|
 Azərbaycan
Milli Konservatoriyasının tərkibindəki Musiqi Kolleci
mədəniyyətimizə neçə-neçə görkəmli simalar, böyük
sənətkarlar bəxş edib. Çoxlu gənc istedad musiqi
sənətinin və elminin sirlərinə bu təhsil ocağında
yiyələnib. Kollecdə oxuyan tələbələrin böyük
əksəriyyəti respublika və beynəlxalq səviyyəli
müsabiqələrin laureatları, müxtəlif mükafatların
sahibləridir. Sənətsevərlərə musiqi töhfələrini
mütəmadi olaraq bəxş edən gənc sənətçilərdən biri də
fortepiano ixtisası üzrə təhsil alan III kurs tələbəsi
Eldəniz Ələkbərzadədir. O, Azərbaycan, Avropa və rus
bəstəkarlarının əsərlərini ustalıqla ifa edir.
Qeyd edək ki, Eldəniz Ələkbərzadə İzmir şəhərində
Motsart adına Musiqi Akademiyasının keçirdiyi gənc
fortepiano ifaçılarının beynəlxalq müsabiqəsində I yerə
layiq görülüb və qızıl medalla təltif olunub. Özünün
söylədiyi kimi onun bu qələbəsi ölkəmizdə keçirilən I
Avropa Oyunlarına hədiyyəsidir.
Gənc istedad təhsil aldığı müddətdə müxtəlif
mərasimlərdə iştirak edib. O, 2013-cü ildə görkəmli
pedaqoq, pianoçu H.Neyqauzun anadan olmasının 125
illik yubileyinə həsr olunmuş gənc pianoçuların
ümumşəhər festivalında istedad və bacarığını nümayiş
etdirərək diplomla mükafatlandırılıb. 2014-cü ildə
isə İslam Dünyası Gənclərinin klassik musiqi
ifaçılarının III Beynəlxalq festival müsabiqəsində
iştirak edərək laureat adını qazanıb. Bütün bunlar onu
deməyə əsas verir ki, gələcəkdə Eldənizi çoxlu
uğurlar, nailiyyətlər, tamaşaçı alqışları gözləyir.
|
