|
 "SOCAR
TurkeyEnergy" şirkətinin Baş icraçı direktoru və Petkim
şirkətinin İdarəetmə Şurasının üzvü cənab Kənan Yavuz
Bakı Ali Neft Məktəbində (BANM) olub və Elmi Şuranın
üzvləri ilə görüşüb.
Elmi Şuranın sədri, BANM-in rektoru Elmar Qasımov qonağı
salamlayaraq ali təhsil müəssisəsinin yaranma tarixi,
qarşısında duran vəzifələri, əldə olunmuş nailiyyətləri
haqqında məlumat verib. Rektor tədris prosesinin ingilis
dilində, müasir proqramlar və texnologiyalar əsasında və
istehsalla sıx əlaqədə həyata keçirildiyini bildirib və
Türkiyədə inşa edilən müasir tipli sənaye müəssisəsi
olan Petkim şirkəti ilə əməkdaşlıq əlaqələrinin ali
məktəb üçün böyük maraq kəsb etdiyini vurğulayıb.
Kənan Yavuz Azərbaycan və Türkiyə xalqlarının çoxəsrlik
dostluq münasibətindən, Azərbaycanın müstəqillik əldə
etdikdən sonra iki qardaş xalqın və dövlətin bir çox
dünya miqyaslı layihələrə imza atmasından, Petkim-in bu
layihələrin sırasında ən önəmli yerlərdən birini
tutmasından və hər iki ölkənin rəhbərlərinin diqqət
mərkəzində olmasından danışıb. Cənab Yavuz Petkim-in
yaranması və inkişafı ilə bağlı Elmi Şuranın üzvlərini
məlumatlandırıb, BANM ilə mütəxəssis hazırlığında
əməkdaşlığa hazır olduğunu bildirib. O, tədris
prosesində gənclərə təkcə mühəndis-texniki biliklərin
verilməsini yox, həm də onlara vətənpərvərlik,
dövlətçilik, ümumxalq marağına xidmət, ənənələrə hörmət
hisslərinin aşılanmasının vacibliyini vurğulayıb.
Daha sonra Petkim şirkəti ilə BANM arasında əməkdaşlığın
perspektiv istiqamətləri vurğulanıb.
Görüşün sonunda qonağa Bakı Ali Neft Məktəbinin "Fəxri
qonaq" diplomu təqdim edilib.
İctimaiyyətlə əlaqələr şöbəsi |
