|
 Martın
19-da Bakı Dövlət Universitetində "Bakı-2015" I Avropa
Oyunlarında şotokan karate do idman növü üzrə qızıl
medal sahibi, universitetin tətbiqi-riyaziyyat və
kibernetika fakültəsinin 2014-cü il məzunu Ayxan Mamayev
və Avropa Oyunlarında 2 uğurlu çıxışı ilə yadda qalan
filologiya fakültəsinin 2-ci kurs tələbəsi Fəridə
Abiyeva ilə görüş keçirilib.
Tədbiri açan universitetin rektoru, akademik Abel
Məhərrəmov bildirib ki, "Bakı-2015" I Avropa Oyunlarının
doğma vətənimizdə keçirilməsi tarixi hadisə, böyük
nailiyyət və uğurumuzdur. Ümummilli lider Heydər
Əliyevin uğurlu daxili və xarici siyasəti, həmin
siyasətin Prezident İlham Əliyev tərəfindən davam
etdirilməsi Azərbaycanı dünya miqyasında çox etibarlı
tərəfdaş və dost kimi tanıda bilmişdir. Bu oyunlar
Avropa idman tarixində yeni səhifə açmaqdadır. Bu
tarixin açılmasına və yazılmasına ölkə Prezidenti İlham
Əliyev, "Bakı-2015" I Avropa Oyunlarının Təşkilat
Komitəsinin sədri Mehriban xanım Əliyeva, Azərbaycan
ictimaiyyəti, minlərlə könüllü Azərbaycan gənci dəstək
verməkdədir.
Oyunlarda 250 istiqamət üzrə 3000 universitet
könüllüsünün fəaliyyət göstərdiyini diqqətə çatdıran
rektor qızıl medal sahibi Ayxan Mamayevi təbrik edərək
ona gələcək həyatında və yarışlarda uğurlar arzulayıb.
Rektor bu uğuruna qədər Ayxan Mamayevin keçdiyi idman
yolu haqqında məlumat verib. Məlum olub ki, o, 7
yaşından karate idman növü ilə məşğul olur. Dəfələrlə
dünya və Avropa çempionatlarının, İslam Həmrəyliyi
Oyunlarının qalibi olub.
Rektor həmçinin Avropa Oyunlarında uğurlu çıxışları ilə
yadda qalan Fəridə Abiyevanın 5 yaşından eyni idman
növü ilə məşğul olduğunu, onun 10 qat respublika
çempionu, dünya kubokunun sahibi və bir sıra beynəlxalq
turnirlərin qalibi olduğunu diqqətə çatdıraraq, ona
gələcək oyunlarında qələbə arzulayıb.
Ayxan Mamayevin final görüşü izlənildikdən sonra rektor
iştirakçılara universitetin xatirə hədiyyələrini təqdim
edib.
Ayxan Mamayev universitetdə oxuduğu müddətdə hər zaman
rektorun diqqət və qayğısını hiss etdiyini, məzunu
olduğu ali təhsil ocağında keçirilən bu tədbirin
əhəmiyyətini qeyd edərək təşəkkürünü bildirib.
Mətbuat və informasiya şöbəsi |
