|
 Salyan
rayonunun Borankənd kəndində Alimə müəllim daha çox bu
keyfiyyəti - şagirdlərlə yüksək ünsiyyət qurmaq
qabiliyyəti ilə tanınır.
Babayeva Alimə Əli qızı 1958-ci ildə Salyan rayonunun
Şorsulu kəndində anadan olub. 1974-cü ildə həmin
kənddəki orta məktəbi bitirib. 1976-cı ildə Azərbaycan
Dövlət Pedaqoji Universitetinin filologiya fakültəsinin
qiyabi şöbəsinə daxil olub və 1981-ci ildə oranı bitirib.
Müəllimlik fəaliyyətinə 1978-ci ildə Salyan rayonu
Dayıkənd kənd məktəbində başlayıb. 1984-cü ildən
A.Kərimov adına Borankənd kənd ümumi orta məktəbində
dil-ədəbiyyat müəllimi işləyir.
Alimə Babayeva pedaqoji ünsiyyət zamanı şagird
şəxsiyyətinin formalaşmasına şərait yaradır. Ünsiyyət
formasının hansı növündən istifadə etməsindən asılı
olmayaraq, müəllim şagird kollektivi ilə səmimi
münasibət yarada bilməsə pedaqoji fəaliyyətində müsbət
nəticə əldə edə bilməz. Eyni zamanda bu vəhdətin
nəticəsi dərsin daha maraqlı keçməsinə şərait yaradır.
Yeni mövzunu təkcə müəllim deyil, şagirdlər də araşdırır
və birlikdə müzakirə edirlər. Bu da əldə edilmiş yeni
məlumatın daha da yaddaqalan olmasına, hər kəs
tərəfindən mənimsənilməsinə gətirib çıxarır. Çünki
şagirdin yaradıcı təfəkkürünü artıran əsas amil onun öz
təcrübəsidir. Şagirdlər öz təcrübələrinin köməyi ilə
məlumatı əldə etməklə yanaşı, onu sözlə ifadə edə
bilmək, gördükləri işlər haqqında danışmaq, əldə
etdikləri məlumatı təqdim etmək bacarığına yiyələnirlər.
Alimə Babayeva dərslərində yeni texnologiyaların
imkanlarından istifadə edir. Ədiblərin səs yazılarını
dinlətməklə, onlara həsr olunmuş sənədli filmlərdən,
əsərlərinə çəkilən kinofilmlərdən kiçik parçalar
göstərməklə dərsin daha maraqlı keçməsinə şərait
yaradır.
Alimə Babayevanın 1987-ci ildə Azərbaycan Elmi Tədqiqat
Pedaqoji Elmlər İnstitutunda keçirilən XXIII Respublika
pedaqoji mühazirələrində elmi mövzuda oxuduğu mühazirə
yüksək qiymətləndirilib. Şagirdləri vaxtaşırı rayonda
keçirilən şeir müsabiqəsinin qalibi olub, müxtəlif inşa
yazı müsabiqələrində mükafatlara layiq görülüb. Gənc
nəslin təlim-tərbiyəsində səmərəli fəaliyyətinə görə
A.Babayeva dəfələrlə fəxri fərman və diplomlarla təltif
olunub.
İ.MƏMMƏDOVA,
Salyan RTŞ-ın metodisti |
