|
 Yaxşı
müəllim təkcə şagirdlərinə oxumağı, yazmağı öyrətmir,
həm də öz yetirmələrini layiqli vətəndaş və əsl insan
kimi formalaşdırmağı bacarır. Belə müəllimlər sevilir,
illər keçsə də dərs dediyi şagirdlər, valideynlər və
ictimaiyyət tərəfindən hörmətlə qarşılanır. Bütün bu
məziyyətləri özündə birləşdirən, təkcə peşə baxımından
deyil, eləcə də həyat tərzi ilə əsl müəllim olan belə
insanlara xoşbəxt müəllim demək olar...
Bakıdakı 20 nömrəli məktəb-liseyin ibtidai sinif
müəllimi, "Tərəqqi" medallı təcrübəli pedaqoq Mehparə
Həbibli məhz belə müəllimlərdəndir. Onun bir pedaqoq
kimi qazandığı nailiyyətlər, tədrisdə tətbiq etdiyi
yeniliklər hələ çox illər sonra da faydalı təcrübə kimi
istifadə olunacaqdır.
Bu baxımdan 20 nömrəli məktəb-liseydə Mehparə Həbiblinin
dərs dediyi I "ə" sinfinin "Uşaqlar dünyanın sevincidir"
adlı hesabat tədbirində şagirdlərin yüksək hazırlıq
nümayiş etdirməsi də təsadüfi deyildi. Tədris ilinin
yekunlarına və 1 iyun - Uşaqların Beynəlxalq Müdafiəsi
Gününə həsr olunmuş tədbirdə məktəbin müəllimləri,
valideynlər və digər qonaqlar iştirak edirdilər.
Öncə Azərbaycan Respublikasının Dövlət himni
səsləndirildi.
Al-əlvan bəzədilmiş zala daxil olan birincilərin sonsuz
sevinc və həyəcan hissləri aydın sezilirdi.
Bütün fəaliyyəti boyu öz işinə məsuliyyətlə yanaşdığını
bildirən birincilərin sinif rəhbəri M.Həbibli hər zaman
yetirmələrinin uğurlarından ruhlandığını söylədi. Artıq
ona öz övladları qədər doğma olan builki birincilərin də
gələcəyinə böyük ümidlərlə baxdığını vurğulayan
M.Həbibli şagirdlərinin hər birinə təhsillərində və
həyatlarında bol-bol nailiyyətlər dilədi.
Azərbaycan təhsilində həyata keçirilən islahatların ona
yeni ruh verdiyini söyləyən M.Həbibli bundan sonra daha
yüksək tədris uğurları qazanmaq üçün çalışacağını
bildirdi. Təhsil sahəsindəki inkişafı Azərbaycanda
aparılan genişmiqyaslı tədbirlərlə əlaqələndirən
M.Həbibli həmçinin, ölkəmizdə ilk dəfə keçirilən
"Bakı-2015" I Avropa Oyunlarının əhəmiyyətindən bəhs
etdi, bu haqda şagirdlərinə müfəssəl məlumatlar
verdiyini nəzərə çatdırdı.
Daha sonra birincilərin çıxışları, şeir, rəqs və mahnı
parçaları tədbir iştirakçılarında xoş ovqat yaratdı.
Tədbir bir də onunla əlamətdar idi ki, M.Həbiblinin
ötənilki dördüncüləri də mərasimdə iştirak edirdilər.
Sevimli müəllimləri Mehparə Həbibli ilə səmimi
salamlaşan ötənilki dördüncülər də təbriklərini
çatdırdı, paytaxtın ən nüfuzlu liseylərində uğurla
təhsil aldıqlarını bildirdilər.
Məktəbin direktor müavini Kainat İbrahimova tədbiri
yüksək dəyərləndirdi və rəngarəng çıxışlar
hazırladıqlarına görə birincilərə, eləcə də onların
sinif müəllimi Mehparə Həbibliyə təşəkkürünü bildirdi.
Qeyd etdi ki, bir çox metodiki vəsaitin müəllifi olan
M.Həbibli zəngin pedaqoji fəaliyyəti dövründə həmişə
nümunəvi işi ilə gənc müəllimlərə örnək olub. Yaxşı
müəllimi səciyyələndirən cəhətlər çoxdur: dərin bilik,
pedaqoji-psixoloji hazırlıq, müəllimlik məharəti, yüksək
peşəkarlıq, innovativ düşüncə, fəaliyyət və s. Bunların
hamısı Mehparə müəllimdə var.
Tədbirdə çıxış edən valideynlər övladlarının məhz
Mehparə müəllimin sinfində təhsil aldığına görə
məmnunluqlarını ifadə etdilər.
Sifai SƏFƏROVA,
"Azərbaycan müəllimi" |
