|
Yeniyetməlik dövründə insan azadlığın geniş anlamını
dərk edir. Bu vaxt onun ətrafında, yanında olanlar
müstəqillik və sərbəstlik düşüncəsinin kamilləşməsində
böyük rol oynayır.
Ailədə övladlarına azadlıq haqqında danışan valideynlər,
təəssüf ki, az olur. Adətən, onlar elm, bilik almağın
vacib olduğu barədə çox danışırlar. Oxumaq, savadlı
olmaq əslində müstəqilliyə gedən cığırdır. Elmsiz kəs
heç vaxt azad ola bilməz. Bu aksiomanı minlərlə
yeniyetməyə öyrədən Rafil müəllimi 28 may günündə bütün
şagirdləri dərin hörmətlə anır, çünki onun ən çox
sevdiyi bayram, məhz, bu gün idi. Həmişə bu tarixi günü
həvəslə gözləyərdi. O, azadlığı riyaziyyatla bərabər
şagirdlərinə başa salmaq üçün hər ilin bu günündə Bakı
məktəbliləri arasında bilik yarışı keçirər, Azərbaycana
həsr olunmuş şeirlər və mahnılar müsabiqəsi təşkil edər,
fəal iştirakçıları mükafatlandırardı. Bu, yeni
istedadları kəşf etməkdə müəllimə kömək edən bir tədbir
kimi 1988-ci ildən ənənəyə çevrilmişdi. Son illər isə
əziz bayrama həsr olunmuş bu təntənənin məkanı Rafil
müəllimin böyük arzularla yaratdığı 287 nömrəli
"Zəkalar" liseyi olmuşdur.
Bu yarışlarda iştirak etmiş yüzlərlə məktəbli indi
Azərbaycanı dünyanın müxtəlif universitetlərində təmsil
edir, öz yüksək bilik və bacarıqları ilə xalqımızın
intellekt səviyyəsini nümayiş etdirirlər. Həmin
şagirdlər sonralar bu ənənəvi yarışların sponsoru olur,
unudulmaz müəllimin məsləkini yaşatmaq üçün hər il 28
may günü Rafilsevərlərin toplaşdığı yarışın
təşkilatçıları kimi çıxış edirlər.
Rafil Cəlal oğlu İmanov ömrünün 47 ilini şagirdləri ilə
paylaşmış, gözünün nurunu balalarımızın gələcəyini
aydınlatmaq üçün sərf etmişdi. "Mənim şagirdlərim
Azərbaycanın müstəqilliyini qoruyacaqlar, onlar bu
xalqın gələcəyidirlər", - deyərdi. Bu, onun həyat amalı
idi. Şəxsiyyət yetişdirmək amalı ilə müəllimlik etmiş bu
gözəl təhsil işçisi "Azərbaycan Respublikasının
əməkdar müəllimi" fəxri adına layiq görülmüşdür.
Məktəblilərin ona ilahi bir inamı vardı. Onun böyük
məhəbbətlə keçdiyi dərslər heç zaman unudulmayacaq.
Rafil müəllim şəxsiyyət olmaq üçün azadlığın vacibliyini
dönə-dönə vurğulayardı.
Azadlığı təkcə tarix, ədəbiyyat, siyasətdən öyrənmirlər.
Azadlığı məktəblərdə, universitetlərdə müəllimlərdən də
öyrənirlər. Rafil müəllim ədəbiyyatı da, tarixi də yaxşı
bilirdi, poeziyanı, musiqini çox sevirdi, buna görə də
onun riyaziyyat dərsləri çox maraqlı keçirdi, rəqəmlərin
simfoniyasını yeniyetmələrə dinlədə bilirdi. Hər şagird
onun kəşf etmək istədiyi bir dünya kimiydi, hər kəsin
tərzini duyar, ona öz üslubunda dərsi başa salardı.
O, bütün ömrünü çətin məsələləri asanlaşdırmağa, həll
etməyə həsr etdi, nəticədə xalqın arxalana biləcək bir
nəsil yetişdirdi. Bu yolda həmişə humanist və ədalətli
oldu. Gənc nəslə azadlıq və müstəqillik yolunda can
qoyanları unutmamağı vəsiyyət etdi. M.Ə.Rəsulzadə,
Ə.Cavad, Ü.Hacıbəyli, M.Müşfiq, H.Cavid, X.R.Ulutürk
haqqında, onların azadlıq üçün mücahidliyi barədə
ürəkyanğısı ilə danışardı. Bir kərə yüksələn bayrağımızı
enməyə qoymayan vətən oğullarını örnək sayardı. "Savad,
bilik də bir hünərdir, şəxsiyyətinizi və nüfuzunuzu,
ədaləti və vicdanınızı qorusanız azad və qüsursuz
yaşayar və unudulmazsınız" - kəlamını bu gün yenə
xatırladaraq Rafil müəllimin böyük şəxsiyyət olduğunu
demək istəyirəm. O, ağır xəstə olanda dərin kədərlə bir
parça şeir yazmışdım:
Ruhum azad dolaşar, şagirdlərimdir hər
yan
Haqqı tapmağa getdim, yorulmadan,
sınmadan!
Zəhmətim halal olsun, sənə ey
ziyarətçim,
Əməyim itməyəcək, ölməyəcəkdir, inan!
Biz, Rafil müəllimin bütün şagirdləri, bu gün də onu
sıramızın önündə görürük, hər uğurumuzda, hər
zəfərimizdə onun payı var.
Tamella HƏMİDQIZI,
Odlar Yurdu Universitetinin müəllimi |
