yazmağı öyrənirlər.
Tədqiqat sualı:
Aparılan bu işdən sonra tədqiqat sualı qoyulur:
Hissə nədir? O necə əmələ gəlir? Hissəni necə göstərə
bilərik?
Tədqiqat işi mərhələsində şagirdlərə üç tapşırıq
verilir. Müəllim bu tapşırıqları istədiyi iş formasında
verə bilər.
Tapşırıq 1
4 dilimi rənglə. Bütün dilimlərin hansı hissəsi
alındığını aşağıda yaz.
6 dilimi rənglə. Bütün dilimlərin hansı hissəsi
alındığını aşağıda yaz.
Dairənin içindəki dilimləri rənglə və rənglənmiş və
rənglənməmiş hissələrə görə kəsrləri yaz.
Burada iki şagird verilən tapşırığa görə elektron
lövhədə rəng seçir, rəngləyir, hissəni yazır kimi
tapşırıqları yerinə yetirir. Qalan şagirdlər isə ümumi
müzakirədə iştirak edərək dəftərlərində işləyirlər.
Tapşırıq 2
Cavabı 20-dən kiçik olan xanaları mavi, böyük olan
xanaları qırmızı rənglə.
Qırmızı xanalar bütün xanaların hansı hissəsini təşkil
edir?
Ev şəkli əsasında iş aparılır. Şagirdlər evin hər
pəncərəsinin üstünə elektron qələmlə vurur və altında
gizlənmiş misalı həll edərək qarşısındakı kvadrata
yazırlar. Cavabı 20-dən kiçik olan misalları mavi, böyük
olan misalları qırmızı rənglə rəngləyirlər (tapşırığı
elektron lövhədə iki-iki işləməklə 8 şagird yerinə
yetirir). Sonra daha iki uşaq qırmızı xanaların və mavi
xanaların neçə hissə təşkil etdiyini kəsrlə ifadə
edirlər.
Tapşırıq 3
1. Cəmi neçə kubik var? (9)
2. Sarı kubikləri düzbucaqlının daxilinə yerləşdir.
3.Sarı bütün kubiklərin neçə hissəsidir. 4/9
Bu tapşırıqda konteyner üsulundan istifadə edilib.
Verilən kubikləri say və kubiklərin 4/7 hissəsini
konteynerə yerləşdir. Şagirdlər 7 kubikin 4-nün sarı,
qalanlarının qırmızı olduğunu aşkarlayırlar. Sarı
kubikləri seçib konteynerin içinə yerləşdirirlər.
Elektron lövhədə kəsri qeyd edirlər.
Bu mərhələdə şagirdlər böyük qrupla işləyir, sonra
müzakirə edərək dəftərlərində qeydlər aparırlar.
Ümumiləşdirmə və nəticə:
Hər pilləkəndə gördüyünüz hissələri yazın.
Fərdi iş formasında aparılır (cütlərlə iş formasında da
verilə bilər). Tapşırıq fərdi qaydada paylanılır və
şagirdlər bir daha şəkilləri müstəqil olaraq kəsrlərlə
ifadə edirlər. Sonra "Kəsr nədir? Necə əmələ gəlir?
Onu necə ifadə etmək olar" suallarına qayıdaraq
biliklərini möhkəmləndirirlər.
Ev tapşırığı:
Evə belə tapşırıq verilir.
Daha nəyi hissələrə bölmək olar? Şəklini çək! Şəkli
hissələrə ayıraraq hissələri kəsrlərlə ifadə et!
Qiymətləndirmə
müvafiq meyarlar əsasında aparılır. Cədvəl
qiymətləndirmə meyarları əsasında hər şagird üçün fərdi
olaraq dərs boyu fəaliyyətləri və fərdi işləri nəzərə
alınaraq doldurulur.
|
