|
 Azərbaycan
Yazıçılar Birliyində (AYB) Alsunun "Quş yuxusu"
kitabının təqdimat mərasimi keçirilib.
Tədbirdə çıxış edən AYB-nin katibi Rəşad Məcid on yaşlı
Alsunun ədəbiyyata, mütaliəyə olan marağından söz açıb.
Bildirib ki, on yaşında kitab çıxarmaq Alsunun
ədəbiyyata olan daxili tələbatından irəli gəlib. Mən
Alsunu lap uşaq vaxtlarından tanıyıram. O, iti ağlı,
hazırcavablığı ilə yadımda qalıb. Alsu hələ balacadır,
gələcəkdə peşəsini, sənətini özü müəyyən edəcək.
İnanıram ki, onun kitab və ədəbiyyat sevgisi bu cür
tükənməz olacaq.
Sonra Azərbaycan Dövlət Pedaqoji Universitetinin
filologiya fakültəsinin dekanı, professor Buludxan
Xəlilov, xalq şairi Fikrət Qoca, "APA Holding"in
prezidenti Vüsalə Mahirqızı, "Azərbaycan" jurnalının
baş redaktoru İntiqam Qasımzadə, AYB-nin katibi İlqar
Fəhmi, şair Oqtay Rza və başqaları Alsuya uğurlar
diləyib və xoş arzularını bildiriblər.
Tədbirdə çıxış edən Alsu kitablara və ədəbiyyata olan
marağından söz açıb və təqdimat mərasiminə toplaşanlara
təşəkkürünü bildirib.
Qeyd edək ki, "Təhsil" nəşriyyatında işıq üzü görən
kitabda Alsunun hekayələri, esseləri və gülməcələri
toplanıb.
Sifai SƏFƏROVA,
"Azərbaycan müəllimi" |
