|
 Pedaqoq-tədqiqatçı
Hacı Tofiq Seyidzadə pedaqoji fəaliyyətə başladığı
1969-cu ildən anadan olduğu Sədərək kəndinin tarixinin,
mədəniyyətinin tədqiqi, yaradıcı insanlarının üzə
çıxarılması üçün geniş araşdırmalar aparıb və artıq
təqaüddə olmasına baxmayaraq indi də bu gərəkli və
şərəfli işi davam etdirir. Bu araşdırmaların nəticəsi
olaraq pedaqoq-tədqiqatçının indiyədək 57 kitabı və
məqaləsi işıq üzü görüb.
Hacı Tofiq Seyidzadənin apardığı araşdırmaların bir
istiqamətini Sədərək məktəbinin məzunu olan yaradıcı
insanların - müəllim, alim, şair və publisistlərin üzə
çıxarılması təşkil edir. Onun həmin yöndəki son
araşdırmalarının nəticələri bu günlərdə "Təknur"
nəşriyyatı tərəfindən çapdan buraxılmış "Sədərək
şairləri" adlı beşinci kitabında toplanıb. 150 səhifəyə
yaxın olan kitabda Sədərək məktəbinin məzunları -
yaradıcı insanlar haqqında məlumat və onların
yaradıcılığından nümunələr geniş yer tutur. Kitabın
"Onlarla fəxr edirik" adlı ayrıca bir bölməsində isə
Sədərək məktəbinin tarixi, bəzi müəllimləri, xaricdə
təhsil alan məzunları, idmançıları və digər sənət
sahibləri haqqında yazılar yer alıb.
***
Bu günlərdə Azərbaycan Yazıçılar Birliyinin "Natavan"
klubunda tədqiqatçı- pedaqoq Hacı Tofiq Seyidzadənin 7
kitabının təqdimatı olub. Tədbiri giriş sözü ilə açan
Bakı Slavyan Universitetinin dosenti Nazim Mirzə Hacı
Tofiq Seyidzadə haqqında danışıb, onu bacarıqlı
jurnalist-publisist, yorulmaz araşdırıcı kimi
səciyyələndirib, indiyədək onun 57 kitabının çapdan
çıxdığını, o cümlədən Böyük Vətən Müharibəsində iştirak
etmiş 462 sədərəkli haqqında 6, Aşıq Yusif Cəfərov
barədə 5, Sədərək şairləri haqqında isə 5 kitabın
müəllifi olduğunu bildirib. Diqqətə çatdırıb ki, dəyərli
araşdırmalarına görə qardaş Türkiyədə Beynəlxalq Türk
Dünyası Araşdırmaları Uluslararası Elmlər Akademiyasının
fəxri professoru adına layiq görülmüş Hacı Tofiq
Seyidzadə "Qızıl qələm" media mükafatı laureatı, Avropa
Kitab Nəşr Evinin qızıl medalçısıdır.
Sonra ADPU-nun müəllimi Saleh Taleh, şair Oqtay Rza,
AMEA Folklor İnstitutunun əməkdaşı, dosent Nizami
Muradov, Abşeron Rayon Mədəniyyət Evinin direktoru
Məmmədkərim Səmədov, şair Əli Təbib Həsənoğlu, əmək
veteranı Məmməd Əhmədov və b. çıxış edərək Hacı Tofiq
Seyidzadənin yaradıcılığından, apardığı çoxistiqamətli
araşdırmalarından, onların nəticəsi kimi araya-ərsəyə
gəlmiş kitablarının əhəmiyyətindən danışıb, məhsuldar
tədqiqatçıya uğurlar arzulayıblar.
Tədbirin sonunda söz alan H.T.Seyidzadə təqdimat
mərasiminə qatılanlara və haqqında xoş sözlər deyən
çıxışçılara minnətdarlığını bildirib.
Yusif ƏLİYEV,
"Azərbaycan müəllimi" |
