|
 Bakı
Pedaqoji Kadrların İxtisasartırma və Yenidənhazırlanma
İnstitutunda 15 iyun - Milli Qurtuluş Günü münasibəti
ilə "Heydər Əliyev və milli dövlət quruculuğu"
mövzusunda tədbir keçirildi. Tədbirdə institutun
professor-müəllim heyəti, təhsil ictimaiyyətinin və KİV
nümayəndələri iştirak edirdilər. Heydər Əliyev
muzey-lektoriyasında təşkil olunmuş tədbirdə Azərbaycan
Respublikasının Dövlət himni səsləndirildikdən sonra
institutun rektoru, professor Asəf Zamanov tədbiri giriş
sözü ilə açaraq Milli Qurtuluş Gününün tarixi
əhəmiyyətindən, müstəqil dövlətimizin qurulmasında,
inkişaf etdirilməsində və möhkəmləndirilməsində misilsiz
xidmətlərindən danışdı.
Rektor qeyd etdi ki, iyirminci yüzilliyin sonunda
SSRİ-nin süqutu yeni müstəqil dövlətlərin yaranması ilə
nəticələnmişdir. Azərbaycan da bu müstəqil dövlətlər
sırasında özünə yer tutmuşdur. Lakin o vaxtkı
hakimiyyətin səriştəsiz idarəçiliyi sayəsində ölkəmiz
parçalanmaq, dağılmaq həddinə çatmışdı. Belə bir
mürəkkəb şəraitdə, 1993-cü ildə itaətsizliyin, anarxiya
və xaosun ağlasığmaz dərəcədə olduğu vaxtda xalqımızın
təkidli tələbi ilə ümummilli lider Heydər Əliyevin
ikinci dəfə hakimiyyətə qayıdışı nəticəsində qardaş
qırğınının, vətəndaş müharibəsinin qarşısı alındı,
ictimai-siyasi sabitlik bərpa olundu.
Vurğulandı ki, ulu öndər Heydər Əliyevin Azərbaycan Ali
Sovetinin sədri seçilməsi günü - Milli Qurtuluş Günü
yaddaşlara əbədi həkk olunmuşdur. Heydər Əliyev
hakimiyyətə gəldikdən dərhal sonra ölkəmizdə
qanunçuluğun bərqərar olunması istiqamətində ciddi
tədbirlər görüldü, xalqımızın vahid ideologiya -
Azərbaycançılıq ideologiyası ətrafında birləşərək
həmrəylik nümayiş etdirməsinə nail olundu.
 Bütün
həyatını öz xalqına xidmətə həsr etmiş Heydər Əliyevin
siyasi və dövlət xadimi kimi zəngin fəaliyyəti
Azərbaycan xalqının tarixində dərin iz buraxaraq, əsl
dövlət idarəçiliyi məktəbinə çevrilmişdir. Gələcək
nəsillər bundan sonra da bu böyük məktəbdən - Heydər
Əliyevin zəngin siyasi irsindən ölkəmizin inkişafı,
xalqımızın rifahı naminə faydalanacaqdır.
Qeyd olundu ki, bu gün Azərbaycan dövləti dünyanın
aparıcı ölkələri sırasında özünəməxsus yer tutur. Əsası
ümummilli lider Heydər Əliyev tərəfindən qoyulmuş
siyasət hazırda Azərbaycan Respublikasının Prezidenti
möhtərəm İlham Əliyev cənabları tərəfindən uğurla davam
etdirilir. Azərbaycanın 2011-ci ildə BMT Təhlükəsizlik
Şurasının üzvü seçilməsi və bu təşkilatda uğurlu
fəaliyyəti, 2013-cü ildə kosmik ölkələr qrupuna daxil
olması, 2014-cü ildə Dünya İqtisadi Forumunun
hesabatında göstərildiyi kimi iqtisadi rəqabətlilik
qabiliyyətinə görə dünyanın ən qabaqcıl ölkələri
sırasında olması, I Avropa Oyunlarının məhz Azərbaycanda
keçirilməsi bu böyük nailiyyətlərin məntiqi nəticəsi,
Qurtuluşun növbəti zəfəridir.
Tədbirdə institutun tədris işləri üzrə prorektoru
Məhəmməd Bayramov, təbiət elmləri kafedrasının müdiri
Yusif Alıyev, Allahverdi Eminov və başqaları çıxış
edərək Milli Qurtuluş Gününün əhəmiyyətindən və
ümummilli liderin dövlətimiz və dövlətçiliyimiz,
xalqımız üçün qurub yaratdığı müasir Azərbaycanın böyük
uğurlarından söz açdılar.
BPKİYİ-nin Mətbuat xidməti |
