|
Gəncə Dövlət Universitetində Tempus-ESFİDİP "Əlilliyi
olan şəxslərin Azərbaycan ali təhsil müəssisələrinə
inteqrasiyasının təməlinin qoyulması" layihəsinə əsasən
"Əlillikdən uzaq, əlillərə yaxın olaq" mövzusunda
seminar keçirilib.
Təbliğat xarakterli seminarda universitetin inzibati
heyəti, psixologiya və pedaqogika kafedrasının müdirləri
və müəllimləri, şəhərdə fəaliyyət göstərən bəzi
qeyri-hökumət təşkilatlarının əməkdaşları iştirak
ediblər.
Universitetin elm və innovasiyalar üzrə prorektoru
Pərvin Kərimzadə seminarı giriş sözü ilə açaraq
layihənin qərb bölgəsi üzrə önəmindən danışıb.
Beynəlxalq əlaqələr şöbəsinin müdiri, eləcə də layihənin
universitet üzrə koordinatoru Ruslan Məmmədov layihə
haqqında ətraflı təqdimat edib. Təqdimatda indiyə qədər
görülən işlər və perspektiv fəaliyyətlə bağlı
iştirakçılara məlumat verilib. Beynəlxalq əlaqələr
şöbəsinin baş metodisti, layihənin işçi qrupunun üzvü
Farizə İsmayılzadə Avropada keçdiyi təlimlər haqqında
danışıb. Ümumi pedaqogika kafedrasının baş müəllimi
Lamiə Nağıyeva, informatika kafedrasının müəllimi Vasif
Həsənov layihə çərçivəsində Avropada keçirilən
təlimlərdə öyrəndikləri məsələlərdən bəhs ediblər.
"Əlil Təşkilatlar İttifaqı"nın Gəncə şəhər üzrə
nümayəndəsi Elmira İsmayılova öz çıxışında inklüziv və
xüsusi təhsildən bəhs edib, müxtəlif əlillik dərəcəsi
olan şəxslərin ali təhsil müəssisələrində təhsil
almaları üçün bu layihənin həyata keçirilməsinə dəstək
olacaqlarını bildirib.
Seminarda qeyd edilib ki, universitet nəzdində açılacaq
"Əlil tələbələrə dəstək mərkəzi"nin növbəti tədris
ilindən fəaliyyətə başlaması gözlənilir.
Maqbet ƏHMƏDOV,
GDU-nun Mətbuat xidmətinin rəhbəri |
