|
Sual:
Təhsil müəssisələrinə xüsusi razılıq (lisenziya) neçə
il müddətinə verilir və lisenziya verilməsi üçün rüsumun
miqdarı nə qədərdir?
Cavab:
"Təhsil haqqında" Azərbaycan Respublikası Qanununun
16.1-ci maddəsinə görə dövlət təhsil müəssisələrinə
xüsusi razılıq (lisenziya) müddətsiz verilir. Azərbaycan
Respublikasının hüquqi və fiziki şəxsləri tərəfindən
təsis edilmiş bələdiyyə və özəl təhsil müəssisələrinə
xüsusi razılıq (lisenziya) beş il müddətinə verilir.
Əcnəbilər və ya vətəndaşlığı olmayan şəxslər, xarici
hüquqi şəxslər tərəfindən təsis edilmiş təhsil
müəssisələrinə xüsusi razılıq (lisenziya) üç il
müddətinə verilir.
Azərbaycan Respublikası Prezidentinin 2002-ci il 2
sentyabr tarixli 782 nömrəli Fərmanı ilə təsdiq edilmiş
"Xüsusi razılıq (lisenziya) tələb olunan fəaliyyət
növlərinin siyahısı və həmin fəaliyyət növlərinə xüsusi
razılıq (lisenziya) verilməsinə görə ödənilən dövlət
rüsumunun məbləğləri"nin 17-ci hissəsinə əsasən xüsusi
razılıq (lisenziya) verilməsinə görə məktəbəqədər təhsil
müəssisələri - 2500 manat, ümumtəhsil müəssisələri
(liseylər və gimnaziyalar daxil olmaqla), peşə
məktəbləri və peşə liseyləri, orta ixtisas təhsili
müəssisələri - 4000 manat, ilk peşə-ixtisas təhsilini
həyata keçirən ayrı-ayrı təşkilatlar, müəssisələr, əmək
birjaları, məşğulluq idarələri və digər qurumlar - 3000
manat, ali təhsil müəssisələri - 5500 manat, əlavə
təhsili həyata keçirən ixtisasartırma və
yenidənhazırlanma qurumları və digər müəssisələr - 3000
manat, dini orta ixtisas təhsili müəssisələri - 4000
manat, ali dini təhsil müəssisələri - 5500 manat
məbləğində dövlət rüsumu ödəyirlər.
Sual:
Məktəbəqədər təhsil müəssisəsi nədir və hansı növləri
var?
Cavab:
Azərbaycan Respublikası Nazirlər Kabinetinin 2012-ci il
2 oktyabr tarixli 218 nömrəli qərarı ilə təsdiq edilmiş
"Məktəbəqədər təhsil müəssisəsinin Nümunəvi
Nizamnaməsi"nin 1.2-ci bəndinə görə məktəbəqədər təhsil
müəssisəsi fasiləsiz milli təhsilin həyata
keçirilməsində ilkin pillə olmaqla, cinsindən, irqindən,
dilindən, dinindən, milliyyətindən, sosial
vəziyyətindən, mənşəyindən, sağlamlıq imkanlarından
asılı olmayaraq, Azərbaycan Respublikasında yaşayan
məktəbəqədər yaşlı uşaqların tərbiyəsi və təhsilə
hazırlanması ilə məşğul olur.
Məktəbəqədər təhsil müəssisəsinə 1 yaşdan 6 yaşadək (6
yaş daxil olmaqla) uşaqlar qəbul edilirlər.
Məktəbəqədər təhsil müəssisəsi mülkiyyət növünə görə
dövlət, bələdiyyə və özəl məktəbəqədər təhsil
müəssisələrinə bölünür.
Məktəbəqədər təhsil müəssisəsinin növləri
aşağıdakılardır:
1. körpələr evi (1-3 yaşlı uşaqlar üçün);
2. körpələr evi-uşaq bağçaları (1-6 yaşlı uşaqlar üçün);
3. uşaq bağçaları (3-6 yaşlı uşaqlar üçün);
4. xüsusi uşaq bağçaları (sağlamlıq imkanları məhdud
uşaqlar üçün).
Sual:
Nostrifikasiya nədir və necə həyata keçirilir?
Cavab:
"Təhsil haqqında" Azərbaycan Respublikası Qanununun
1.0.36-cı maddəsinə görə nostrifikasiya - təhsil
haqqında sənədin ekvivalentliyinin müəyyən edilməsi
prosedurudur.
Azərbaycan Respublikası Nazirlər Kabinetinin 2013-cü il
13 may tarixli 64 nömrəli qərarı ilə təsdiq edilmiş
"Xarici dövlətlərin ali təhsil sahəsində ixtisaslarının
tanınması və ekvivalentliyinin müəyyən edilməsi
(nostrifikasiyası) Qaydaları"na əsasən xarici
dövlətlərin ali təhsil sahəsində ixtisaslarının
ekvivalentliyinin müəyyən edilməsi- xarici dövlətlərin
səlahiyyətli orqanları tərəfindən bu ixtisasların
alındığını təsdiq edən sənədlərin sahiblərinə Azərbaycan
Respublikasında verilmiş ali təhsil haqqında sənədlərin
sahiblərinin malik olduqları eyni akademik və peşə
hüquqlarının verilməsi deməkdir.
Xarici dövlətlərin ali təhsil sahəsində ixtisasının
tanınması və tanınma haqqında Şəhadətnamənin verilməsi
Azərbaycan Respublikasının Təhsil Nazirliyi tərəfindən
həyata keçirilir.
Xarici dövlətlərin ali təhsil sahəsində ixtisaslarının
tanınması, ekvivalentliyinin müəyyən edilməsi və müvafiq
Şəhadətnamənin verilməsi sənəd sahibinin ərizəsi və ya
maraqlı olan təşkilatın, hüquqi və fiziki şəxslərin
müraciəti əsasında həyata keçirilir.
Ali təhsil sahəsində ixtisasın tanınması barədə
müraciətə (ərizəyə) aşağıdakılar əlavə edilir:
ali təhsil haqqında sənəd;
tədris olunmuş fənlər, onların həcmi, alınmış yekun
qiymətlər, təcrübə, kurs və buraxılış işlərinin
nəticələri və tədris prosesini təşkil edən digər
göstəricilər qeyd olunmaqla ali təhsil haqqında sənədə
əlavə.
Ərizəçi öz hazırlıq səviyyəsinin müvafiq peşə
fəaliyyətinə icazə verməsini və praktik təcrübəsini
təsdiq edən sənədlər də təqdim edə bilər.
Ali təhsil haqqında sənəd və ona əlavənin Azərbaycan
dilinə tərcüməsi və notarial qaydada təsdiqi bir qayda
olaraq, Azərbaycan Respublikasının ali təhsil haqqında
sənəd verən ölkədəki səfirliyində (konsulluğunda) və ya
Azərbaycan Respublikası Xarici İşlər Nazirliyinin
Konsulluq idarəsində leqallaşdırılmalıdır.
Ərizəçi tərəfindən təqdim olunan sənədlərə bir qayda
olaraq, bütün lazımi sənədlər təqdim olunduğu gündən
başlayaraq 1 ay müddətində baxılır.
Ali təhsil sahəsində ixtisasın tanınmasından imtina
olunduğu halda, imtinaya əsas olan səbəblər yazılı
şəkildə ərizəçiyə izah edilir.
Sual:
Dövlət büdcəsindən maliyyələşən müəssisələrdə
çalışmanın yaş həddi neçədir və hansı hallarda bu müddət
uzadıla bilər?
Cavab:
Əmək Məcəlləsinin 10-cu maddəsinə görə dövlət
büdcəsindən maliyyələşən müəssisələrdə çalışmanın yaş
həddi 65-dir. Dövlət büdcəsindən maliyyələşən
müəssisənin 65 yaşına çatmış işçisinin həmin müəssisədə
çalışma müddəti müvafiq dövlət orqanının rəhbəri
tərəfindən hər dəfə 1 ildən çox olmayaraq uzadıla bilər.
Çalışma müddətinin 5 ildən çox uzadılmasına yol
verilmir.
Elm, mədəniyyət, səhiyyə və təhsil sahələrinin
inkişafında Azərbaycan Respublikası Nazirlər Kabineti
tərəfindən müəyyən edilmiş xüsusi xidmətləri olmuş
dövlət büdcəsindən maliyyələşən müəssisənin 65 yaşına
çatmış işçisinin çalışma müddəti müvafiq dövlət orqanı
tərəfindən 5 ildən artıq uzadıla bilər.
Azərbaycan Respublikası Nazirlər Kabinetinin
31.10.2011-ci il tarixli 180 nömrəli qərarı ilə təsdiq
edilmiş "Dövlət büdcəsindən maliyyələşən müəssisələrdə
çalışmanın yaş həddinə çatmış işçinin çalışma müddətinin
5 ildən artıq uzadılmasına yol verən elm, mədəniyyət,
səhiyyə və təhsil sahələrinin inkişafında xüsusi
xidmətlərin meyarları"na əsasən dövlət büdcəsindən
maliyyələşən müəssisələrdə çalışmanın yaş həddinə çatmış
işçinin çalışma müddətinin 5 ildən artıq uzadılmasına
yol verən meyarlar aşağıdakılardır:
1. Azərbaycan Respublikasının orden və medalları ilə
təltif edilmə;
2. Azərbaycan Respublikasının fəxri adlarına layiq
görülmə;
3. işlədiyi sahə üzrə elmi dərəcəsinin və ya elmi adının
olması;
4. Azərbaycan Milli Elmlər Akademiyasının həqiqi və ya
müxbir üzvü olması;
5. Dövlət mükafatı laureatı olması;
6. 1991-ci il oktyabrın 18-dək orden və medallarla
təltif edilmə.
Sual:
Müddətli həqiqi hərbi xidmətə çağırışa möhlət
verilməsinin əsasları hansılardır? Təhsili davam
etdirmək üçün çağırışa möhlət verilirmi?
Cavab:
"Hərbi vəzifə və hərbi xidmət haqqında" Azərbaycan
Respublikası Qanununun 18-ci maddəsinə görə müddətli
həqiqi hərbi xidmətə çağırışa möhlət rayon, şəhər,
şəhərdə rayon çağırış komissiyasının qərarı ilə
aşağıdakı əsaslara görə verilir:
- ailə vəziyyətinə görə;
- sağlamlıq vəziyyətinə görə;
- təhsili davam etdirmək üçün;
- Azərbaycan Respublikası Milli Məclisinin deputatı və
bələdiyyələrə üzv seçilmək üçün namizədliyi qeydə
alınmış şəxslərin seçki fəaliyyəti ilə əlaqədar
(namizədliyi qeydə alındığı gündən seçkilərin
nəticələrinin rəsmi dərc olunduğu günədək);
- deputat, hakim, Azərbaycan Respublikasının İnsan
hüquqları üzrə müvəkkil (ombudsman) fəaliyyəti ilə
əlaqədar.
Həmin Qanunun 21-ci maddəsinə əsasən mülkiyyət və
təşkilati-hüquqi formasından asılı olmayaraq dövlət
qeydiyyatına alınmış, fəaliyyətinə xüsusi razılıq
(lisenziya) verilmiş və akkreditasiya olunmuş təhsil
müəssisələrində və onların filiallarında təhsilini davam
etdirmək üçün aşağıdakı çağırışçılara möhlət yalnız bir
dəfə verilir:
- ümumi təhsil müəssisələrində tam orta təhsil alan, 20
yaşınadək çağırışçılara;
- ilk peşə-ixtisas təhsili müəssisələrində təhsil alan,
bu müəssisələrə daxil olana qədər tam orta təhsil
almamış 20 yaşınadək çağırışçılara;
- orta ixtisas təhsili müəssisələrində təhsil alan, bu
müəssisələrə daxil olana qədər tam orta təhsil almamış
22 yaşınadək çağırışçılara;
- ali təhsil müəssisələrində və onların filiallarında
əyani təhsilalma formasında ali təhsil pilləsində
(bakalavriat), ali baza tibb təhsili və rezidenturada
təhsil alanlara - təhsilini bitirənədək (təkrar ali
təhsil alan çağırışçılar istisna olmaqla);
- xarici ölkələrdə əyani təhsilalma formasında təhsil
alanlara ali təhsil pilləsində (bakalavriat), tibb
təhsili üçün ali baza tibb təhsili və rezidenturada
(internaturada) təhsil alanlara müvafiq təhsilini
bitirənədək (təkrar ali təhsil alan çağırışçılar istisna
olmaqla).
Ali təhsil müəssisələrindən xaric edilmiş şəxslər 6 ay
müddətində ali təhsil müəssisəsinə bərpa olunmadıqda
çağırışa möhlət hüquqlarını itirirlər və ümumi əsaslarla
müddətli həqiqi hərbi xidmətə çağırılırlar.
Təhsilini davam etdirmək üçün müddətli həqiqi hərbi
xidmətə çağırışa möhlət almış və müddətli həqiqi hərbi
xidmətə çağırılmamış çağırışçılar 35 yaşına çatanadək
müddətli həqiqi hərbi xidmətə çağırılırlar.
Hüquqi ekspertiza və lisenziyalaşdırma şöbəsi
|
