|
Rüfanə GÜNƏŞ,
"Azərbaycan müəllimi"
 Orta
məktəbdə oxuduğumuz vaxtlar üçaylıq yay tətili bitib,
yeni tədris ili başlayanda ədəbiyyat müəllimimiz inşa
mövzusu verərdi: "Mən yay tətilini necə keçirdim?". Biz
də həvəslə yazardıq. Yayımızı elə gözəl təsvir etməyə
çalışardıq ki...
Budur, yenə də yay tətili qapımızdadır. Buna görə də
həmişə şagirdlərdən tətilini necə keçirdiklərini soruşan
müəllimlərə, bu dəfə biz "Yay tətilini harada və necə
keçirəcəksiniz" sualını ünvanladıq. Sualımızı həm
paytaxt Bakının, həm də müxtəlif bölgələrin təhsil
ocaqlarında çalışan müəllimlər cavablandırdı.
Solmaz Əsgərova,
Bakı şəhər 6 nömrəli məktəb-liseyin fizika müəllimi,
əməkdar müəllim: - Yay tətili üçün biletimi qışdan
alıb hazır etmişəm. İyun ayının sonunda balaca nəvəmin
doğum günü olduğu üçün ikihəftəlik Türkiyəyə gedəcəyəm.
Xızıda kiçik yay evi hazırlayırıq. Türkiyədən qayıdandan
sonra Xızıya gedəcəyik, həm evin işlərini tamamlamaq,
həm də istirahət etmək üçün. İyul və avqust aylarını da
Xızıda olacağam. Mənim yay tətili üçün planlarım bundan
ibarətdir.
Hüseyn Şahbəndəyev,
Avropa Azərbaycan Məktəbinin Azərbaycan dili və
ədəbiyyat kafedrasının rəhbəri, əməkdar müəllim: -
Azərbaycanda mənalı istirahət üçün saysız imkanları olan
turizm məkanları var. Mən də builki yay tətilində bu
məkanlarda dincəlməyə üstünlük verəcəyəm. Buna görə də
yay tətili günlərində istirahətlə bağlı iki istiqamət
nəzərdə tutmuşam. İyul ayında ailəmizlə birgə cənub
bölgəsində, Xəzəryanı istirahət məkanlarının birində
dincəlmək fikrindəyəm.
Avqustun əvvəllərindən Qəbələdə iki həftə dincəlmək,
təbiətlə baş-başa olmaq istəyirəm. Açığını desəm, bu
rayonda keçən il təlimçi-ekspert kimi ongünlük kurikulum
təlimi dövründə tanıdığım yerli müəllim dostlarımın
təkidli tələbi bu arzumu bir qədər də artırır.
Qarşıdan gələn tətil dövründə hər bir müəllimə yüksək
səviyyədə istirahət etmək şansları arzulayıram.
Aliyə Əhmədova,
Sumqayıt şəhər İsmət Qayıbov adına 1 nömrəli tam orta
məktəbin fizika müəllimi, "Əyləncəli fizika kurikulumu"
bloqunun yaradıcısı, V "Elektron təhsil" müsabiqəsinin
qalibi: - Əvvəlcə qeyd edim ki, 2014-2015-ci
tədris ili mənim üçün çox məhsuldar keçib. Tədris ili
boyunca müxtəlif müəllim və şagird müsabiqələrində,
təlim və seminarlarda, Sumqayıt şəhərinin ictimai
həyatındakı müxtəlif tədbirlərdə iştirak etmişəm. Məhz
buna görə də həm müəllim, həm də ailə sahibi kimi yay
tətilində istirahətə ehtiyac duyuram. Bununla belə heç
vaxt passiv istirahətin tərəfdarı olmamışam. Yay
aylarında istirahətimizin estafeti Azərbaycanda
keçiriləcək birinci Avropa Oyunlarına tamaşaçı kimi
qatılmaqla başlayacaq. Düşünürəm ki, bu, övladlarımı
sağlam həyat tərzinə və idman növlərindən birinə
istiqamətləndirmək üçün çox gözəl vasitə olacaq.
Yaradıcı və öyrənmək həvəsi olan müəllimlər yay aylarını
səbirsizliklə gözləyirlər, çünki məhz bu dövrdə müxtəlif
təlimlərə start verilir. Bu baxımdan təlimçisi olduğum
LabDisk Physio təlimlərində iştirakı planlaşdırıram. Yay
tətili ərzində dəvət aldığım təhsillə bağlı tədbirlərdə
də iştirak edəcəm. Yay istirahətimi hər il olduğu kimi,
ata- baba yurdu səfalı Quba-Xaçmaz bölgəsində keçirməyi
planlaşdırıram.
Məhəmməd Qarakişiyev,
Balakən rayon akademik Zərifə Əliyeva adına 3 nömrəli
tam orta məktəbin ingilis dili müəllimi,"Ən yaxşı
müəllim" (2014) müsabiqəsinin qalibi, "Dünya Müəllimi
Mükafatı"nın 50 ən yaxşı namizədindən biri: - Biz
müəllimlər hər zaman şagirdlərimizə deyirik ki, yay
tətilinizi səmərəli keçirin. Bunun üçün onlar yay
düşərgələrinə, dil kurslarına və təhsil yönümlü
təlimlərə qoşulmaq imkanı əldə etməlidirlər. Bu yolla
istirahətlərini həm maraqlı, həm də faydalı keçirə
bilərlər. Bəs müəllimlər özləri bu haqda nə düşünürlər?
Bir müəllim olaraq çalışıram ki, yay tətilimi səmərəli
keçirim. Bunun üçün qoşulacağım bir sıra treninq və
proqramlar vardır ki, sırf ixtisasımla bağlıdır.
Məsələn, British Council-in təşkilatçılığı ilə
"Müəllimlər üçün kurs"da iştirak etmək istəyirəm. Amma
sırf istirahət məqsədilə gedəcəyim yer də var.
Yaşadığım Balakən rayonuna yaxın Gürcüstanda ailəmlə
birlikdə istirahət etmək istəyirəm.
Sonda qarşıda bizi gözləyən yay tətili günlərində bütün
təhsil işçilərinə xoş istirahət və yeni tədris ilinə
daha səbrli və açıq hafizə ilə başlamalarını arzu
edirəm.
Elnur Hacıyev,
Göygöl şəhər 1 nömrəli tam orta məktəbin tarix
müəllimi, "Ən yaxşı müəllim" müsabiqəsinin qalibi
(2014) - 13 ildən artıqdır ki, müəllim işləyirəm.
Bu illər ərzində yay tətili zamanı istirahətə ayırdığım
vaxtlar o qədər də çox olmayıb. 2006-cı ilə qədər yay
tətilində istirahətimi fərqli keçirirdim. Demək olar ki,
yayda davamlı olaraq normal istirahət edə bilmirdim.
Ailə və uşaqlar olduqdan sonra övladlarım istirahət
etmək üçün məni düşünməyə məcbur edir. Planım belədir.
Yay məktəbləri təşkil olunsa onlara qoşulacağam. Son
illərdə Gürcüstana da gedirəm. İmkan etsəm ailəmlə
getmək planım var. Dağda çadır qurub, 10 gün təbiət
qoynunda yaxşı istirahət etməyi də düşünürük. Bizim
Göygölün təbiəti dincəlmək üçün çox əlverişlidir.
Sevinc Əliyeva,
Bakı Modern Məktəbinin ibtidai sinif müəlllimi,
metodist, Təhsil Nazirliyinin "Mentorluq dəstəyi"
layihəsi üzrə mentor, təlimçi, "Ən yaxşı müəllim"
müsabiqəsinin qalibi (2012) - Hazırda Təhsil
Nazirliyinin "Mentorluq dəstəyi" layihəsi üzrə mentorluq
fəaliyyətimi başa vurduqdan sonra iyunun 2-ci
yarısında, aldığım dəvətə əsasən Rusiya Federasiyasının
Altay diyarında keçiriləcək "İdarəetmədə informasiya
texnologiyalarının rolu" adlı IV konfransda iştirak
etməyi düşünürəm. Ondan sonra fənn kurikulumlarının
tətbiqi ilə bağlı təlimlər də planlarımda var. Tətil
müddətində hər il olduğu kimi iki xarici ölkədə
beynəlxalq təlimə qatılaraq öz dünyagörüşümü və
təcrübəmi artıracağam. Bu təlimlər və topladığım təcrübə
mənim yeniliklər etməyimə kömək olur. Xarici təcrübə
əsasında keçirilən "Master klas" dərslər daha effektli
olur. Yay tətili müddətində vaxt tapdıqca günün ikinci
yarısı ingilis dili danışıq kurslarında iştirak edərək
sərbəst danışıq üzrə öz üzərimdə iş aparıram. İyul
ayında multi media - fleş tapşırıqların hazırlanması
üzrə işlər və onlardan istifadə qaydasının müəllimlərə
başa salınması üzrə aparılacaq təlimlərdə iştirak etmək
planlarımda var. İstirahət üçün Balakən, Masallı,
İsmayıllı rayonlarını nəzərdə tutmuşam. Fransaya və
Altaya həm istirahət, həm konfrans, təlim məqsədi ilə
gedəcəyəm. Türkiyə və Avstriyaya, əgər vaxt qalsa sırf
istirahət üçün getmək istəyirik. |
