|
 Rabitə
və Yüksək Texnologiyalar Nazirliyi Elektron Hökumət
portalının operatoru - "Məlumat Hesablama Mərkəzi"nin
direktoru Nail Mərdanov və baş mütəxəssis Nadir Rəsulov
Azərbaycan Texniki Universitetində olublar.
Universitetin rektoru, professor Havar Məmmədovla görüş
zamanı qeyd edilib ki, son illər ölkəmizdə aparılan
uğurlu islahatlar, quruculuq işləri, iqtisadiyyatda baş
verən yüksəliş qeyri-neft sektorunun, xüsusilə də
informasiya-kommunikasiya texnologiyaları (İKT)
sektorunun inkişafına müsbət təsir göstərmişdir. Qeyd
edilib ki, elm, təhsil və mədəniyyət sahəsinə göstərilən
qayğının ardıcıl davam etdirilməsi, elmi-texniki
potensialın qorunub saxlanılması, elm və təhsil
sahəsində yüksək ixtisaslı kadrların hazırlanması dövlət
siyasətinin əsas istiqamətlərindən biridir.
Görüşdə bildirilib ki, elektron idarəçilikdə
yüksəksəviyyəli elmi və ixtisaslı kadrların hazırlanması
üçün səriştəyə əsaslanan şəxsiyyətyönümlü təhsil
məzmununun yaradılması, innovativ təlim metodları və
yüksək texnologiyalar vasitəsilə təhsilin məzmununun
səmərəli mənimsənilməsini təmin edən yüksək nüfuzlu
təhsil ocaqlarının formalaşdırılması, elm, təhsil və
biznes səylərinin birləşdirilməsi və innovativ inkişaf
mühitində yeni tərəfdaşlığın formalaşdırılması ali
təhsil müəssisələri ilə istehsalat arasında əməkdaşlığın
möhkəmləndirilməsindən çox asılıdır. Bunları əsas
götürərək Azərbaycan Texniki Universiteti, Rabitə və
Yüksək Texnologiyalar Nazirliyi Məlumat Hesablama
Mərkəzinin nəzdində Elm-Təhsil və Texnologiyalar
Birliyinin yaradılması qərara alınıb və bu barədə
professor Havar Məmmədov və mərkəzin direktoru Nail
Mərdanov müqavilə imzalayıblar. Hər iki müəssisə yeni
tərəfdaşlıq əsasında "Elektron idarəçilik, informasiya
sistemləri və kibertəhlükəsizlik" Elm-Təhsil və
Texnologiyalar Birliyinin yaradılması istiqamətində
işlərin icrasına başlamışdır. "Elektron idarəçilik,
informasiya texnologiyaları və sistemləri mühəndisliyi"
üzrə ali təhsilli kadrların hazırlığı istiqamətində elm,
təhsil və biznes səylərini birləşdirmək vəzifəsi qarşıya
qoyulub. Azərbaycan Texniki Universitetinin informasiya
texnologiyaları və proqramlaşdırma kafedrasında
"Elektron imza" laboratoriyasının yaradılması barədə
məsələ müzakirə olunub.
Müşfiq BORÇALI |
