|
 Azərbaycan
Respublikası Təhsil Problemləri İnstitutunda növbəti "Pedaqoji
innovasiyalar" seminarı çərçivəsində "İstedadlı
uşaqlarla işin istiqamətləri" mövzusunda məşğələ
keçirilib.
Tədbiri institutun direktoru, hüquq üzrə fəlsəfə doktoru
Qulu Novruzov açaraq istedadların hər bir cəmiyyətin
milli sərvəti, inkişafının strateji ehtiyatları olduğunu
bildirib, ölkəmizdə istedadların üzə çıxarılması və
inkişafı istiqamətində görülən işlərdən danışıb. Qeyd
edib ki, "Xüsusi istedada malik olan uşaqların
(gənclərin) yaradıcılıq potensialının inkişafı üzrə
Dövlət Proqramı (2006-2010-cu illər)"nın icrası ilə
bağlı Təhsil Nazirliyi və digər qurumlar tərəfindən
zəruri başlanğıcların təməli qoyulmuşdur. Həmin
mütərəqqi başlanğıcların mütəşəkkil, səmərəli və elmi
əsaslarla inkişaf etdirilməsi üçün elmi və tətbiqi
tədqiqatların davam etdirilməli, təcrübə meydançaları
yaradılmalı, bu işdə beynəlxalq təşkilatlar və milli
qurumlarla əməkdaşlığın intensivləşdirilməli olduğunu
deyən Qulu Novruzov iştirakçılara bu istiqamətdəki
fəaliyyətlərində uğurlar diləyib.
Tədbirdə TPİ-nin İstedadlı uşaqlarla iş şöbəsinin
müdiri, pedaqogika üzrə fəlsəfə doktoru, dosent Elxan
Bəylərov institutun inklüziv təhsil şöbəsinin böyük elmi
işçisi Fərid Süleymanovla birlikdə Türkiyənin Antalya
şəhərində keçirilmiş seminar-konfransda iştirakları
barədə məlumat verib.
Türkiyənin Beynəlxalq Xüsusi İstedada Malik Uşaqların
Təhsili Proqramları təşkilatının təşəbbüsü ilə keçirilən
"Üstün Zekalı ve Yetenekli Çocukların Eğitiminde
Farklılık Zirvesi" seminar-konfransında iştirak edən
əməkdaşlar səfərləri barədə geniş hesabat-məruzə ilə
çıxış ediblər. Uşaqların istedad potensialını
aşkarlayıb onları cəmiyyətə faydalı şəxsiyyətlər kimi
yetişdirmək məqsədi ilə təşkilatın müxtəlif proqramları
icra etdiyi qeyd olunub.
Sonra seminar-məşğələ iştirakçıları mövzu ətrafında
geniş müzakirələr aparıblar.
TPİ-nin Beynəlxalq əməkdaşlıq və informasiya şöbəsi |
