|
 Çinarə Quliyeva 1994-cü ildə Bakıda
anadan olub. Paytaxtdakı 158 nömrəli tam orta
məktəbində dörd il təhsil aldıqdan sonra Bakı
Xoreoqrafiya Məktəbinə qəbul olub. 2013-cü ildə məktəbi
fərqlənmə diplomu ilə bitirərək Azərbaycan Dövlət
Mədəniyyət və İncəsənət Universitetinə daxil olub və
hazırda həmin ali təhsil ocağında oxuyur. Çinarə ilə
söhbətimiz qısa olsa da çox maraqlı keçdi. O, bu günədək
qazandığı uğurlar barədə danışaraq dedi:
- Oxumaqla yanaşı, Bakı Xoreoqrafiya Məktəbində
tarixi-məişət rəqsləri üzrə dərs aparıram. Tələbələrimdə
rəqsə sevgi oyatmağa çalışıram. Onlar bütün rəqsləri
məharətlə ifa edirlər. 4 yaşım olarkən T.İsmayılov adına
Uşaq- Gənclər Yaradıcılıq Sarayında "Cücələrim"
ansamblına qəbul oldum və ilk addımlarımı bu ansamblda
atdım.
Səhnəyə ilk çıxışım 1999-cu ildə Heydər Əliyev Sarayında
olub. Əlimdə gəlincik ulu öndərə şeir söyləyib, rəqs
etdim. Səhnə həyatımda (fəaliyyətimdə) mən ulu öndəri
bir neçə dəfə təbrik edib, gözəl anlar yaşamışam. Bu
hisslər ürəyimdə böyük bir iz buraxıb. 6 yaşımda isə
respublikanın xalq artisti Təranə Muradovanın rəhbərliyi
altında "Səyyar" uşaq ansamblına getmişəm. 9 yaşında
Türkiyədə keçirilən 23 Aprel uşaq bayramında iştirak
etmişəm.
Bakı Xoreoqrafiya Məktəbində təhsil alarkən xalq
artisti Yusif Qasımovun rəhbərliyi altında məktəbin
nəzdində olan "Bakı ulduzları" ansamblına da
yazılmışdım. Yusif müəllimdən rəqs dərsləri alırdım və
onun rəğbətini qazanmağa çalışırdım. Məktəbdə hər il
keçirilən Q.Almaszadə adına "Gənc xoreoqrafların
müsabiqəsi"ndə hazırladığım rəqs nömrələri ilə fəal
iştirak edirdim. 2010-cu il martın 12-də Bakı
Xoreoqrafiya Məktəbində keçirilən gənc xoreoqrafların
VII müsabiqəsində uğurlu çıxışıma görə I dərəcəli
diplomla təltif olundum. Heydər Əliyev Fondunun
prezidenti, Azərbaycanın birinci xanımı Mehriban
Əliyevanın təşəbbüsü ilə bir çox xarici ölkələrdə -
Fransa, Belçika, Avstriya, Hollandiya, Sloveniya,
Slovakiya, Türkiyə, Rusiya və başqa ölkələrdə milli
rəqslərimizi layiqincə təmsil edib, dünya xalqlarına
tanıtmışam. UNESCO-nun təşkilatçılığı ilə keçirilən
"Azərbaycanın Xoşməramlı Mələkləri" adlı konsertdə
maraqlı və yaddaqalan çıxışlar etmişəm.
Həyatımda ən əlamətdar günlərdən biri də Azərbaycan
Respublikasının Prezidenti İlham Əliyev cənablarının
müvafiq sərəncamı ilə 2009-cu ildə adımın Azərbaycanın
gənc istedadlarının "Qızıl kitab"ına yazılması və
xüsusi aylıq təqaüdə layiq görülməyim olub. Bu,
məsuliyyətimi daha da artıraraq böyük qələbələr naminə
səylə hazırlaşmağıma geniş meydan yaratdı. Belarusun
Mozır şəhərində keçirilən 26 dövlətin təşkil etdiyi rəqs
müsabiqəsində iştirak edərək "Qran-Pri" mükafatı
qazanmışam. 1-15 fevral 2015-ci il tarixlərdə biz
rəqqaslar və rəssamlar Hindistanda XXIX Beynəlxalq
"Surajkund" festivalında iştirak etmişik. Bu festivalda
hind rəqslərinin necə zəngin olduğunu yaxından
öyrəndik. Hindistanda olarkən dünya möcüzələrindən biri
olan Tac-Mahal məbədini ziyarət etdik. Tac-Mahal məbədi
öz gözəlliyi ilə bizi heyran etmişdi. Divarları bəzəyən
brilliant qaşlar sanki göz yaşlarını xatırladırdı.
Bu il martın 17-də Fransada Azərbaycan səfirliyində
Novruz bayramını qeyd etdik. Bu, çox maraqlı bir görüş
idi. Parisin meri də həmin tədbirə qatılmışdı. Yarım
saat davam edən milli rəqslərimiz fransızları heyran
etmişdi. Onlar Azərbaycan rəqslərinin möhtəşəmliyinə və
rəqqasların hərəkətlərinə olan heyranlıqlarını gizlədə
bilmirdilər.
Rəqs mənim üçün həyatdır. Rəqs insana müsbət enerji
verir. Rəqsin hərəkətləri ilə rəqqas öz daxili aləmini
tamaşaçıya təqdim edir.
Arzum Azərbaycan milli rəqslərini daha da mükəmməl
öyrənərək respublikamızdan kənarda, dünya səhnələrində
nümayiş etdirməkdir. |
