|
 Mayın
26-sı Bakıdakı 214 nömrəli tam orta məktəbin I "e"
sinfinin şagirdləri, onların müəllim və valideynləri
üçün həyəcan dolu, eyni zamanda sevincli bir gün idi.
Ümumtəhsil müəssisəsinin "Sağlam təhsil sinfi"nin
balaca fidanları məktəb həyatlarında ilk "Əlifba
bayramı"nı qeyd edirdilər.
Balacaların bu sevinc və əyləncə dolu tədbirində iştirak
etmək istəyən hər bir kəs məktəbin akt zalına
toplaşmışdı. Xüsusilə böyük fərəhlə, bəslədiyi
ümidlərlə, xəyallarla, ürəyindəki xoş arzularla
övladının əlindən tutaraq məktəbə aparan valideynlər
indi körpə balalarının əziz bayramına yığışıb,
səbirsizliklə övladlarının çıxışlarını gözləyirdilər.
Şagirdlər öz sevimli müəllimləri Sevinc Süleymanovanın
rəhbərliyi ilə bu gözəl günə yüksək səviyyədə
hazırlaşmışdılar.
Tədbiri məktəbin direktor əvəzi Yaqut Məmmədova açaraq
"Əlifba bayramı" münasibəti ilə şagirdləri, müəllimləri
və valideynləri təbrik etdi. Rəhbərlik etdiyi ümumtəhsil
müəssisəsində bu ildən "Sağlam təhsil- sağlam millət"
layihəsi çərçivəsində 3 "Sağlam təhsil sinfi" nin
yaradıldığını söyləyən direktor əvəzi adıçəkilən
siniflərin üstünlüklərindən, şagirdlərlə burada aparılan
məqsədyönlü işlərdən söz açdı. O, "Sağlam təhsil sinfi"nin
şagirdlərinə sağlam gələcək, uğurlu təhsil arzulayaraq,
hər zaman xoş xəbərlər ilə valideynləri
sevindirəcəklərinə ümidvar olduğunu bildirdi.
Azərbaycan Respublikasının Dövlət himni
səsləndirildikdən sonra söz birincilərə verildi.
Birincilərdən Leyla Nağızadə, Xədicə Hüseynova, Faiq
Hacıyev, Elza İsmayılova, Ruslan Səttarov və başqaları
səslərdən, sözlərdən tutmuş hər bir dərsliyin elmi gücü
haqqında bir-birindən maraqlı çıxışlar etdilər, şeirlər
söylədilər. Şagirdlərin ifa etdikləri mahnı və rəqslər
tədbir iştirakçıları tərəfindən alqışlarla qarşılandı.
Balacaların nağıllar əsasında hazırladıqları
səhnəciklər də maraqla izlənildi.
Həmin gün məktəb divarları arasında həyatda ilk kövrək
addımlarını atan körpələr həm də ilboyu
öyrəndiklərinin hesabatını verdilər. Sonda balacalar
müəllimləri Sevinc Süleymanova tərəfindən dərs
müddətində yüksək fəallıq, bilik və bacarıq
göstərdiklərinə, eyni zamanda bu bayrama belə gözəl
hazırlaşdıqlarına görə diplomla təltif olundular.
Tədbirdə Təhsil Nazirliyinin Pilot layihələrlə iş
sektorunun aparıcı məsləhətçisi Afət Süleymanova və "Sağlam
təhsil - sağlam millət" layihəsinin mütəxəssisi Nigar
Şahhüseynbəyova iştirak edirdilər.
Samirə KƏRİMOVA,
"Azərbaycan müəllimi"
Foto Rəşad RAMAZANOĞLU |
